NA SAME 4 - Ai Vola Tabu (Vakadewa Makawa Vakavoutaki 2021)

Na Masu ni Kere Veivuke e na Vuku ni Meca

Vua nai liuliu ni sere: kei na wa ni vakatagi. A Same i Tevita.

¹ Mo ni rogoci au ni'u sa tagi, na Kalou ni noqu veivakadonui! Ko ni a vakalalagataki au ni'u a vakaosoosoi. Mo ni yalololoma talega mai vei au, ka rogoca na noqu masu.

² Koi kemudou na luve ni tamata, e bogi vica vata dou na vukica na noqu i ukuuku me ka ni veivakamaduataki? E bogi vica vata dou na lomana tiko na ka wale, ka dauvakasaqara na lasulasu? Sela

³ Ia mo dou kila sa digitaka na tamata yalovinaka ko Jiova me nona; ena vakarogoci au ko Jiova ni'u sa tagi vua.

⁴ Dou rere ga, kakua ni valavala ca; veivosaki kei na yalomudou e na nomudou i mocemoce, ka tiko lo. Sela

⁵ Dou vakacabora nai soro e dodonu, ka vakararavi ga vei Jiova.

⁶ Era lewe vuqa era sa kaya, “Ko cei ena vakaraitaka vei keda na ka vinaka? Kemuni Jiova, mo ni vakacilava vei keitou nai serau ni matamuni!”

⁷ Ko ni sa solia vakalevu ki yaloqu na marau sa uasivi cake mai na nodra marau e na gauna e levu kina na nodra sila kei na waini.

⁸ Au na davo no e na vakacegu, ka moce talega; ni sai kemuni duaduaga, i Jiova, sa vu ni noqu tiko vinaka.