NA SAME 6 - Ai Vola Tabu (Vakadewa Makawa Vakavoutaki 2021)

Na Masu ni Kere Veivuke ni Yaco na Leqa

Vua nai liuliu ni sere: kei nai vakatagi vakawa; me vaka na Seminica. A Same i Tevita.

¹ I Jiova, mo ni kakua ni vunauci au e nomuni cudru; kakua ni cudruvi au e na nomuni cudru katakata.

² I Jiova mo ni yalololoma mai vei au; ni'u sa malumalumu; ni vakabulai au, Jiova, ni sa rarawa na suiqu.

³ A yaloqu talega sa rarawa vakalevu, ia koi kemuni, i Jiova—ena vakaevei na kena dede?

⁴ I Jiova, ni lesu tale mai, ni vakabula na yaloqu; ni vakabulai au e na vuku ni nomuni loloma.

⁵ Ni sa sega ni rawa ni vakananumi kemuni na mate; o cei ena vakamolimoli vei kemuni mai nai bulubulu?

⁶ Au sa oca e na noqu vutugu; ka'u sa vakanawa na noqu i mocemoce e na bogi kecega; au sa vakasuasuataka na noqu i davodavo e na wai ni mataqu.

⁷ Sa buawa na mataqu e na vuku ni noqu rarawa; ka sa qase mai e na vukudra kecega na noqu meca.

⁸ Dou lako tani vei au, koi kemudou kecega sa kitaka na ca; ni sa rogoca ko Jiova na domo ni noqu tagi.

⁹ Sa rogoca ko Jiova na noqu kerekere; ena ciqoma na noqu masu ko Jiova.

¹⁰ Me ra madua kecega na noqu meca ka me ra velavela sara; me ra lesu tale, ka me ra madua vakasauri sara.