NA SAME 47 - Ai Vola Tabu (Vakadewa Makawa Vakavoutaki 2021)

Na Lewa ni Kalou e Vuravura

Vua nai liuliu ni sere. A nodra Same na luve i Kora.

¹ Oi kemudou kecega na tamata, dou vakasausau; dou kaila vua na Kalou e na kaila ni marau.

² Ni sa rerevaki ko Jiova, o Koya sa Cecere Sara, na Tui levu kei vuravura taucoko.

³ O koya ga ena vakamalumalumutaki ira na tamata vei keda, kei na veimatanitu ki na ruku ni yavada.

⁴ O koya ga ena digitaka na noda i votavota, Na vanua vinaka sara i Jekope sa lomana ko koya. Sela

⁵ Sa lako cake na Kalou kei na kaikaila, ko Jiova kei na rorogo ni davui.

⁶ Dou seretaka na vakamolimoli vua na Kalou, seretaka na vakavinavinaka; dou seretaka na vakamolimoli vua na noda Tui, seretaka na vakavinavinaka.

⁷ Ni sa Tui kei vuravura taucoko na Kalou; dou vakavinavinaka ka sere e na lomavuku.

⁸ Sa lewai ira na veimatanitu na Kalou; sa tiko na Kalou e na nona i tikotiko tabu.

⁹ O ira na turaga ni veimatanitu era sa soqoni vata, o ira na nona tamata na Kalou i Eparaama. Ni sa nona na Kalou nai sasabai kei vuravura; sa vakalevulevui cake sara ko koya.