NA SAME 48 - Ai Vola Tabu (Vakadewa Makawa Vakavoutaki 2021)

Na Lagilagi kei na Kaukauwa i Saioni

A Same. A nodra sere na luve i Kora.

¹ Sa levu ko Jiova, ka me vakavinavinakataki vakalevu e na koro ni noda Kalou, na nona ulunivanua tabu.

² Sa lagilagi sara na kenai tikotiko, era marautaka na kai vuravura kece, na Ulunivanua ko Saioni, na yasana sa donuya na vualiku, na koro nei koya na Tui levu.

³ Sa kilai ko Jiova e na kena veivale vakaturaga mei drodro.

⁴ Raica, era sa soqoni vata na tui, era lako vata yani.

⁵ Era raica, ka ra qai kidacala; era kidroa, ka dro tani yani;

⁶ sa kani ira mai kea na rere, kei na rarawa, me vaka na yalewa sa taratara,

⁷ o sa vorolaka na waqa ni Tasisi e na cagi mai na tokalau.

⁸ Me vaka na ka keimami a rogoca, keimami sa raica ni vakakina e na koro i Jiova-ni-lewevuqa, e na koro ni noda Kalou, ena vakataudeitaka na Kalou me sega ni oti rawa. Sela

⁹ Keimami a veinanuyaka na nomuni yalololoma, na Kalou, e loma ni nomuni vale-ni-soro.

¹⁰ Me vaka na yacamuni, na Kalou, sa vakakina na vakavinavinaka, me ia vei kemuni ka yacova nai yalayala kei vuravura. Sa sinai na ligamuni matau e na cakacaka dodonu.

¹¹ Me reki na Ulunivanua ko Saioni, me ra marau na goneyalewa ni Juta e na vuku ni nomuni lewa.

¹² Dou lako voli mai Saioni, ka vakavolivolita, wilika na kena veivale cecere,

¹³ vakaraica vinaka na kena bai; vakananuma na kena veivale vakaturaga, mo dou tukuna ki nai tabatamata ena muri mai

¹⁴ ni sa noda Kalou ka tawa mudu, na Kalou oqo. Ena tuberi keda ko koya ka yacova na noda mate.