NA SAME 38 - Ai Vola Tabu (Vakadewa Makawa Vakavoutaki 2021)

Na Masu ni Vakatutusa me Kerei na Veivakabulai

A Same i Tevita, me i soro ni veivakananumi.

¹ I Jiova, kakua ni vunauci au e na nomuni cudru, se cudruvi au e na nomuni cudru waqawaqa.

² Ni sa coba sara ki lomaqu na nomuni gasau, ka sa bibi vei au na ligamuni.

³ Sa sega na tiki ni yagoqu sa bula e na vuku ni nomuni cudru; Sa sega ni vakacegu na suiqu e na vuku ni noqu i valavala ca.

⁴ Ni sa uasivia cake na uluqu na noqu caka ca; me vaka nai colacola bibi ka'u sa sega ni colata rawa.

⁵ Sa bona ka vakanana na noqu vidikoso e na vuku ni noqu lialia;

⁶ au sa rarawa sara; au sa vakalairoro vakalevu; au sa tagi lako e na siga ka bogi mai.

⁷ Ni sa robota na toloqu na mate vakasisila, ka sa sega na tiki ni yagoqu sa bula.

⁸ Au sa malumalumu ka musulaki sara; au a vutugu ni sa daurarawa na yaloqu.

⁹ I Jiova, sa tu e matamuni na ka kecega ka'u sa gadreva; ka sa sega ni vuni vei kemuni na noqu vutugu.

¹⁰ Sa tatatukituki na utoqu, ka sa yali yani na noqu kaukauwa; kei na rarama ni yaloka ni mataqu—sa takali talega mai vei au.

¹¹ Ko ira na noqu i tau kei nai tokani era sa la'ki tu tani mai na noqu mate ca, ka sa la'ki duri tu vakayawa na wekaqu voleka.

¹² A ra sa birika nai cori ko ira sa qarai au me'u mate; ia ko ira talega era sa segata me'u ca era vosavakacacataki au, ka ra vakanananu ki na ka lasu e na tiki ni siga kecega.

¹³ Ia koi au, ka'u sa vaka na didivara, ka'u sega ni rogoca; ka vaka na galu sa sega ni dalaga.

¹⁴ Ia ka'u sa vaka e dua sa sega ni rogoca rawa, Ka sa sega e na gusuna na veivunauci.

¹⁵ Ni'u sa nuitaki kemuni ga, Jiova; o ni na rogoci au, na Turaga na noqu Kalou.

¹⁶ Ni'u sa kaya, “Me ra kakua ga ni rekitaki au, ko ira era sa vakalevulevui ira vei au ni sa tidara na yavaqu!”

¹⁷ Ni'u sa voleka ni bale sobu, ka sa tu ga e mataqu na noqu rarawa.

¹⁸ Au sa vakatusa na noqu i valavala ca; ka'u sa rarawataka na noqu caka cala.

¹⁹ Ni ra sa tamata bula na noqu meca, ka ra sa kaukauwa, ia ko ira era sa cati au ka sega na vuna era sa le vuqa mai.

²⁰ O ira talega era kitaka na ka ca mei sau ni ka vinaka era noqu meca baleta ni ka'u sa muria na ka vinaka.

²¹ I Jiova, ni kakua ni biuti au! Kemuni na noqu Kalou, ni kakua ni tu vakayawa vei au!

²² Mo ni kusarawa mo ni vukei au mai, Kemuni na Turaga, na noqu i vakabula!