NA SAME 21 - Ai Vola Tabu (Vakadewa Makawa Vakavoutaki 2021)

Na Vakavinavinaka ena Vuku ni Qaqa ena i Valu

Vua nai liuliu ni sere. A Same i Tevita.

¹ I Jiova, ena reki na tui e na nomuni kaukauwa; ena marau vakalevu sara ni kemuni sa ia na veivakabulai!

² O ni sa solia vua na gagadre ni yalona, o ni sa sega ni bureitaka na masumasu ni tebenigusuna. Sela

³ Kemuni sa sotavi koya e na nomuni loloma e veivakalougatataki; o ni sa vakaisalataki koya e nai sala vakaturaga sa koula dina.

⁴ Sa kere bula vei kemuni ko koya; o ni sa solia vua— na bula balavu ka sega ni mudu.

⁵ Sa laveti cake na nona totoka ni kemuni sa vakabulai koya; o ni sa solia vua na vakarokoroko kei na ka vakaturaga.

⁶ Kemuni sa vakalougatataki koya vakaidina ka sega ni mudu; o ni sa vakamarautaki koya sara e na matamuni.

⁷ Ni sa vakararavi vei Jiova ko koya na tui, ia e na vuku ni loloma i Koya sa Cecere Sara ena sega ni yavalati kina ko koya.

⁸ Ena tarai ira kecega na nomuni meca na ligamuni; ena tarai ira sa cati kemuni na ligamuni matau.

⁹ O ni na biuti ira ki na lovo sa waqawaqa sara e na gauna ni nomuni cudru; ena tilomi ira ko Jiova e na nona cudru, ena kani ira sara na bukawaqa.

¹⁰ O ni na vakarusa tani na luvedra mai vuravura, kei na nodra kawa mai vei ira na luve ni tamata.

¹¹ Ni ra sa nakita me ra vakacacani kemuni, era sa vakananuma na vere ca, a ra sa sega ni rawata.

¹² Ni kemuni na qai vakasavi ira; kemuni sa qai vakarautaka e matadra na nomuni gasau e na kena wa.

¹³ Kemuni Jiova, mo ni vakacecerei, e na nomuni qaqa! Keitou na sere kina ka vakamolimoli e na nomuni kaukauwa.