NA SAME 18 - Ai Vola Tabu (Vakadewa Makawa Vakavoutaki 2021)

Na Sere ni Vakavinavinaka e na Rawati ni Qaqa

Vua nai liuliu ni sere. A Same i Tevita na tamata nei Jiova, o koya sa cavuta vei Jiova na qaqa ni sere oqo e na siga sa vakabulai koya kina ko Jiova mai na ligadra kecega na nona meca kei na liga i Saula.

¹ I Jiova, au na lomani kemuni, na vu ni noqu kaukauwa.

² A noqu uluvatu ko Jiova, kei na noqu i drodro, kei na noqu i vakabula, a noqu Kalou, o koya na noqu kaukauwa, ka'u na vakararavi vua, a noqu i sasabai, kei na noqu kaukauwa ka'u sa vakabulai kina, kei na noqu vale ni valu cecere.

³ Au na masu vei Jiova, o koya sa dodonu me vakacaucautaki, ka'u na vakabulai kina mai vei ira na noqu meca.

⁴ Sa vesuki au nai vau ni mate; ka ra sa vakarerei au ko ira na tamata ca era vaka na waluvu;

⁵ sa voliti au nai vau ni bulubulu; sa veisaqasaqa kei au nai cori ni mate.

⁶ E na noqu rarawa ka'u sa masu vei Jiova; ka tagi vua na noqu Kalou. Sa rogoca na domoqu ko koya mai na nona vale tabu, ka sa yaco sara vua na noqu tagi, io, ki na daligana.

⁷ Sa qai yavala ko vuravura, ka sa sautaninini; sa yavavala talega na yavu ni veiulunivanua, sa yavala ni sa cudru ko koya.

⁸ Sa lako cake na kubou mai na ucuna, kei na bukawaqa mai na gusuna sa vakayavuna; sa vakacaudrevi kina na qilaiso ni buka.

⁹ Sa vakalolovirataka talega na lomalagi ko koya, ka lako sobu mai; sa tu e ruku ni yavana na butobuto loaloa.

¹⁰ A sa vodoka na Jerupi, ka sa vuka; io, sa vuka mai e na taba ni cagi.

¹¹ Sa cakava na butobuto me nona yasana vuni me voliti koya, me nona i vakaruru, io na wai butobuto kei na o loaloa ni lomalagi.

¹² Sa seavu na o loaloa e nai serau ni matana, na uca-cevata kei na qilaiso katavera.

¹³ Sa kuru talega ko Jiova mai na lomalagi, ka sa tabalaka cake na domona ko Koya sa Cecere Sara, na uca-cevata kei na qilaiso katavera!

¹⁴ Sa tala na nona gasau ko koya, ka vakubutaki ira; ka sa vanataka na livaliva, ka vakidroataki ira.

¹⁵ Sa qai rairai mai na dreke ni wai, a sa votu mai na yavu kei vuravura ni kemuni sa vunauca, Jiova, ka ni sa liwa na cagi ni nomuni cudru.

¹⁶ Sa talatala mai cake ko koya, ka tauri au; sa vueti au cake mai na wai levu.

¹⁷ Sa vakabulai au mai na noqu meca kaukauwa, mai vei ira talega era sa cati au, ni ra sa gumatua vei au.

¹⁸ Era sa veisaqasaqa kei au e na siga ni noqu rarawa; ia sa tokoni au ko Jiova.

¹⁹ Sa kauti au talega yani ko koya ki na yasana rabailevu; sa vakabulai au ko koya, ni sa vinakati au.

²⁰ Sa saumi au ko Jiova me vaka na noqu yalododonu; me vaka na kena savasava na ligaqu sa sauma vei au ko koya.

²¹ Ni'u a vakabauta na sala i Jiova, ka sega ni lesu tani vakaca mai vua na noqu Kalou.

²² Ni sa tu e mataqu na nona lewa kecega, kei na nona i lesilesi ka'u sa sega ni biuta tani vei au;

²³ Ka'u a yalododonu talega e matana, ka'u a tarovi au mai na noqu i valavala ca.

²⁴ O koya oqo sa sauma kina vei au ko Jiova na noqu i valavala dodonu, me vaka na kena savasava na ligaqu e matana.

