NA SAME 142 - Ai Vola Tabu (Vakadewa Makawa Vakavoutaki 2021)

A Masu ni Kere Veivuke e na Gauna ni Veivakacacani

A Masikili i Tevita. A masu ni sa tiko e loma ni qara vatu.

¹ Au a tagi vei Jiova e na domoqu; ia e na domoqu ka'u a vakamamasu vei Jiova.

² Au a sova e matana na noqu tagi; au a vakatakila e matana na noqu rarawa.

³ Ni sa luvu e lomaqu na yaloqu, ko ni a kila na noqu i lakolako. E na sala ka'u a lako kina era vunia kina nai cori vei au.

⁴ Au a rai ki ligaqu i matau, ka raica— ka sa sega na tamata e via kilai au; sa yali vei au nai drodro; sa sega na tamata e kauwaitaki au.

⁵ Ka'u a tagi vei kemuni, i Jiova; au a kaya, “Sai kemuni na noqu i drodro, na noqu i votavota e na vanua ni bula.”

⁶ Mo ni vakarogoca na noqu tagi, ni'u sa vakamalumalumutaki sara. Vakabulai au mai vei ira era sa vakacacani au, ni ra sa gumatua vei au.

⁷ Ni kauti au tani mai na valeniveivesu, me'u rawa kina ni vakavinavinakataka na yacamuni! Era na vakavoliti au na yalododonu, ni kemuni na cakacaka vakayalololoma vei au.