NA SAME 3 - Ai Vola Tabu (Vakadewa Makawa Vakavoutaki 2021)

Vakadinata na Kalou e na Gauna ni Dredre

A Same i Tevita, ni sa drotaki Apisalome na luvena.

¹ Kemuni Jiova, sa ka tani na tamata sa tubu me vakararawataki au! Era sa lewe vuqa sa tu me bolei au;

² era sa lewe vuqa sa tukutuku vei au, ka vaka, “Ena sega sara ni vakabulai koya na Kalou.” Sela

³ Ia koi kemuni, Jiova, ko ni sa noqu i sasabai, na noqu i ukuuku, kei koya sa tabea cake na uluqu.

⁴ Au a tagi vei Jiova e na domoqu, a sa rogoci au ko koya mai na nona ulunivanua tabu. Sela

⁵ Au a davo no ka moce; au a yadra tale, ni sa maroroi au ko Jiova.

⁶ Au na sega ni rerevaki ira era le udolu vakatini era sa vakavolivoliti au vakaivalu.

⁷ Ni tucake, Jiova; ni vakabulai au, noqu Kalou! Sai kemuni ka yaviti ira kecega na noqu meca e na sui ni baludra; ko ni sa musulaka na batidra na tamata ca.

⁸ Sa nei Jiova ga na veivakabulai; me tu vei ira na nomuni tamata na nomuni vosa ni veivakalougatataki! Sela