NA SAME 49 - Ai Vola Tabu (Vakadewa Makawa Vakavoutaki 2021)

Na Leqa ni Vakararavi ki nai Yau

Vua nai liuliu ni sere. A nodra Same na luve i Kora.

¹ Dou rogoca na ka oqo, na tamata kecega; dou vakatudaliga, na kai vuravura kecega,

² oi kemudou vata na tamata wale kei na turaga, na vutuniyau kei na dravudravua.

³ Ena vosataka na vuku na gusuqu; ia ena vakanananu na yaloqu ki na ka ni yalomatua.

⁴ Au na vakalakala daligaqu ki na vosa vakatautauvata; au na taurivaka na noqu i bole e na api.

⁵ A cava me'u rere kina e na siga ni rarawa, ni sa voliti au na nodra caka cala ko ira era lawakitaki au,

⁶ o ira era vakararavi e na nodra kamunaga ka dokai ira e na vuku ni nodra i yau levu?

⁷ Sa sega sara e dua vei ira sa volia rawa na wekana, se solia rawa vua na Kalou na kenai voli.

⁸ Ni sa ka dredre nai voli ni yalodra, a sa sega ni rawa ka tawa mudu

⁹ ka me bula tikoga ko koya, ka sega ni vuca rawa.

¹⁰ Ni sa kunea ko koya ni ra mate ga na tamata vuku; ka sa rusa vata talega na lialia kei na tamata sese sara ka laiva na nodra i yau vei ira na tani.

¹¹ A lomadra dina, ni na tu ga na nodra veivale ka sega ni mudu, kei na nodra i tikotiko e nai tabatamata kecega, era sa vakayacana na nodra tiki ni vanua e na yacadra ga.

¹² Ia na tamata sa vakarokorokotaki sa sega ni tiko dei; sa vaka ga na manumanu sa rusa.

¹³ Oqo na nodra i valavala na lialia, ia sa vinakata ga na nodra vosa ko ira na nodra kawa. Sela

¹⁴ Era sa lesi ki nai bulubulu me vaka na sipi; ena vakani ira ko mate; ena veitalia vei ira e na mataka ko ira na yalododonu, ena malai talega na nodra kaukauwa e nai bulubulu; me sega kina na kenai tikotiko.

¹⁵ Ia na Kalou ena vakabula na yaloqu mai na kaukauwa ni bulubulu, ni na kauti au ko koya. Sela

¹⁶ Kakua ni ko rere ni sa vutuniyau mai e dua, ni sa levu mai nai ukuuku ni nona vale.

¹⁷ Ni na sega ni kauta yani e dua na ka ni sa mate ko koya; ena sega ni muri koya sobu na nona totoka.

¹⁸ Ka dina ga, ni sa bula tiko, sa okati koya me kalougata, —ni ko na vakacaucautaki e na gauna ko sa caka vinaka kina vei iko—

¹⁹ ena lako ga na yalona ki nai tabatamata ni nona qase, ka na sega sara ni kunea tale na rarama.

²⁰ A tamata sa vakarokorokotaki ka sega ni yalomatua sa vaka ga na manumanu sa rusa.