NA SAME 45 - Ai Vola Tabu (Vakadewa Makawa Vakavoutaki 2021)

A Same ni Vakamau Vakaturaga

Vua nai liuliu ni sere: me vaka na Lili. A nodra Masikili na luve i Kora. A Sere ni veivinakati.

¹ Sa vuabale na yaloqu e na vosa vinaka; au sa vosataka na ka ka'u sa cakava ka sa baleta na Tui; a yamequ na peni ni dauvolavola totolo.

² A nomuni rairai vinaka sa uasivi cake e na nodra na luve ni tamata; sa livi ki na tebenigusumuni na loloma; ia na Kalou sa vakalougatataki kemuni kina ka sega ni mudu.

³ Kemuni na Qaqa, mo ni vauca e na dibimuni, na nomuni seleiwau, kei na nomuni ukuuku kei na nomuni ka vakaturaga.

⁴ Mo ni vodo lako tiko vakaturaga, mo ni mani yaco e na vuku ni dina kei na yalomalumalumu, kei nai valavala dodonu; ka na vakavulici kemuni na ka ni veivakarerei na ligamuni matau.

⁵ Sa gata na nomuni gasau e na lomadra na meca ni Tui; era sa bale e matamuni na veimatanitu.

⁶ Ena sega ni mudu na nomuni tikotiko vakaturaga, na Kalou. Ai titoko ni caka dodonu nai titoko ni nomuni matanitu;

⁷ kemuni sa vinakata nai valavala dodonu, ka cata nai valavala ca. O koya sa lumuti kemuni kina na Kalou, na nomuni Kalou e na waiwai ni reki sa levu ka lailai na nodra na nomuni tokani;

⁸ a nomuni sulu kecega sa boi mura, kei na yasi, kei na kasia. Mai na vale ivori ni Tui, era sa vakamarautaki kemuni kina;

⁹ a goneyalewa ka marama era kenai tikovaki; sa tu ko koya na ranadi e na ligamuni matau sa vakaisulu e na koula mai Ofa.

¹⁰ Na luvequ yalewa, mo rogoca ka vakanananu, ka vakatu daligamu; mo guilecava na kai nomu, kei na vale nei tamamu,

¹¹ ena qai gadreva vakalevu na nomu matavinaka na tui. Ni sa nomu Turaga ko koya; ia mo vakarokoroko ga vua;

¹² ia na goneyalewa ni Taia ena kauta kina e dua na nona i loloma, ia ko ira era sa vutuniyau vei ira na tamata era na kere loloma vei iko.

¹³ Sa vakaiukuuku na lomana taucoko na luvena yalewa na tui; sa tali vata kei na koula na nona i sulu,

¹⁴ ena kau mai vua na tui e na kote duidui roka; ka muri koya yani ko ira na goneyalewa tabu-tagane, ka ra nona i tokani.

¹⁵ Era na kau mai e na marau kei na reki ni ra sa curu ki na vale-ni-tui.

¹⁶ O ira na luvemu era na tubu mei sosomi kei ira na tamamu; o na lesi ira me ra turaga e vuravura taucoko.

¹⁷ Au na cakava na yacamuni me nanumi e nai tabatamata kecega; era na vakavinavinaka kina vei kemuni na veimatanitu ka sega ni mudu.