NA SAME 146 - Ai Vola Tabu (Vakadewa Makawa Vakavoutaki 2021)

Na Vakacaucautaki ni Veivuke ni Kalou

¹ Dou ia vei Jiova na vakavinavinaka! Mo vakavinavinaka vei Jiova, na yaloqu!

² Ni'u sa bula tiko ka'u na vakavinavinaka vei Jiova; ka'u na sere vua na noqu Kalou e na gauna kecega ka'u sa bula kina.

³ Dou kakua ni vakararavi vei ira na turaga, se vua na luve ni tamata, ni sa sega vua na ka mo dou bula kina.

⁴ Sa lako tani na nona i cegu, a sa suka ko koya ki na kena qele; e na siga dina ko ya sa oti na ka e vakanananu kina.

⁵ Sa kalougata ko koya sa nona dauniveivuke na Kalou i Jekope, o koya sa nuinui tiko vua na nona Kalou ko Jiova,

⁶ o koya ka bulia na lomalagi, kei na vuravura, na wasawasa, kei na ka kecega sa tu kina; o koya sa dinadina tikoga na nona vosa ka sega ni mudu;

⁷ o koya sa lewa vakadodonu e na vukudra era sa vakasaurarataki; o koya sa vakani ira era sa viakana. Sa sereki ira era sa vesuki ko Jiova;

⁸ sa dolava na matadra na mataboko ko Jiova; sa vakatudonutaki ira era sa vakalairoro ko Jiova; sa lomani ira na yalododonu ko Jiova.

⁹ Sa maroroi ira na vulagi ko Jiova; sa vakabulai ira tiko era sega ni vakatamani kei na yada, ia na nodra i valavala na tamata ca sa vukica sara.

¹⁰ Ena lewa tiko ko Jiova ka sega ni mudu, io na nomu Kalou, ko iko Saioni, e nai tabatamata kecega. Dou ia vei Jiova na vakavinavinaka!