NA SAME 24 - Ai Vola Tabu (Vakadewa Makawa Vakavoutaki 2021)

O Koya na Tui Cecere

A Same i Tevita.

¹ A nei Jiova ko vuravura kei na ka kecega sa sinai kina, a veivanua kei ira era sa tiko kina;

² ni sa tauyavutaka ko koya e na wasa levu, ka sa vakataudeitaka e na wai drodro.

³ Ko cei ena cabe cake ki na ulunivanua i Jiova? Se ko cei ena tu e na nona yasana tabu?

⁴ O koya sa liga savasava ka sa yalosavasava, O koya sa sega ni vagolea cake na yalona ki na ka walega, ka sa sega ni bubului vakailasu.

⁵ Ena vakalougatataki mai vei Jiova ko koya, ka na vakadonui mai vua na Kalou na nona i vakabula.

⁶ Oqo nai tabatamata sa vakasaqarai koya, era sa vakasaqara na matamuni na Kalou i Jekope. Sela

⁷ Dou laveta cake na ulumudou, koi kemudou na matamata-ni-koro! Ia dou laveti cake, koi kemudou na kenai sogo sa sega ni oti rawa! Me curu kina na Tui vakaiukuuku.

⁸ O cei oqo na Tui vakaiukuuku? Ko Jiova, sa kaukauwa ka qaqa, ko Jiova, sa gumatua e nai valu.

⁹ Dou laveta cake na ulumudou, koi kemudou na matamata-ni-koro! Io dou laveti cake, koi kemudou na kenai sogo sa sega ni oti rawa, me curu kina na Tui vakaiukuuku!

¹⁰ O cei oqo na Tui vakaiukuuku? Ko Jiova-ni-lewevuqa, o koya ga na Tui vakaiukuuku. Sela