²⁵ O ni na vakatakila na nomuni loloma vua sa dauloloma; o ni na vakatakila na nomuni yalododonu vua sa yalododonu;

²⁶ o ni na vakatakila na nomuni yalosavasava vua sa yalosavasava; o ni na vala kaya sa yaloveve.

²⁷ Kemuni na vakabulai ira na tamata sa yalomalumalumu, ia kemuni na vakabalei ira sa mata viavialevu.

²⁸ Kemuni na tutuvaka na noqu cina; ena vakararamataka na noqu butobuto ko Jiova na noqu Kalou.

²⁹ Ni sai kemuni ka'u sa cici bula kina e na kedra maliwa na mataivalu, ia sai koya na noqu Kalou ka'u sa ladeva kina na bai.

³⁰ Na Kalou oqo—sa dodonu vakaoti na nona i valavala; sa vakadinati ni dina taucoko na vosa i Jiova; sai sasabai ko koya vei ira kecega era sa vakararavi vua.

³¹ Ia ko cei tale me Kalou, ko Jiova duaduaga? Ia ko cei tale na uluvatu, na noda Kalou duaduaga?—

³² na Kalou ka sa vakaiyaragitaki au e na kaukauwa, ka vakadodonutaka na noqu i lakolako.

³³ Sa cakava na yavaqu me tautauvata kei na nodra na me kila, ka sa vakaturi au e na noqu vanua cecere.

³⁴ Sa vakavulica na ligaqu me ia nai valu, a sa musuki kina e na ligaqu na dakai kaukamea.

³⁵ O ni sa solia talega vei au nai sasabai ko ni sa vakabulai au kina, ka sa vakataudeitaki au na ligamuni matau; a sa vakalevutaki au na nomuni yalomalua.

³⁶ O ni sa vakalalagataka vei au na noqu sala, ka sa sega ni tidara kina na yavaqu.

³⁷ Au a vakasavi ira na noqu meca, ka vauci ira; au sa sega ni lesu tale mai, era sa kawaboko mada eliu.

³⁸ Au sa vakamavoataki ira, ka ra sa sega ni wavu tu rawa; era sa bale sobu e ruku ni yavaqu.

³⁹ Ni kemuni sa vauca na toloqu e na kaukauwa me ia nai valu; ko ni sa vakamalumalumutaki ira vei au era sa tucake vakaivalu vei au.

⁴⁰ O ni sa solia talega vei au na domodra na noqu meca, me'u vakarusai ira era sa cati au.

⁴¹ Era sa tagi yani, ka sa sega e dua nai vakabula; io, vei Jiova, ia sa sega ni vosa vei ira ko koya.

⁴² Ka'u sa qai vakavurumemeataki ira me ra vaka na kuvu-ni-soso e na mata ni cagi; ka'u a biuti ira tani me vaka na lolobo e na saqata.

⁴³ O ni sa vakabulai au mai na nodra veileti na tamata; o ni sa qisi au me'u liu vei ira na veimatanitu; era na qaravi au ko ira na tamata ka'u a sega ni kilai ira.

⁴⁴ Ni ra sa qai rogoci au, era na talairawarawa vei au; era na vakamalumalumutaki ira vei au ko ira na kai tani.

⁴⁵ Era na malai yani ko ira na kai tani, era na lako ninini mai na nodra tikina kaukauwa.

⁴⁶ Sa bula ko Jiova! Ia me vakacaucautaki ko koya na noqu uluvatu, me vakalevulevui na Kalou sa vakabulai au.

⁴⁷ O koya ga na Kalou sa cudruvaki au ka sa vakamalumalumutaki ira na tamata vei au;

⁴⁸ sa vakabulai au ko koya mai vei ira na noqu meca; io, ko ni sa vakaceceretaki au me'u uasivi cake vei ira era sa tucake vakaivalu vei au; o ni sa vakabulai au mai na tamata i valavala kaukauwa.

⁴⁹ O koya oqo ka'u na vakavinavinaka kina vei kemuni, Jiova, e na kedra maliwa na lewe ni veivanua, ka'u na seretaka talega na yacamuni.

⁵⁰ O koya sa vakayacora na veivakabulai levu vua na nona tui, ka sa kitaka na loloma vua sa lumuta ko koya, vei Tevita kei na nona kawa ka sega ni mudu.