NA SAME 16 - Ai Vola Tabu (Vakadewa Makawa Vakavoutaki 2021)

A Masu ni Vakararavi vei Jiova

A Same i Tevita.

¹ Ni vakatawai au, noqu Kalou, ni'u sa vakararavi vei kemuni.

² Au a kaya vei Jiova, “Koi kemuni ga na noqu Turaga; na noqu vinaka sa vu ga mai vei kemuni.”

³ O ira na tamata yalosavasava era sa tiko e vuravura, era sa tamata vinaka sara, ka'u sa rekitaki ira vakalevu.

⁴ Ena levu na nodra ka rarawa ko ira era sa cicimuria na kalou tani; ka'u na sega sara ni vakacabora na nodra i madrali dra, ka'u na sega sara ni cavuta na yacadra e na tebenigusuqu.

⁵ A noqu i votavota kei na noqu bilo talega ko Jiova; oi kemuni sa vakataudeitaka na ka ka'u sa taukena.

⁶ Sa lutu nai yalayala ni noqu vanua e na yasana vinaka; io, sa votai vei au na vanua sa rairai vinaka.

⁷ Au na vakamolimoli vei Jiova, o koya sa vakavulici au; sa vakavulici au talega na yaloqu e na lomaloma ni bogi.

⁸ Au a raici Jiova ni sa tu e mataqu e na veisiga kecega; ka'u na sega ni yavalati, ni sa tu ko koya e na ligaqu i matau.

⁹ O koya sa reki kina na yaloqu, a sa marau kina na yamequ; ena vakacegu tiko talega na lewequ.

¹⁰ Ni kemuni na sega ni laiva na yaloqu me biu ki Eli, se laiva na nomu Le Dua sa Yalosavasava me raica nai bulubulu.

¹¹ Kemuni na vakatakila mai vei au na sala ni bula. Sa ka uasivi vakaidina na marau sa tu e matamuni; sa sega ni mudu na reki sa tu mai na ligamuni matau.