Malakai 3 - Ai Vola Tabu (Vakadewa Makawa Vakavoutaki 2021)

Na Tadu mai ni Talai ni Kalou

¹ “Mo dou raica mada, au na tala na noqu tamata, ka na caramaka ko koya na sala e mataqu; ia na Turaga, o koya dou sa vakasaqara, ena lako vakidacala mai ki na nona vale tabu, io, ena lako mai nai talatala ni veiyalayalati, o koya dou sa rekitaka; sa kaya ko Jiova-ni-lewevuqa.

² Ia ko cei me na yalo dei e na siga ni nona lako mai? Ia ko cei me na tu rawa ni sa rairai mai ko koya? Ni sa vaka na nona bukawaqa na dausava koula ko koya, ka vaka na nodra sovu na dausava-i-sulu:

³ ia ena tiko ko koya me vakawaicalataka ka vakasavasavataka na siliva: ia ena vakasavasavataki ira na Livai, ka savai ira me vaka na koula kei na siliva, me ra vakacabora vei Jiova nai madrali sa dodonu.

⁴ Ena qai ka vinaka vei Jiova na nodra i madrali na Juta kei Jerusalemi, me vaka e na gauna eliu, ka vaka na veiyabaki makawa.

⁵ “Ia ka'u na toro voleka vei kemudou me ia na veilewai, ia ka'u na kusarawa ni tukuna na nodra ca na daucakaisausau, kei na dauveibutakoci, kei na daububului vakailasu, kei ira era butakoca nai voli ni tamata cakacaka, kei na yada, kei na luveniyali, kei ira era bureitaka vua na vulagi na ka sa dodonu me nona, ka ra sega ni rerevaki au, sa kaya ko Jiova-ni-lewevuqa.

⁶ “Koi au ko Jiova, ka'u sa sega ni veivukiyaki; o koya oqo, dou sa sega kina ni rusa oi kemudou na Jekope.

⁷ Ia mai na gauna ni nomudou qase dou sa vuki tani ga mai na ka ka'u sa lesia, ka sa sega ni vakabauta. Dou lesu mai vei au, au na qai lesu yani vei kemudou, sa kaya ko Jiova-ni-lewevuqa. Ia dou sa kaya, ‘Me keitou lesu vakaevei?’

Kakua ni Butakoca na Kalou

⁸ E dua li na tamata me butakoci koya na Kalou? Ia dou a butakoci au. Ia dou sa kaya, ‘Keitou a butakoci kemuni vakaevei?’ E na nomudou i katini kei nai madrali.

⁹ E na dua na veicudruvi dou sa cudruvi kina, ni dou sa butako vei au, io, koi kemudou na matanitu taucoko oqo.

¹⁰ Dou kauta kece mai nai katini ki na lololo, me so kina na kakana e na noqu vale, ka vakatovolei au mada kina, sa kaya ko Jiova-ni-lewevuqa, se'u na dolava se segai na katuba ni lomalagi ka sovaraka vei kemudou na ka ni veivakalougatataki me na sautu dina sara.

¹¹ Ka'u na vunauca na dauvakacaca e na vukumudou, me kakua ni vakacacana na vua ni nomudou qele; ena sega talega ni sewaruta na vua ni nomudou vaini e na were, sa kaya ko Jiova-ni-lewevuqa.

¹² Era na qai vosavakalougatataki kemudou na lewe ni veivanua kecega, ni dou na vanua e daurekitaki, sa kaya ko Jiova-ni-lewevuqa.

¹³ “Dou a vosa vakaukauwa vei au, sa kaya ko Jiova. Ia dou sa kaya, ‘A vosa cava li keitou sa vosavakacacataki kemuni kina?’

¹⁴ Dou a kaya, ‘Sa sega ni yaga na qarava na Kalou. Ia ka cava na betena na noda vakabauta na ka sa lesia ko koya, ka ni da sa lako vakaloloku voli talega e na mata i Jiova-ni-lewevuqa?

¹⁵ Ia oqo eda sa qai kaya era sa kalougata ko ira na viavialevu; ka ni ra sa sega ni tamata yaco walega ko ira na daucaka ca, ia era sa dau dro bula talega ni ra vakatovolea vakaca na Kalou.’ ”

Na Kena i Sau na Tamata Yalodina

¹⁶ Sa ra qai dauveivosaki vakataki ira ko ira era sa rerevaki Jiova. A sa vakarorogo ko Jiova, ka rogoca, ka sa volai e dua nai vola ni veivakananumi e matana e na vukudra era rerevaki Jiova, ka vakananuma na yacana.

¹⁷ A sa kaya ko Jiova-ni-lewevuqa, “Era na noqu ga, e na siga ka'u na kumuna kina na noqu i yau talei; ia ka'u na lomani ira, me vaka na tamata sa lomani koya na luvena sa qaravi koya.

¹⁸ Ia dou na qai kunea sara ni sa duatani na tamata yalododonu ka duatani na tamata ca, ni sa duatani ko koya sa qarava na Kalou ka duatani ko koya sa sega ni qaravi koya.