NA SAME 17 - Ai Vola Tabu (Vakadewa Makawa Vakavoutaki 2021)

Na Masu e na Gauna ni Veivakacacani

A masu i Tevita.

¹ I Jiova, mo ni rogoca na kena dodonu, ni vakarorogo ki na noqu tagi; ni rogoca na noqu masu sa sega ni lako mai na tebenigusu lasulasu.

² Me lako dina mai na matamuni na lewa e na vukuqu; me vakaraica ga na matamuni na ka e dodonu.

³ O ni sa vakatovolea na yaloqu; o ni sa lako mai vei au e na bogi, ko ni a vakatovolei au sara, ia sa sega na ka ko ni na kunea; sa lomaqu ga me sega ni lako vakatani na gusuqu.

⁴ E na vuku ni nodra cakacaka na tamata, ka'u a maroroi au e na vosa ni tebenigusumuni mai na nona i valavala na dauveivakarusai.

⁵ Sa vakataudeitaki na noqu i lakolako e na nomuni sala, ka sa sega ni sikalutu na yavaqu.

⁶ Au sa tagi vei kemuni, ko ni na qai rogoci au, na Kalou; mo ni vakarorogo kivei au, io, ki na noqu vosa.

⁷ Ni vakatakila mai na nomuni loloma e veivakurabuitaki, Oi kemuni nai Vakabula vei ira sa gadreva na bula mai vei ira na nodra meca e na ligamuni matau.

⁸ Ni maroroi au me vaka na loa ni mata; vunitaki au e ruku ni yaloyalo ni tabamuni,

⁹ mai vei ira na tamata ca era sa vaqeavutaki au, mai vei ira na noqu meca era sa vakavolivoliti au me'u mate.

¹⁰ Era sa kovuni e na nodra uro; sa vosa vakaviavialevu na gusudra.

¹¹ Era sa vakavolivoliti au e na noqu i lakolako; ka sa wanonovi au ki na qele na matadra.

¹² O koya oqo sa tautauvata kei na laione sa gu me ia na veidresulaki; kei na luve ni laione sa lako lo e na yasana vuni.

¹³ I Jiova, ni tucake, ni saqati koya, ka vakabalei koya sobu! Ni vakabula na yaloqu mai na tamata ca, e na nomuni seleiwau,

¹⁴ mai vei ira na tamata—e na ligamuni, i Jiova, mai vei ira na tamata ni vuravura oqo era sa rawata na nodra i votavota e na nodra bula oqo. O ni sa vakamamautaka na ketedra e na nomuni yau vuni; sa ka levu tu na luvedra; ka ra sa tataunaka na vo ni nodra i yau me nodra na luvedra lalai.

¹⁵ Ia koi au, ka'u na raica na matamuni e na yalododonu; ka'u na qai yalo vakacegu ni'u sa yadra tale, ni'u sa vakaraici kemuni.