NA SAME 140 - Ai Vola Tabu (Vakadewa Makawa Vakavoutaki 2021)

A Masu ni Kerekere e na Gauna ni Veivakacacani

Vua nai liuliu ni sere. A Same i Tevita.

¹ Mo ni vakabulai au, Jiova, mai na tamata ca; mo ni maroroi au mai na tamata i valavala kaukauwa.

² Era sa nanuma ca tiko e lomadra; era dausoqoni vata me ia nai valu.

³ Era sa vagatara na yamedra me vaka na gata; na weli gaga ni gata daukata sa tiko e na tebenigusudra. Sela

⁴ Mo ni maroroi au, i Jiova, mai na liga ni valavala ca; mo ni vakabulai au mai vua na tamata i tovo kaukauwa; o koya sa via vukica na noqu i lakolako.

⁵ O ira na viavialevu era sa birika lo na dai me rawai au, kei na dali era sa tevuka na lawa, e na bati ni sala era sa birika na dai me rawai au. Sela

⁶ Au a kaya vei Jiova, Oi kemuni na noqu Kalou; mo ni vakatu daligamuni Jiova, ki na domo ni noqu masu.

⁷ I Jiova, na Turaga, na kaukauwa ka'u sa bula kina, ko ni a vakaruruga na uluqu e na siga ni valu.

⁸ Kakua ni solia, i Jiova, na ka era gadreva nai valavala ca; kakua ni vakayacora na nona vere ca; de ra vakalevulevui ira kina. Sela

⁹ Ia ko ira sa liu vei ira era sa vakalati au, me ubi ira na ca e vosataka na tebenigusudra!

¹⁰ Me lutuki ira na qilaiso sa waqa tu! Me ra na biu ki na bukawaqa, ki nai keli titobu, me ra kakua ni cabe cake tale!

¹¹ Me kakua ni tiko dei e vuravura na tamata dauvosalevu; ka me na vakasavi koya ga na ka ca me mani rusa kina na tamata loma kaukauwa!

¹² Au sa kila ni na lewa vakadodonu ko Jiova e na vukuna sa vakararawataki, e na vukuna talega na dravudravua.

¹³ Sa dina era na vakavinavinaka ki na yacamuni ko ira na yalododonu; ena tiko ga e matamuni ko ira nai valavala dodonu.