NA SAME 27 - Ai Vola Tabu (Vakadewa Makawa Vakavoutaki 2021)

A Sere Masu ni Vakacaucau kei na Lomadei

A nei Tevita.

¹ A noqu rarama kei na noqu i vakabula ko Jiova; ko cei me'u rerevaka? A kaukauwa ni noqu bula ko Jiova; me'u taqaya e na vuku i cei?

² Ni ra sa lako vakaivalu mai vei au na tamata ca kei na noqu meca— me ra kania na lewequ, era na tarabe ga ka bale.

³ Kevaka era sa mai tuvai valu vei au na mataivalu e le vuqa, ena sega ni rere na yaloqu; kevaka sa yaco vei au nai valu, ka'u na yalodei ga me vakakina.

⁴ E dua na ka ka'u sa gadreva vei Jiova, oqori ga ka'u na segata tiko; me'u tiko e na vale i Jiova e na veisiga kecega ni noqu bula, me'u vakaraica na lagilagi i Jiova, ka vakatarotaro tiko e na nona vale-ni-soro.

⁵ Ni na vunitaki au e na nona vale e na gauna ni rarawa; ena vunitaki au e na yasana vuni e na nona valelaca; ena vakaturi au ko koya ki na dela ni vatu.

⁶ Ena qai laveti cake na uluqu me cecere cake vei ira na noqu meca era sa vakavolivoliti au; ia ka'u na vakacabora nai madrali ni marau e na nona valelaca; ka'u na sere, io, ka'u na seretaka na vakavinavinaka vei Jiova.

⁷ Ni rogoci au, Jiova, ni sa rogo na noqu tagi, ni lomani au talega, ka vosa mai vei au.

⁸ Ni kemuni a kaya, “Dou vakasaqara na mataqu,” Sa kaya vei kemuni na yaloqu, “A matamuni, i Jiova, ka'u sa vakasaqara.”

⁹ Ni kakua ni vunia na matamuni vei au. Kakua ni biuta tani na nomuni tamata e na nomuni cudru, koi kemuni ga na noqu dauniveivuke. Kakua ni vakatalai au tani, se laivi au, oi kemuni na Kalou na noqu i vakabula!

¹⁰ Ni sa laivi au na tamaqu kei na tinaqu, ia ena qai keveti au cake ko Jiova.

¹¹ Ni vakavulici au, i Jiova, e na nomuni sala, ka tuberi au e na sala dodonu e na vukudra na noqu meca.

¹² Ni kakua ni soli au ki na nodra vakatulewa na noqu meca, ni sa tucake vei au ko ira na dauveibeitaki vakailasu, kei ira era sa cavuta tiko na vakacaca.

¹³ Kevaka ka'u a sega ni vakadinata me'u raica na yalovinaka i Jiova e na vanua ni bula, ke sa qai waicala na yaloqu.

¹⁴ Mo waraki Jiova; gumatua, ena qai vakataudeitaka na yalomu ko koya; io, mo waraki Jiova ga!