NA SAME 10 - Ai Vola Tabu (Vakadewa Makawa Vakavoutaki 2021)

Na Masu ni Veivakagalalataki mai na Meca ל Lameta

ל Lameta

¹ I Jiova, ko ni sa tu vakayawa e na vuku ni cava? Ko ni sa vunitaki kemuni e na veisiga ni rarawa e na vuku ni cava?

² Ni sa viavialevu na tamata ca sa vakacacani koya sa dravudravua— me ra na qai coko tale e na vere era sa bukia.

(מ Memi)

(מ Memi)

³ Sa dokai koya na tamata ca e na vuku ni gagadre ni yalona, ka sa doka na daukocokoco, ia sa beci Jiova.

(נ Nuni)

(נ Nuni)

⁴ E na mata viavialevu era sa kaya kina na tamata ca, “Sa sega ni via vakasaqara na Kalou”; sa tu ga e na nodra vakanananu oqo, “Ni sa sega na Kalou.”

⁵ A ka ni dauveivakararawataki na nona i valavala e na veisiga kecega; na nomuni lewa sa yawasivita cake na ka sa raica na matana; ia na nona meca kece, sa vakasiusiutaka ko koya.

⁶ Sa kaya e lomana, “Ka'u na sega sara ni vakayavalati; ka'u na sega ni kunea na rarawa mai nai tabatamata e dua ka yacova nai tabatamata kadua.”

(ס Sameki) פ Pe

פ Pe

⁷ Sa sinai na gusuna e na ruru kei na dauveivakaisini kei na lasu; sa tu e ruku ni yamena na ca kei na veivakacacani.

⁸ Sa wawa vakavuni koto e na veikoro lalai; e na yasana vuni sa labati ira era sa sega ni cala. Sa vakaraici ira lo na matana me vakacacana na malumalumu;

ע Ayini

ע Ayini

⁹ Sa tiko vakailawaki e na yasana vuni me vaka na laione e na nona qara; sa lawakitaki ira na malumalumu me vauci ira; Sa vauca dina na malumalumu ni sa coriti koya e na nona lawa.

(צ Sade)

(צ Sade)

¹⁰ Sa qai vakanovonovo ko koya ka sa cuva, me bale e na nona kaukauwa na tamata malumalumu.

¹¹ Sa kaya e lomana, “Sa guilecava ko koya na Kalou, sa vunia na matana, ena sega sara ni raica.”

ק Kofa

ק Kofa

¹² I Jiova, mo ni tucake; ni dodoka yani na ligamuni, na Kalou; ni kakua ni guilecavi ira era sa vakararawataki.

¹³ A cava sa beci koya kina na Kalou na tamata ca, ka sa kaya e lomana, “Ko ni na sega ni taroga”?

ר Resi

ר Resi

¹⁴ Ia ko ni sa raica! Ko ni sa kunea na vakacaca kei na lomaca, ka tu vakarau mo ni dodo liga kina; sa laivi koya vei kemuni na malumalumu; ni ko ni sa dauvukei koya na luveniyali.

ש Shini

ש Shini

¹⁵ Musuka na tabana na tamata lomaca ka i valavala ca; mo ni vakasaqara na nona ca me sa sega tale ni kune rawa.

¹⁶ A Tui ko Jiova ka sega ni mudu; sa kawaboko mai na nona vanua na lewe ni veimatanitu.

ת Tau

ת Tau

¹⁷ I Jiova, ko ni a rogoca na nodra gagadre na yalomalumalumu; kemuni na vakataudeitaka na yalodra, ko ni na vakatudaliga me rogoca,

¹⁸ me lewa na luveniyali kei koya sa vakararawataki, me ra kakua tale ni ia na veivakasaurarataki ko ira na turaga kei vuravura.