NA SAME 132 - Ai Vola Tabu (Vakadewa Makawa Vakavoutaki 2021)

Nai Tikotiko Tudei ni Kalou mai Saioni

A Sere ni cabecabe.

¹ I Jiova, mo ni nanuma e na vuku i Tevita na nona rarawa kecega;

² ni sa bubului vei Jiova ko koya, ka ia na veiyalayalati kei Koya na Kaukauwa i Jekope, ka kaya,

³ “Au na sega mada ni curu ki na valelaca ka'u sa tiko kina, se cabe ki na noqu i mocemoce.

⁴ Au na sega ni solia na mataqu me'u moce, se na dakudaku-ni-mataqu me sosovu,

⁵ me yacova ni'u sa kunea mada eliu e dua na yasana me nei Jiova, io e dua nai tikotiko me nei Koya na Kaukauwa i Jekope.”

⁶ Raica, eda a rogoca ni sa tiko mai Efiraca; eda a kunea e na dua na were mai veikau.

⁷ “Me da mai lako ki na nona vale; me da cuva e na vakarokoroko e nai tutu-ni-yavana!”

⁸ Mo ni cabe cake, Jiova, ki na nomuni vakavakacegu; oi kemuni kei na kato ni nomuni kaukauwa.

⁹ Me ra vakaisulu e na yalododonu ko ira na nomuni bete; ka kaikaila e na reki ko ira na nomuni tamata yalosavasava.

¹⁰ E na vukuna na nomuni tamata ko Tevita; me kakua ni gole tani na matamuni mai vua ko ni a lumuta.

¹¹ Sa bubului vakaidina ko Jiova vei Tevita ka na sega ni lesu tani mai kina: “E dua vei ira na luvemu tagane ka'u na vakatikora e na nomu i tikotiko vakatui.

¹² Kevaka era na maroroya na noqu veiyalayalati ko ira na luvemu, kei na noqu vunau ka'u na vakatavulica vei ira, ena vakatikori talega ko ira na luvedra me sega ni mudu e na nomu i tikotiko vakaturaga.”

¹³ Ni sa digitaki Saioni ko Jiova; sa vinakata ko koya me nona i tikotiko:

¹⁴ “Oqo na noqu i vakavakacegu ka sega ni mudu; au na tiko ga eke, ni'u sa vinakata.

¹⁵ Au na vakalougatataka vakalevu na kena kakana; au na vakamamautaki ira na nona dravudravua e na madrai.

¹⁶ Au na vakaisulutaki ira talega na nona bete e na bula, era na kaikaila talega e na reki na nona tamata yalosavasava.

¹⁷ Au na cakava me kubu mai kina nai leu i Tevita; au sa vakarautaka na cina me nei koya ka'u sa lumuta.

¹⁸ Au na vakaisulutaki ira na nona meca e na madua, ia ena serau tu e na uluna na nona i sala.”