Marika 1 - Ai Vola Tabu (Vakadewa Makawa Vakavoutaki 2021)

Ai Tukutuku kei Joni na Dauveipapitaisotaki

¹ Ai vakatekivu ni tukutuku-vinaka kei Jisu Karisito, na Luve ni Kalou.

² Me vaka sa vola na parofita, “Raica, au sa tala na noqu talai me liu e matamu, ena caramaka ko koya na nona sala e matamu;

³ a domo ni dua sa kacikaci e loma ni vanua lala: ‘Dou caramaka na sala i Jiova, cakava me dodonu na nona veisalatu.’ ”

⁴ Sa basika ko Joni e na loma ni vanua lala, ka vakarota na nodra papitaiso era veivutuni me vosoti kina nai valavala ca.

⁵ A sa lako yani vua na lewe-ni-vanua taucoko ko Jutia, kei ira na kai Jerusalemi, a sa papitaisotaki ira kecega ko koya e na uciwai ko Joritani, ni ra sa vakatusa na nodra i valavala ca.

⁶ A sa vakaisulu ko Joni e nai sulu vuti ni kameli, ka sai vau ni tolona na wa kuli-ni-manumanu, ia sa kena kakana voli na vodre kei na oni ni veikau.

⁷ A sa dauvunau, ka kaya, “E dua sa muri au mai sa levu cake vei keirau, ia na wa ni nona i vava ka'u sa sega ni yaga me'u cuva sobu me'u sereka.

⁸ E dina ka'u sa papitaisotaki kemudou e na wai, ia ena papitaisotaki kemudou ko koya e na Yalo Tabu.”

Na Papitaisotaki kei na Veretaki i Jisu

⁹ A sa yaco e na gauna ko ya, sa lako mai Nasareci e Kalili ko Jisu, a sa papitaisotaka ko Joni e na Joritani.

¹⁰ Ia ni sa cabe sara ko koya mai na wai, sa qai raici lomalagi ni sa wase rua, kei na Yalo Tabu ni sa lako sobu vua me vaka na ruve.

¹¹ A sa rogo mai lomalagi e dua na vosa, “O iko na noqu Gone ni toko, au sa dauvinakati iko vakalevu.”

¹² A sa vakauti koya vakasauri na Yalo Tabu ki na vanua lala.

¹³ A sa tiko e na vanua lala ka bogi vasagavulu, a sa dauveretaki koya ko Setani; a sa tiko vata kei na manumanu kila, a sa qaravi koya ko ira na agilosi.

Sa Tekivu Vunau ko Jisu e Kalili

¹⁴ Ia ni sa biu ki na valeniveivesu ko Joni, sa lako mai ki Kalili ko Jisu, a sa dauvunautaka nai tukutuku vinaka ni matanitu ni Kalou,

¹⁵ ka kaya, “Sa qai yaco na gauna, a sa voleka na matanitu ni Kalou; dou veivutuni, ka vakabauta nai tukutuku-vinaka.”

Sa Kaciva e Va na Gonedau ko Jisu

¹⁶ A sa lako voli ko koya e na baravi mai Kalili, ka sa raici Saimoni kei Adriu na tacina, erau sa viritaka na lawa ki wai—ni rau sa gonedau.

¹⁷ A sa kaya vei rau ko Jisu, “Drau muri au mai, ka'u na qisi kemudrau mo drau yaco me gonedau ni tamata.”

¹⁸ A rau sa biuta sara na nodrau lawa, ka muri koya.

¹⁹ Ia ni sa lako vakalailai ki liu ko koya, sa raici Jemesa na luve i Sepete, kei Joni na tacina, erau sa tiko mai waqa ka oneva na lawa.

²⁰ A sa kacivi rau sara ko koya; a rau sa biuta na tamadrau ko Sepete e na waqa kei iratou na tamata, ka muri koya.

Na Tamata Curumi Yalo Velavela

²¹ A ratou sa lako ki Kapenaumi, ia e na Siga ni Vakacecegu sa curu sara ko koya ki na valenilotu, ka vakatavuvuli.

²² A ra sa kurabui e na nona i vakavuvuli; ni sa vakatavulici ira me vaka e dua sa tu vua na lewa, ka sega ni vakataki ira na vunivola.

