Malakai 4 - Ai Vola Tabu (Vakadewa Makawa Vakavoutaki 2021)Na Siga i Jiova e Levu ka Rerevaki 1 “Ia raica, sa lako mai na siga ko ya, ena waqa me vaka na lovo; ia ko ira kece era viavialevu, kei ira kece sa caka ca, era na vaka na vu-ni-sila. Ia ena vakamai ira na siga ko ya sa lako mai, sa kaya ko Jiova-ni-lewevuqa, me kakua kina ni vo vei ira na wakana se na tabana. 2 Ia ena cadra mai vei kemudou sa rerevaka na yacaqu na Mata-ni-siga ni yalododonu, ka na kauta lako e na tabana na veivakabulai. Dou na lako yani ka lade cake me vaka na luve ni bulumakau e na loma ni bai. 3 Ia dou na butuqaqi ira na tamata ca, ni ra na dravusa e ruku ni qeteqete ni yavamudou e na siga ka'u na cakava kina na ka oqo, sa kaya ko Jiova-ni-lewevuqa. 4 “Dou nanuma na vunau i Mosese na noqu tamata, ko ya ka'u a vakarota vua mai Orepi me nodra kecega na Isireli, io, nai lesilesi kei na lewa. 5 “Raica, au na talai Ilaijia na parofita vei kemudou eliu, ena qai lako mai e muri na siga i Jiova e levu ka rerevaki. 6 Ia ena vagolea ko koya na lomadra na tama vei ira na gone, kei na lomadra na gone vei ira na tama, de'u lako mai ka cudruva na vanua e na veivakarusai. |