NA SAME 12 - Ai Vola Tabu (Vakadewa Makawa Vakavoutaki 2021)

A Masu ni Kere Veivuke

Vua nai liuliu ni sere: me baleta na Seminica. A Same i Tevita.

¹ I Jiova, mo ni ia na veivakabulai, ni sa oti na tamata lotu dina; sa yali ko ira sa lomadina mai vei ira na luve ni tamata.

² Era sa cavuta tiko ko ira yadua na ka lasu vua na nona i tokani; era sa vosa vakaveicavilaki tiko ka ra dauveivakaisini.

³ Ena seledrutia ko Jiova na tebenigusudra na dauveicavilaki, kei na yamedra na dauvosa vakaviavialevu,

⁴ o ira era sa kaya, “Keitou na gumatua e na yame i keitou; sa neitou ga na tebenigusu i keitou—o koya na neitou turaga?”

⁵ “Ni ra sa vakararawataki na tamata malumalumu, ka ni ra sa vutugu tiko na tamata dravudravua, Au na qai tucake,” sa kaya ko Jiova; “Au na vakabulai ira yadua mai vei koya sa dauvakalialiai ira.”

⁶ A vosa savasava na vosa i Jiova, me vaka na siliva sa vakatovolei e na kuro qele, sa vakasavasavataki vakavitu.

⁷ I Jiova, ko ni na maroroi ira, kemuni na maroroi ira e nai tabatamata oqo ka sega ni mudu.

⁸ Era sa daulako voli e na veiyasana kecega na tamata ca, ni ra sa vakalevulevui na tamata velavela sara.