NA SAME 103 - Ai Vola Tabu (Vakadewa Makawa Vakavoutaki 2021)

Na Vakavinavinaka vua na Kalou ni sa Veivakabulai

A nei Tevita.

¹ Mo vakavinavinaka vei Jiova, na yaloqu; io na ka kecega sa tu e lomaqu me vakavinavinaka ki na yacana tabu.

² Mo vakavinavinaka vei Jiova, na yaloqu, ka kakua ni guilecava na nona ka ni loloma kecega—

³ o koya ka sa vosota na nomu i valavala ca kecega, o koya ka sa vakabulai iko mai na kemu mate kecega;

⁴ o koya ka sa vakabulai iko mai na rusa, o koya ka sa vakaisalataki iko e na ka ni loloma kei nai valavala vakayalololoma sara,

⁵ o koya ka sa vakamamautaka na gusumu e na ka vinaka; sa vakavoutaki kina na nomu cauravou me vaka na nona na ikeli.

⁶ Sa kitaka ko Jiova na ka dodonu kei na lewa vinaka, e na vukudra kecega era sa vakasaurarataki.

⁷ Sa vakatakila ko koya na nona i valavala vei Mosese, kei na nona cakacaka vei ira na Isireli.

⁸ Sa yalololoma ko Jiova ka daulomasoli, sa dauberabera ni cudru, ka dau levu na nona yalololoma.

⁹ Ena sega ni ia tikoga na veivunauci, ena sega ni cudru tiko ka tawa mudu.

¹⁰ Sa sega ni lewa vei keda me vaka na noda i valavala ca; ka sega talega ni cudruvi keda me vaka na noda caka ca.

¹¹ Me vaka na kena cecere ki vuravura ko lomalagi, sa vakakina na kena levu ni nona yalololoma vei ira era sa rerevaki koya.

¹² Me vaka na kena yawa na vanua e cadra kina na siga ki na vanua sa dromu kina na siga, sa vakayawataka vakakina vei keda ko koya na noda i valavala ca.

¹³ Me vaka sa lomana na luvena e dua na tamata, sa lomani ira vakakina ko Jiova era sa rerevaki koya.

¹⁴ Ni sa kila ko koya na noda i bulibuli; sa nanuma ga ni da sa kuvu-ni-soso.

¹⁵ Ia na tamata, sa vaka ga na co na nona siga; me vaka na senikau ni vanua, sa se ka beta vakakina ko koya.

¹⁶ Ni sa liwava na cagi, ka sa yali sara; ka sa sega ni kunea tale na tikina ka tu kina.

¹⁷ Ia na yalololoma i Jiova sa sega ni tubu ka sega ni mudu vei ira era sa rerevaki koya, kei na nona i valavala dodonu kivei ira na luvedra kei na makubudra,

¹⁸ vei ira era sa vakabauta na nona veiyalayalati kei ira era sa nanuma tiko na nona i vakaro me ra cakava.

¹⁹ Sa vakataudeitaka ko Jiova na nona i tikotiko vakaturaga mai lomalagi; ka sa lewa na ka kecega na nona matanitu.

²⁰ Dou vakavinavinaka vei Jiova koi kemudou na nona agilosi, sa uasivi e na kaukauwa ka sa cakava na nona i vakaro, ni dou sa vakarorogo tiko ki na nona vosa.

²¹ Dou vakavinavinaka vei Jiova, koi kemudou na nona ka lewe vuqa, oi kemudou na nona i talatala, ka kitaka tiko na ka sa vinaka vua.

²² Dou vakavinavinaka vei Jiova, ki na nona cakacaka kecega, e na veiyasana kecega sa lewa kina ko koya. Mo vakavinavinaka vei Jiova, na yaloqu.