NA SAME 30 - Ai Vola Tabu (Vakadewa Makawa Vakavoutaki 2021)

A Vakavinavinaka ni sa Yaco na Bula

A Same i Tevita. A sere ni kena vakatabui na Valenisoro.

¹ Au na vakavinavinaka vei kemuni, Jiova, ni kemuni sa vakatoroi au ki cake, ka sa sega ni laivi ira na noqu meca me ra marau e na vukuqu.

² I Jiova noqu Kalou, ka'u a tagi vei kemuni, ia ko ni sa vakabulai au.

³ I Jiova, ko ni a tubera cake na yaloqu mai nai bulubulu, ko ni sa maroroya na noqu bula me'u kakua ni lako sobu ki nai bulubulu.

⁴ Dou sere vei Jiova, koi kemudou na nona tamata yalosavasava, ka vakavinavinaka ni dou nanuma na nona yalododonu.

⁵ Na nona cudru sa ka lekaleka sara; e na nona loloma sa tu kina na bula. Sa ia na tagi e na bogi, ia sa yaco e na mataka na marau.

⁶ Ia ni'u a tiko vinaka, ka'u sa kaya, “Au na sega ni vakayavalati.”

⁷ I Jiova, e na nomuni loloma ko ni sa vakataudeitaka sara na noqu ulunivanua; ia ko ni sa vunia na matamuni; ka'u sa qai taqaya.

⁸ Au a tagi vei kemuni, Jiova, ka'u a ia vei Jiova na masumasu.

⁹ “A cava na betena na noqu dra, ni'u sa lako sobu ki nai bulubulu? Ena vakavinavinaka beka vei kemuni na kuvu-ni-soso? Ena tukuna beka na nomuni dina?

¹⁰ Ni rogoca, Jiova, ka mo ni lomani au mai! Ni vukei au mai, Jiova!”

¹¹ O ni sa vukica na noqu tagi me'u sere ga; o ni sa luvata na noqu i sulu taga, ka vauci au e na reki,

¹² me sere kina vei kemuni na yamequ; me kakua sara ni galu. I Jiova na noqu Kalou, ka'u na vakavinavinaka vei kemuni ka tawa mudu.