NA SAME 40 - Ai Vola Tabu (Vakadewa Makawa Vakavoutaki 2021)

Na Vakavinavinaka ni Veivakabulai kei na Kere Veivuke

Vua nai liuliu ni sere. A Same i Tevita.

¹ Au a dau waraki Jiova tikoga; ka sa vakatu daligana vei au ka rogoca na noqu tagi.

² Sa tuberi au cake talega mai nai keli sa tu kina na rorogo rerevaki, mai na qele lolobo talega, ka sa vakatura na yavaqu e na dela ni uluvatu, ka vakataudeitaka na noqu i lakolako.

³ Sa biuta ki gusuqu e dua na sere vou, na sere ni vakavinavinaka vua na noda Kalou. Era na raica na le vuqa ka rere, ka vakararavi vei Jiova.

⁴ Sa kalougata na tamata sa dauvakararavi vei Jiova, ka sa gole tani mai vei ira na yalolevu, mai vei ira talega era lesu tani ki na daulasu.

⁵ I Jiova na noqu Kalou, sa ka levu na nomuni cakacaka e veivakurabuitaki ko ni sa cakava, kei na nomuni nanuma vei keimami. E dredre me wiliki vakadodonu vei kemuni, kevaka ka'u via vakatusa ka tukuna, e dredre ni wili.

⁶ Ai soro kei nai madrali ko ni sa sega ni vinakata, ia ko ni sa cula-basika ga na daligaqu. Ai soro kama kei nai soro ni valavala ca ko ni sa sega ni taroga.

⁷ Au a qai kaya, “Raica, au sa lako mai; ka'u sa volai vakaoqo e nai vola vivigi:

⁸ Au sa reki me'u kitaka na ka ko ni sa vinakata, na noqu Kalou; io, na nomuni vunau sa tu e na vu ni yaloqu.”

⁹ Au a vunautaka na veivakadonui e nai soqosoqo levu; raica, ka'u sa sega ni tarova na gusuqu, me vaka ko ni sa kila, i Jiova.

¹⁰ Au a sega ni vunia e lomaqu na nomuni veivakadonui, au a tukuna ga na nomuni dina kei na nomuni veivakabulai; au a sega ni vunia na nomuni yalololoma kei na nomuni dina mai vei ira nai soqosoqo levu.

¹¹ Koi kemuni talega, i Jiova, mo ni kakua ni bureitaka vei au na nomuni yalololoma; me maroroi au tikoga na nomuni loloma kei na nomuni dina.

A Masu ni Kere Veivuke

¹² Ni sa voliti au na ka ca sa sega ni wili rawa; sa vauci au na noqu i valavala ca, ka'u sa sega ni ta cake rawa kina; sa levu oqori ka lailai na drau ni uluqu, o koya sa waicala kina na yaloqu.

¹³ Mo ni yalovinaka, Jiova, mo ni vakabulai au; i Jiova, mo ni kusarawa mai mo ni vukei au.

¹⁴ Me ra madua ka kidroa vata era segata na yaloqu me ra vakarusa; me ra suka vakanadaku ka vakamaduataki ko ira era gadreva tiko me'u vakacacani.

¹⁵ Me ra luveniyali me kenai sau ni nodra veivakamaduataki ko ira era sa kaya vei au, “Sai koya! Sai koya!”

¹⁶ Ia ko ira kecega era sa vakasaqarai kemuni, me ra reki ka marautaki kemuni; kei ira era sa vinakata na nomuni veivakabulai me ra kaya tikoga, “Sa cecere ga ko Jiova!”

¹⁷ Ia koi au, ka'u sa dravudravua ka luveniyali, ia ka sa nanumi au tiko na Turaga. Koi kemuni na noqu dauniveivuke kei na noqu i vakabula; mo ni kakua ni vakaberabera, na noqu Kalou.