NA SAME 118 - Ai Vola Tabu (Vakadewa Makawa Vakavoutaki 2021)

A Sere ni Qaqa

¹ Dou vakavinavinaka vei Jiova, ni sa yalovinaka ko koya; ni sa sega ni mudu na nona loloma!

² Me kaya ko ira na Isireli, “Ni sa sega ni mudu na nona loloma.”

³ Me kaya na vale i Eroni, “Ni sa sega ni mudu na nona loloma.”

⁴ Me ra kaya ko ira era rerevaki Jiova, “Ni sa sega ni mudu na nona loloma.”

⁵ Au a masuti Jiova ni ka'u a rarawa; a sa rogoci au ko Jiova, ka sa vakalalagataki au.

⁶ Sa totaki au ko Jiova; ka'u na sega ni rere. A cava beka me ra kitaka vei au ko ira na tamata?

⁷ Sa totaki au ko Jiova kei ira era vukei au; o koya ka'u na raica ni ra ca ko ira era sa cati au.

⁸ Sa vinaka na vakararavi vei Jiova ka ca na vakararavi vei ira na tamata.

⁹ Sa vinaka na vakararavi vei Jiova ka ca na vakararavi vei ira na turaga.

¹⁰ Era sa vakavolivoliti au na lewe ni veivanua; ia e na yaca i Jiova ka'u na vakarusai ira!

¹¹ Era vakavolivoliti au; io era sa voliti au; ia e na yaca i Jiova ka'u na vakarusai ira!

¹² Era sa vakavolivoliti au me vaka na qele ni pi; era sa bokoci me vaka na buka dolou; ia e na yaca i Jiova ka'u na vakarusai ira!

¹³ Au a biliraki vakaukauwa ka me'u bale kina, ia sa vukei au ko Jiova.

¹⁴ Sa noqu kaukauwa kei na vu ni noqu sere ko Jiova; ka sa yaco me noqu i vakabula.

¹⁵ A domo ni reki kei na veivakabulai sa tiko e nodra veivale na yalododonu; “Sa gumatua na liga i matau i Jiova;

¹⁶ na liga i matau i Jiova sa cecere; na liga i matau i Jiova sa gumatua!”

¹⁷ Au na sega ni mate, ia au na bula ga, ka tukuna tiko na cakacaka i Jiova.

¹⁸ Sa vakanakuitataki au vakalevu ko Jiova, ia sa sega ni laivi au me'u mate.

¹⁹ Dou dolava vei au na matamata-ni-koro ni yalododonu, me'u na curu kina, ka ia na vakavinavinaka vei Jiova.

²⁰ Oqo na matamata-ni-koro i Jiova; era na daucuru kina na yalododonu.

²¹ Au na vakavinavinaka vei kemuni ni kemuni a vakarorogo vei au, ka sa yaco me noqu i vakabula.

²² A vatu era sa cata ko ira na matai ni vale sa yaco me kenai vakadei e na tutu ni vale.

²³ Oqo na cakacaka i Jiova; a sa ka e veivakurabuitaki e na matada.

²⁴ Oqo na siga sa lesia ko Jiova; eda na reki ka marau kina.

²⁵ Au masuti kemuni Jiova, mo ni ia na veivakabulai! Au masuti kemuni Jiova, mo ni ia na veivakalougatataki!

²⁶ Sa kalougata ko koya sa lako mai e na yaca i Jiova; Keimami sa vakalougatataki kemudou mai na vale i Jiova.

²⁷ Sa Kalou ko Jiova, o koya sa vakararamataki keda. Dou vauca nai soro e na dali ki na tutuna balavu cake ni cabocabo-ni-soro.

²⁸ Sai kemuni na noqu Kalou, ka'u na vakavinavinaka vei kemuni; Sai kemuni na noqu Kalou, ka'u na vakacaucautaki kemuni.

²⁹ Dou ia na vakavinavinaka vei Jiova; ni sa yalovinaka ko koya, ni sa sega ni mudu na nona loloma.