NA SAME 41 - Ai Vola Tabu (Vakadewa Makawa Vakavoutaki 2021)

A Masu ni Tamata sa Kila na Nona Ca

Vua nai liuliu. A Same i Tevita.

¹ Sa kalougata ko koya sa nanuma na dravudravua; ena vakabulai koya ko Jiova e na siga ni rarawa.

² Ena maroroi koya ko Jiova, ka vakabulai koya tiko; ena vakalougatataki e vuravura. Ko ni na sega ni soli koya me ra veitaliataki koya ko ira na nona meca.

³ Ena vakaukauwataki koya ko Jiova ni sa malumalumu koto; e na cakava me vinaka tiko na nona i mocemoce ni sa tauvimate no.

⁴ Au a kaya, “I Jiova, ni lomani au mai; ni vakavinakataka na yaloqu, ni'u a caka ca vei kemuni.”

⁵ Sa vosavakacacataki au ko ira na noqu meca, ka kaya, “Ena mate beka ninaica ka me boko laivi kina na yacana?”

⁶ Kevaka sa mai raica ko koya, sa na vosa vakailasu ga, sa vakananuma tiko ki na ka ca e na vu ni yalona; ia ni sa lako voli e tautuba, sa tukuna.

⁷ O ira kecega era sa cati au, era sa vakasolokakanataki au vata; era sa vakananuma na ka me'u ca kina.

⁸ Era kaya, “Sa dua na mate ca sa kabiti koya, ia ni sa qai koto ena sega ni duri cake tale.”

⁹ Ko koya mada ga na noqu i tokani voleka ka'u dauvakararavi vua, o koya sa kania na kequ madrai, sa laqeti au e na bukubuku ni yavana.

¹⁰ Ia koi kemuni, i Jiova, mo ni lomani au mai, ka vakaduri au cake tale, me'u rawa ni sauma kivei ira!

¹¹ A ka oqo ka'u kila kina ni kemuni sa vinakati au; ni sa sega ni gumatua vei au na noqu meca.

¹² Ia koi au, ko ni sa vakataudeitaki au e na noqu yalododonu, ka vakataudeitaki au e matamuni ka sega ni mudu.

¹³ Me vakavinavinakataki ko Jiova na Kalou ni Isireli, sa sega ni tubu ka sega ni mudu. Emeni, Emeni.