NA SAME 51 - Ai Vola Tabu (Vakadewa Makawa Vakavoutaki 2021)

A Masu ni Kere Veivosoti kei na Veivakasavasavataki

Vua nai liuliu ni sere. A Same i Tevita, ni sa lako mai vua ko Necani na parofita, ni sa cala ko Tevita vata kei Pacisepa.

¹ Ni yalololoma vei au, na Kalou, me vaka na nomuni loloma tudei; me vaka na levu ni nomuni yaloveivosoti, mo ni kauta tani na noqu i valavala ca.

² Mo ni vakasavasavataki au sara mai na noqu caka cala, ka vuya laivi vei au na noqu i valavala ca.

³ Ni'u sa vakatusa na noqu talaidredre, ka sa tu ga e mataqu e na veisiga na noqu i valavala ca.

⁴ Vei kemuni, io, vei kemuni duaduaga, ka'u sai valavala ca, ka cakava e matamuni na ka ca, mo ni vakadonui ni kemuni sa vosa ka sega ni cala ni kemuni sa lewa.

⁵ Raica, ka'u a sucu vata mai kei na ca, ka sa kunekunetaki au ko tinaqu e nai valavala ca.

⁶ Raica, ko ni sa vinakata na ka dina mai na vu ni yalo; ia mo ni vakavukui au e na tikina e loma.

⁷ Mo ni vakasavasavataki au e na isopi, ka'u na qai savasava; vui au, ka'u na qai vulavula vakalevu ka vakalailai na uca-vulavula.

⁸ Vakayacora vei au me'u rogoca na ka ni marau kei na reki; me reki rawa kina na suiqu ko ni sa vorolaka.

⁹ Ni tabonaka na matamuni mai na noqu i valavala ca, ka kauta tani na noqu caka cala kecega.

¹⁰ Ni bulia e lomaqu na yalo e savasava, na Kalou, ka vakavouya e lomaqu na yalo sa dodonu ka dei.

¹¹ Ni kakua ni vakasevi au mai na matamuni, ka mo ni kakua ni kauta tani vei au na nomuni Yalo Tabu.

¹² Ni vakasuka tale kivei au na reki sa vu mai na nomuni veivakabulai, ka tokoni au e na yalo sa gumatua tiko.

¹³ Au na qai vakavulica vei ira na daucaka-cala na nomuni sala, ka ra na saumaki mai vei kemuni ko ira na tamata i valavala ca.

¹⁴ Mo ni vakabulai au mai nai sau ni dra, na Kalou, Oi kemuni na noqu Kalou ni veivakabulai, ena qai seretaka vakadomoilevu na nomuni yalododonu na yamequ.

¹⁵ Kemuni na Turaga, mo ni dolava na tebenigusuqu, ena qai vakacaucautaki kemuni na gusuqu.

¹⁶ Kemuni sa sega ni vinakata me'u vakacaboisoro; se'u na cakava, ko ni sa sega talega ni rekitaka nai soro kama.

¹⁷ Ai soro vua na Kalou na yalo sa raramusumusu; a yalo sa ramusu, ka bibivoro, ko ni na sega ni cata, na Kalou.

¹⁸ Mo ni caka vinaka ki Saioni e na nomuni yalololoma; mo ni viria na bai kei Jerusalemi,

¹⁹ kemuni na qai taleitaka na veisoro e dodonu, e nai soro kama kei nai soro sa vakamai taucoko; ka ra na qai vakacabori na bulumakau e na nomuni cabocabo-ni-soro.