Malakai 1 - Ai Vola Tabu (Vakadewa Makawa Vakavoutaki 2021)

¹ Na vosa ni parofisai bibi mai vei Jiova vei ira na Isireli ka tukuna ko Malakai.

Sa Lomani ko Jekope ka Cati ko Iso

² “Au sa daulomani kemudou,” sa kaya ko Jiova. Ia dou sa kaya, “Ko a lomani keitou vakaevei?” “Ko Iso, e tuakai Jekope se segai?” sa kaya ko Jiova. “Ia ka'u sa lomani Jekope,

³ ia ko Iso, ka'u sa cata. Au sa cakava na nona vanua veiulunivanua me lala sara, kei na nona i votavota me nodra na koli kila ni vanua lala.”

⁴ Kevaka era kaya ko ira na Itomi, “Eda sa vakadravudravuataki, ia eda na la'ki tara tale na veikoro lala,” sa kaya vakaoqo ko Jiova-ni-lewevuqa, “Era na tara, ia koi au, ka'u na talaraka sobu. Ka ra na vakatokai, ‘Na vanua ca’, kei, ‘Na matatamata sa na cudruva tikoga ko Jiova ka sega ni mudu’.”

⁵ Ia na matamudou ena raica, ka dou na kaya, “Sa cecere ko Jiova e na taudaku ni yalayala kei Isireli!”

Na Nodra Cakacaka Duka na Bete

⁶ “Sa vakarokorokotaki tamana na gone, ka sa vakakina na tamata vua na nona turaga. Ia ke'u sa tamamudou koi au, ko cei sa vakarokorokotaki au? Ia ke'u sa turaga koi au, ko cei sa rerevaki au? Sa taroga oqo ko Jiova-ni-lewevuqa vei kemudou na bete, oi kemudou ka sa beca na yacaqu. Ia dou sa kaya, ‘Keitou sa beca vakaevei na yacamuni?’

⁷ Ni dou sa vakacabora e na noqu i cabocabo-ni-soro na kakana sa sega ni savasava. Ka dou sa kaya, ‘Keitou sa vosavakacacataki kemuni vakaevei?’ Ni dou sa kaya ni sa vakacacani na tepeli i Jiova.

⁸ Ni dou sa vakacabora na manumanu mataboko mei soro, sa sega li ni ca? Ka ni dou sa vakacabora na veika sa lokiloki ka tauvi mate, sa sega li ni cala? Mo cabora mada oqori vua na nomu kovana; ka na vinakati iko beka, se vakadonui iko ko koya? sa kaya ko Jiova-ni-lewevuqa.

⁹ Ia oqo, ka'u masuti kemudou mo dou kerekere mada vua na Kalou, me lomani keda mai. Sai kemudou ga e vakavuna na ka oqori. Me na vakadonui kemudou li ko koya? sa kaya ko Jiova-ni-lewevuqa.

¹⁰ Ka sa dua vei kemudou sa dausogota na katuba, mo dou kakua kina ni vakawaqaca wale na buka e na noqu i cabocabo-ni-soro! Au sa sega sara ni vinakati kemudou, sa kaya ko Jiova-ni-lewevuqa, ka'u na sega talega ni vakadonuya mai na ligamudou e dua nai madrali.

¹¹ Io, mai nai cadracadra ni mata-ni-siga ka yacova na kenai dromudromu ena vakalevulevui na yacaqu vei ira na lewe ni veivanua; ia e na veiyasana kecega ena vakacabori ki na yacaqu nai madrali boi vinaka, io, nai madrali savasava; ni na vakalevulevui na yacaqu vei ira na lewe ni veivanua, sa kaya ko Jiova-ni-lewevuqa.

¹² Ia dou a vosavakacacataka na ka ko ya, ni dou a kaya ni tepeli i Jiova sa sega ni ka tabu; kei na kena vuata, na kena kakana sa ka wale sara.

¹³ Dou a kaya talega, ‘Raica, sa dua na ka ni veivakaocataki oqo’, ka dou a beca vakakina, sa kaya ko Jiova-ni-lewevuqa. Dou a kauta mai na ka e dresulaki, kei na ka e lokiloki, kei na ka e tauvi mate; io, na ka oqo dou a kauta mai mei madrali! Me'u vakadonuya li na ka oqo mai na ligamudou? sa kaya ko Jiova.

¹⁴ Ia me cudruvi ga na dauveivakaisini ko ya sa tiko e dua na tagane e na nona qele ni manumanu ka sa bubului me vakacabora, ia ka sa qai vakacabora ga e dua na ka ca vua na Turaga. Ni ka'u sa Tui levu koi au, sa kaya ko Jiova-ni-lewevuqa, ka sa vakarokorokotaki na yacaqu e na veimatanitu.