NA SAME 108 - Ai Vola Tabu (Vakadewa Makawa Vakavoutaki 2021)

A Masu ni Kere Veivuke

A Sere. A Same i Tevita.

¹ Kemuni na Kalou, sa dei na yaloqu; au na sere ka vakavinavinaka, ia ka'u na vakaiukuukutaka.

² Drau yadra mai, na soliteri kei na api! Ia koi au ka'u na souta e na mataka.

³ Au na vakavinavinaka vei kemuni Jiova, e na kedra maliwa na veimatanitu, au na sere vei kemuni e na kedra maliwa na veimatatamata.

⁴ Ni sa sivia na lomalagi na cecere ni nomuni loloma tudei, ka sa yacova na dela ni o na nomuni yalodina.

⁵ Mo ni cecere, na Kalou, ka me lolovira ko lomalagi, ka me roboti vuravura taucoko na nomuni lagilagi.

⁶ Me vakabulai kina ko koya ko ni sa lomana, mo ni vakabulai au e na ligamuni matau, ka rogoci au.

⁷ Sa yalataka oti na Kalou e na nona yalosavasava: “Au na wasewasei Sikemi e na reki ka vakarautaka na buca mai Sukoci.

⁸ Sa noqu ko Kiliati; sa noqu ko Manasa; ai vakaruru ni uluqu ko Ifereimi; a noqu tamata daulewa ko Juta.

⁹ A noqu i vuivui ko Moapi; ka'u na viritaka ki Itomi na noqu i vava; ka'u na kaila e na qaqa vei Filisitia.”

¹⁰ O cei ena kauti au ki na koro kaukauwa? O cei ena tuberi au ki Itomi?

¹¹ Oi kemuni na Kalou, se segai, oi kemuni ka sa biuti keimami? Ia koi kemuni na Kalou, ko ni sa sega ni lako vata kei na neimami valu?

¹² Mo ni vukei keimami mai na ka rarawa, ni sa sega ni yaga na nodra veivuke na tamata.

¹³ E na vuku ni Kalou eda na gugumatua; ni sai koya ga ena buturaka sobu na noda meca.