NA SAME 136 - Ai Vola Tabu (Vakadewa Makawa Vakavoutaki 2021)

Na Cakacaka ni Kalou me Vakavinavinakataki

¹ Dou ia na vakavinavinaka vei Jiova, ni sa yalovinaka ko koya, ni sa sega ni mudu na nona loloma.

² Dou ia na vakavinavinaka vua na nodra Kalou na kalou, ni sa sega ni mudu na nona loloma.

³ Dou ia na vakavinavinaka vua na nodra Turaga na turaga, ni sa sega ni mudu na nona loloma.

⁴ Vua sa kitaka na cakacaka mana levu duaduaga, ni sa sega ni mudu na nona loloma.

⁵ Vua sa bulia na lomalagi e na nona vuku, ni sa sega ni mudu na nona loloma;

⁶ vua ka tevuka na vanua e na dela ni wai, ni sa sega ni mudu na nona loloma.

⁷ Vua sa cakava na rarama lelevu, ni sa sega ni mudu na nona loloma;

⁸ na mata-ni-siga me lewa e na siga, ni sa sega ni mudu na nona loloma;

⁹ na vula kei na veikalokalo me lewa e na bogi, ni sa sega ni mudu na nona loloma.

¹⁰ Vua ka vakacacani Ijipita ni sa vakamatea na nodra ulumatua, ni sa sega ni mudu na nona loloma.

¹¹ A sa kauti ira tani na Isireli mai vei ira, ni sa sega ni mudu na nona loloma;

¹² e na liga kaukauwa kei na liga sa dodo yani, ni sa sega ni mudu na nona loloma.

¹³ Vua ka wasea rua na Wasa Damudamu, ni sa sega ni mudu na nona loloma;

¹⁴ ka sa vakauti ira na Isireli me ra lako e loma, ni sa sega ni mudu na nona loloma;

¹⁵ a sa biuti Fero kei na nona mataivalu e na Wasa Damudamu, ni sa sega ni mudu na nona loloma.

¹⁶ Vua ka kauti ira voli na nona tamata e loma ni vanua lala, ni sa sega ni mudu na nona loloma.

¹⁷ Vua ka vakamatei ira na tui lelevu, ni sa sega ni mudu na nona loloma;

¹⁸ ka vakamatei ira na tui sa rogo, ni sa sega ni mudu na nona loloma;

¹⁹ o Sioni na nodra tui na Amoraiti, ni sa sega ni mudu na nona loloma;

²⁰ kei Oki na tui Pasani, ni sa sega ni mudu na nona loloma.

²¹ Sa solia na nodra vanua mei votavota, ni sa sega ni mudu na nona loloma;

²² me nodra i votavota na nona tamata na Isireli, ni sa sega ni mudu na nona loloma.

²³ O koya ka nanumi keda ni da a vakaloloma, ni sa sega ni mudu na nona loloma;

²⁴ sa vakabulai keda mai vei ira na noda meca, ni sa sega ni mudu na nona loloma.

²⁵ O koya sa solia na kedra na ka bula kecega, ni sa sega ni mudu na nona loloma.

²⁶ Dou ia na vakavinavinaka vua na Kalou kei lomalagi, ni sa sega ni mudu na nona loloma.