NA SAME 102 - Ai Vola Tabu (Vakadewa Makawa Vakavoutaki 2021)

A Masu ni Kere Veivuke vua na Tui ni Sautu

A masu ni tamata ni sa rarawa, ni sa luluvu na lomana, ka sa tukuna yani na ka e rarawa kina ena mata i Jiova.

¹ Kemuni Jiova mo ni rogoca na noqu masu, io me yaco vei kemuni na noqu tagi.

² Kakua ni vunia vei au na matamuni e na siga ka'u sa rarawa kina. Mo ni vakatu daligamuni mai vei au; e na siga ka'u sa tagi kina mo ni rogoci au vakasauri kina.

³ Ni sa oti wale na noqu siga me vaka na kubou, ka sa waqa na suiqu me vaka na qilaiso.

⁴ Sa vakacataki na lomaqu ka sa malai me vaka na co; ni'u sa guilecava ni kania na qau kakana.

⁵ E na vuku ni domo ni noqu vutugu sa veikabi vata na suiqu kei na kuliqu.

⁶ Au sa vaka na belo ni vanua lala, au sa vaka na lulu ni vanua dravuisiga.

⁷ Au sa vakatawa; ka sa vaka na separo ni sa tiko duaduaga mai na dela ni vale.

⁸ Era sa vakasewasewani au ko ira na noqu meca e na siga ka bogi; ka ra sa bubului ka cavuti au ko ira era sa cudru vei au.

⁹ Ka'u a kania kina na dravusa me vaka sa madrai, ka veiwakitaka na mequ wai kei na wai ni mataqu,

¹⁰ ni ko ni sa levaci au ka cudruvi au; ni ko ni a laveti au cake, ka biuti au sobu.

¹¹ A noqu veisiga sa vaka na yaloyalo ni sa lumaluma na siga; io ka'u sa malai me vaka na co.

¹² Ia koi kemuni Jiova, ena sega ni mudu na nomuni bula; kei na ka mo ni nanumi kina ena yacova nai tabatamata kecega.

¹³ O ni na tucake, o ni na yalololoma ki Saioni, ni sa yaco na gauna me lomani kina ko koya, io, na gauna ka lokuci sa qai yaco.

¹⁴ Ni ra sa rekitaka na kena veivatu na nomuni tamata, ka ra lomana na kena kuvu-ni-soso.

¹⁵ Era na rerevaka kina na yaca i Jiova na veimatanitu, kei na nomuni ukuuku ko ira kecega na tui kei vuravura.

¹⁶ Ni sa qai tara ko Jiova na koro ko Saioni, ena qai rairai mai e na nona i ukuuku;

¹⁷ Ena goleva na nodra masu na luveniyali, ka na sega ni beca na nodra masu.

¹⁸ Ena volai oqo me ra kila ko ira nai tabatamata mai muri; ka ra na vakavinavinaka vei Jiova ko ira na tamata era na buli mai muri;

¹⁹ ni sa rai sobu ko koya mai na nona yasana tabu sa cecere, sa raici vuravura ko Jiova mai lomalagi,

²⁰ me vakarorogo ki na nona vutugu ko koya sa vesuki, me sereki ira era lewai me ra mate;

²¹ me tukuni mai Saioni na yaca i Jiova, kei na nona vinaka mai Jerusalemi,

²² ni ra sa qai soqoni vata ko ira na veimataqali, kei na veimatanitu, me ra qaravi Jiova.

²³ Sa vakamalumalumutaka na noqu kaukauwa e na gaunisala; sa vakalekalekataka na noqu siga ni bula.

²⁴ Ka'u a kaya, “Kemuni na noqu Kalou, mo ni kakua ni kauti au tani e na veimama ni noqu bula, a nomuni veiyabaki sa yacova nai tabatamata kecega!”

²⁵ Mai liu sara ko ni a tauyavutaki vuravura, io na cakacaka ni ligamuni ko lomalagi.

²⁶ Ena rusa oqori, ia koi kemuni ko ni na tiko ga; ena madra kece talega mai oqori me vaka nai sulu. O ni na vakaisosomitaka me vaka nai tutuvi, ia era na vakaisosomitaki;

²⁷ ia koi kemuni sai kemuni tikoga, ena sega ni bau mudu na nomuni veiyabaki.

²⁸ Era na tiko na luvedra na nomuni tamata, ena vakataudeitaki talega e matamuni na nodra kawa.