²³ A sa tiko e na nodra valenilotu e dua na tamata ka curumi koya e dua na yalo velavela, a sa qoqolou,

²⁴ ka kaya, “Ule! A cava vei kedatou, i Jisu na kai Nasareci? Ko sa lako beka mai me rawai keitou? Au sa kilai iko, na nona Le Dua Yalosavasava na Kalou.”

²⁵ A sa vunauci koya ko Jisu, ka kaya, “Mo galu ga, ka lako tani mai vua.”

²⁶ Ia ni sa bitalaki koya na yalo velavela, ka qoqolou e na domo levu, sa qai lako tani mai vua.

²⁷ A ra sa kurabui kecega, ka veitarogi kina vakai ira, ka kaya, “Na cava beka oqo? Ai vakavuvuli vou beka—kei na lewa! Ka ni sa vakarota ko koya na yalo velavela, ka ra sa talai rawarawa ki vua.”

²⁸ A yaco kina me rogovaki sara na kenai rogorogo ki na veiyasana kecega sa vakavolivoliti Kalili.

Sa Vakabulai Ira na Lewe Vuqa ko Jisu

²⁹ Ia ni ratou sa lako tani e na valenilotu, eratou sa curu sara ki na vale i Saimoni kei Adriu, ko iratou kei Jemesa kei Joni.

³⁰ A sa davo na tina ni wati Saimoni ni sa tauvi-katakata, a ra sa tukuni koya sara vua.

³¹ A sa lako vua ko koya ka taura na ligana, ka vakaduria cake. A sa takali vakasauri na nona katakata, a sa qaravi iratou ko koya.

³² Ia ni sa yakavi mai, ni sa dromu na siga, sa kau mai vei koya ko ira kecega sa tauvi-mate, kei ira ka curumi ira na tevoro eso.

³³ A ra sa soqoni vata kecega na lewe ni koro e mata ni katuba.

³⁴ A sa vakabula ko koya na lewe levu sa duidui na mate sa tauvi ira, ka vakasevi ira na tevoro e lewe levu, a sa sega ni laivi ira na tevoro me ra vosa, ni ra sa kilai koya.

Sa Vunau ko Jisu ena Veivalenilotu

³⁵ Ia ni sa mataka caca sa cavu tu ko koya, a sa lako ki tautuba, ka lako ki na dua na yasana lala, ka masu kina.

³⁶ A ratou sa muri koya ko Saimoni, kei iratou eratou sa tiko vata kaya.

³⁷ Ni ratou sa qai kunea, eratou sa kaya vua, “Sa vakasaqarai kemuni na tamata kecega.”

³⁸ A sa kaya vei iratou, “Tou lako ki na veikoro sa voleka, me'u vunau talega kina, sa ka ga oqo ka'u sa lako mai kina.”

³⁹ A sa dauvunau ko koya e na nodra veivalenilotu mai Kalili taucoko, ka vakasevi ira tani na tevoro.

Sa Vakabula e Dua na Vukavuka ko Jisu

⁴⁰ A sa lako mai vei koya e dua na vukavuka, ka vakamasuta, ka tekiduru, ka kaya vua, “Kevaka ko ni sa vinakata, sa rawa mo ni vakasavasavataki au mada.”

⁴¹ A sa yalololoma ko Jisu, ka dodoka na ligana, ka tarai koya, ka kaya vua, “Au sa vinakata; mo savasava mai.”

⁴² Ia ni sa vosa oti, sa takali vakasauri vua na vukavuka, a sa savasava mai.

⁴³ A sa vakaroti koya matua ko Jisu, ka vakatala sara yani,

⁴⁴ ka sa kaya vua, “Raica, mo kakua ni tukuna vua e dua, ia mo laki vakaraitaki iko vua na bete, ka vakacabora na ka sa vakarota ko Mosese me nomu i vakasavasavataki, mei vakadinadina vei ira.”

⁴⁵ A sa lako yani ko koya, ka vakatekivu me tukuna vakalevu, me vakateteya nai tukutuku, ka sa dredre kina vei Jisu me curu votu ki na koro, ia sa tiko ga e nai bili e na veiyasana lala, ka ra sa lako mai na tamata mai na veiyasana kecega kivei koya.