NA SAME 39 - Ai Vola Tabu (Vakadewa Makawa Vakavoutaki 2021)

Na Masu ni Kere Yalomatua kei na Veivosoti

Vua nai liuliu ni sere: vei Jitucuni. A Same i Tevita.

¹ Au a kaya, “Au na vakaraica na noqu i valavala me'u kakua ni cala e na yamequ; ka'u na tarova na gusuqu e nai tarovi ni ra sa tu e mataqu na tamata caka ca.”

² Ka'u a galu ka tiko lo sara; ka'u a sega ni vosataka na ka vinaka; ia ka sa tubu kina na noqu rarawa,

³ sa katakata na yaloqu e lomaqu. Ni'u sa vakanananu, sa waqa na buka; ka'u sa qai vosa e na yamequ.

⁴ “I Jiova, mo ni vakatakila vei au na noqu i tinitini, kei nai vakarau ni noqu gauna, se sa vakaevei; ka vakatakila vei au na kena dauveilecayaki na noqu bula.

⁵ Raica, ko ni sa lewa me sa vaka na raba ni liga na noqu gauna, ia na noqu veiyabaki sa tautauvata vei kemuni kei na ka sa sega. E dina sara ni ra vaka ga e dua nai cegu na tamata kecega. Sela

⁶ E dina ni ra sa vaka nai yaloyalo walega na tamata ni ra bula voli. E dina sara ni ra sa lomaocaoca e na ka walega; era sa daukumuna vata nai yau, ka sa sega ni kila se ko cei e na mai taura.

⁷ “Ia oqo, kemuni na Turaga, a cava ka'u sa waraka tiko? Ka'u sa vakanuinui ga vei kemuni.

⁸ Ni vakabulai au mai na noqu i valavala ca kecega. Kakua ni laivi au me ra vakasewasewani au ko ira na lialia.

⁹ Au a galu; au a sega ni dalaga, ni sai kemuni ka sa vakayacora.

¹⁰ Ni kauta tani vei au na ligamuni; au sa rusa ni sa yaviti au na ligamuni.

¹¹ “Ni kemuni sa vakanakuitataka na tamata ka vunauca e na vuku ni nona caka ca, ko ni sa vakaotia na nona lagilagi me vaka na ka sa kania na sarasara; e dina ga ni sa ka walega na tamata kecega. Sela

¹² “Mo ni rogoca na noqu masu, Jiova, ka vakatu daligamuni ki na noqu tagi; mo ni kakua ni galu ni sa vakawai na mataqu. Ni'u sa vulagi ga vei kemuni, ka kai tani, me vakataki ira kece na noqu qase.

¹³ Ni vosoti au mada vakalailai, me'u bula cake tale, ni'u se bera ni lako tani eke, me'u sega ni kune tale.”