NA SAME 143 - Ai Vola Tabu (Vakadewa Makawa Vakavoutaki 2021)

A Masu ni Kere Veivuke

A Same i Tevita.

¹ Ni rogoca na noqu masu, i Jiova; ka vaqara na daligamuni ki na noqu kerekere; mo ni vakarorogo vei au e na nomuni yalodina, kei na nomuni yalododonu.

² Ia mo ni kakua ni lewai au na nomuni tamata, ni na sega ni vakadonui e matamuni e dua na tamata sa bula.

³ Ni sa vakacacana na yaloqu na meca; sa buturaka sobu na noqu bula ki na soso; sa lewai au me'u tiko e na vanua butobuto, me vakataki ira era sa mate makawa.

⁴ O koya sa luvu kina na yaloqu e lomaqu; sa vakaloloma e lomaqu na yaloqu.

⁵ Au sa nanuma na gauna makawa; au sa vakanananu ki na nomuni cakacaka kecega; au sa vakanananu vakalevu ki na cakacaka ni ligamuni.

⁶ Au sa dodoka yani na ligaqu vei kemuni; sa viagunu vei kemuni na yaloqu, me vaka na vanua dravuisiga. Sela

⁷ Mo ni rogoci au vakusarawa, i Jiova; sa ciba na yaloqu. Mo ni kakua ni vunia vei au na matamuni, de'u na vakataki ira era sa lako sobu ki nai bulubulu.

⁸ Mo ni vakarogoya mai kivei au na nomuni loloma e na mataka, ni'u sa vakararavi vei kemuni. Mo ni vakatakila vei au na sala me'u lako kina, ni'u sa laveta cake na yaloqu vei kemuni.

⁹ Ni vakabulai au, i Jiova, mai vei ira na noqu meca; au sa dro vei kemuni mo ni vunitaki au.

¹⁰ Ni vakavulici au me'u cakava na nomuni lewa; ni sai kemuni na noqu Kalou. Sa yalololoma na Yalomuni, me tuberi au ko koya e na vanua dodonu.

¹¹ E na vuku ni yacamuni, i Jiova, mo ni vakabulabulataki au. E na vuku ni nomuni yalododonu mo ni kauta tani na yaloqu mai na ka rarawa.

¹² Ia e na nomuni yalololoma mo ni muduki ira laivi na noqu meca, ka vakawabokotaki ira era vakararawataka na yaloqu, ni'u sa nomuni tamata.