NA SAME 5 - Ai Vola Tabu (Vakadewa Makawa Vakavoutaki 2021)

Na Masu ni Kere Veitaqomaki

Vua nai liuliu ni sere: baleta na bitu ni vakatagi. A Same i Tevita.

¹ Kemuni Jiova, mo ni vakalakala daligamuni ki na noqu vosa; ni kila na noqu nanuma.

² Ni vakarogoca na noqu tagi, noqu Tui kei na noqu Kalou, ni'u sa masu ga vei kemuni.

³ I Jiova ko ni na rogoca na domoqu, e na mataka; e na mataka ka'u na vakarautaka na noqu masu vei kemuni, ka rai cake.

⁴ Ni kemuni sa sega ni Kalou sa rekitaka na ka e sega ni dodonu; ena sega na ca me tiko vata kei kemuni.

⁵ Ena sega ni wavu tu e matamuni ko ira na lialia; ko ni sa cati ira kecega era sa kitaka nai valavala ca.

⁶ Kemuni na vakarusai ira era sa vosa lasu; na tamata e vakadave-dra kei na dauveivakaisini ena cata sara ko Jiova.

⁷ Ia koi au, e na vuku ni nomuni loloma levu, ka'u na curu ki na nomuni vale, ka'u na cuva vaka ki na nomuni vale tabu ni'u sa rerevaki kemuni.

⁸ I Jiova, ni tuberi au e na nomuni yalododonu e na vukudra na noqu meca; ni vakadodonutaka e mataqu na nomuni sala.

⁹ Ni sa sega na ka dina e na gusudra; sa ca sara na lomadra; ai bulubulu sa dola tu na nodra i tilotilo; era sa dauveicavilaki e na yamedra.

¹⁰ Na Kalou, mo ni vakacalai ira; me vu ni nodra bale na nodra bose; vakasevi ira e na vuku ni nodra i valavala ca e vuqa, ni ra sa dautalaidredre vei kemuni.

¹¹ Ia me ra reki ga ko ira kece sa vakararavi vei kemuni; me ra sere vakadomoilevu ga ka sega ni mudu. Ni kemuni na vakarurugi ira, me ra marautaki kemuni ko ira era sa lomana na yacamuni.

¹² Ni sai kemuni, Jiova, ena vakalougatataka na yalododonu; ko ni na vakavolivoliti koya e na loloma me vaka e nai sasabai.