Maika 2 - Ai Vola Tabu (Vakadewa Makawa Vakavoutaki 2021)

Sa Vunauci nai Valavala Kaukauwa kei na Talaidredre

¹ E ca vei ira sa nakita me ra caka cala, ka bukia na ka ca e na nodra i mocemoce! Ka ni sa kida na mataka era sa qai cakava, ni sa rawata na ligadra.

² A ra kocova na veiwere, ka kovea; kei na veivale, ka taura; a ra sa vakacacana na tamata kei na nona vale, io, na tamata kei na ka e taukena.

³ O koya oqo sa kaya kina ko Jiova: Raica, au sa bukia na kedra ca na vuvale oqo, dou na sega ni kauta rawa mai kina na domomudou; dou na sega talega ni lako voli vakaviavialevu ni sa gauna ca oqo.

⁴ E na siga ko ya ena taurivaki na kemudou i bole, ka lelevaki kemudou e na lele vakaloloma, ka vaka, Eda sa vakacacani vakaidina; a nodra i votavota na kai noqu sa volitaka ko koya; sa kauta tani vei au ko koya! Sa vota kina ko koya na noda veiwere vua na dauvuki.

⁵ O koya oqo ena sega kina ni vo vei iko e dua me viri dali e na vakawiri madigi e nai soqosoqo i Jiova.

⁶ “Kakua ni vunauca”—era sa vunautaka— “me kakua ni dua me vunautaka na veika vakaoqo; ena sega ni tarai keda na madua.”

⁷ Dou sa kaya li na vale i Jekope, Sa vakalekalekataki beka na Yalo i Jiova? Sa vakaoqo beka na nona cakacaka? Sa sega beka ni yaga na noqu vosa vei koya sa lako vakadodonu?

⁸ Ia oqo era sa tucake ko ira na noqu tamata me vaka na meca; ai tutuvi kei nai sulu dou sa kauta tani mai vei ira era lako vinaka voli mai, io, vei ira era cata nai valu.

⁹ Dou a vakasevi ira tani na watidra na noqu tamata mai na nodra veivale vinaka; dou a kauta tani na noqu ka vakaiukuuku mai vei ira na luvedra, me sega tale vei ira ka tawa mudu.

¹⁰ Dou cavu tu, ka lako tani; ni sa sega ni nomudou i vakavakacegu oqo, ni sa vakadukadukalitaki, ena vakarusai kemudou, io, e na veivakarusai rarawa.

¹¹ Ke sa dua na tamata, sa lako voli e na yalo daulasu, me na vosa lasu ka kaya, Au na parofisaitaka vei iko na waini kei na yaqona kaukauwa; sai koya ga me sa nodra parofita na tamata oqo!

Na Vosa ni Yalayala me Baleti Ira na Kena Vo ni Isireli

¹² Au na vakasoqoni kemudou vakaidina kece sara ga, na Jekope, au na soqoni ira dina vata na kena vo ni Isireli; au na vakatikori ira vata me vaka na sipi ni Posira, me vaka na qele ni sipi e loma ni vanua veico; era na ue vakalevu e na vuku ni tamata.

¹³ Sa liutaki ira cake ko koya sa daubasubasuka; era na sikabotea ka lako yani ki na matamata-ni-koro, ka curu yani kina. Ia ena liutaki ira ko koya na nodra tui, io, ko Jiova ena nodra i liuliu.