Maciu 9 - Ai Vola Tabu (Vakadewa Makawa Vakavoutaki 2021)

Sa Vakabula e Dua na Tauvi-Paralase

¹ A sa vodo ko koya ki waqa, ka lako ki tai kadua, ka yaco ki na nona koro.

² Ka raica, sa kau mai vua e dua na tamata sa tauvi-paralase, a sa davo koto e na dua nai mocemoce. Ia ni sa raica ko Jisu na nodra vakabauta, sa kaya vua sa tauvi-paralase, “Na luvequ, mo vakacegu; sa vosoti na nomu i valavala ca.”

³ Ka raica, eso na vunivola sa kaya e lomadra, “O koya oqo sa vosavakacacataka na Kalou.”

⁴ A sa kila na nodra nanuma ko Jisu, ka kaya, “A cava dou sa nanuma vakaca kina e na lomamudou?

⁵ A cava vei rau e rawarawa cake, me tukuni, ‘Sa vosoti na nomu i valavala ca;’ se me tukuni, ‘Mo tucake ka lako?’

⁶ Ia mo dou kila kina ni sa rawata na Luve ni Tamata e vuravura me vosota nai valavala ca”—sa qai kaya ko koya vua sa tauvi-paralase—“Mo tucake, ka kauta na nomu i mocemoce, ka lako ki na nomu vale.”

⁷ A sa tucake ko koya, ka lako ki na nona vale.

⁸ Ia ni ra sa raica ko ira na le vuqa, era sa kurabui, ka vakarokorokotaka na Kalou, ni sa solia ko koya na kaukauwa vakaoqo vei ira na tamata.

Sa Kacivi Maciu ko Jisu

⁹ A sa lako tani mai kea ko Jisu, a sa raica e dua na tamata na yacana ko Maciu, sa tiko e na vale ni soli vakacavacava; a sa kaya vua, “Muri au mai.” A sa tucake ko koya, ka muri koya.

¹⁰ Ia ni sa kana tiko mai vale ko koya, raica, sa lewe vuqa na kumuna nai vakacavacava kei na tamata i valavala ca era sa lako mai, ka tiko me kana vata kei Jisu kei ira na nona tisaipeli.

¹¹ Ia ni ra sa raica ko ira na Farisi, era sa kaya vei ira na nona tisaipeli, “A cava sa kana vata kina na nomudou i Vakavuvuli kei ira sa kumuna nai vakacavacava kei ira na tamata i valavala ca?”

¹² Ia ni sa rogoca ko Jisu, sa kaya vei ira, “Sa sega ni yaga na vuniwai vei ira sa bula vinaka, vei ira ga sa tauvi-mate.

¹³ Ia dou laki vulica nai balebale ni vosa oqo, ‘Au sa vinakata na yalololoma, ka segai nai soro;’ ni ka'u sa sega ni lako mai me'u kacivi ira na yalododonu, ko ira ga nai valavala ca, me ra veivutuni.”

Na Taro me Baleta na Lolo

¹⁴ Sa qai lako mai vua ko ira na tisaipeli i Joni, ka kaya, “A cava sa lolo vakavuqa kina koi keimami kei ira na Farisi, ia na nomu tisaipeli era sa sega ni lolo?”

¹⁵ A sa kaya vei ira ko Jisu, “Era sa tagi rawa li na weka ni tagane sa qai vakawati, ni sa tiko vata kei ira na tagane sa qai vakawati? Ena yaco mai na siga, ena kau tani kina vei ira na tagane sa qai vakawati, ka ra na qai lolo.

¹⁶ Ia sa sega na tamata sa cula vata na tiki ni sulu vou kei nai sulu madra, ni sa dresuka nai sulu na tikina sa botani kina, a sa qai kadresu vakalevu kina.

¹⁷ Sa sega talega e dua sa vakataloca na waini vou ki na tavaya kuli-ni-manumanu madra; de kacabote na tavaya, ka sa dave yani na waini, ka sa ca na tavaya. Ia era sa vakataloca na waini vou ki na tavaya vou, a sa maroroi ruarua kina.”

Na Yalewa e Turudrabalavu kei na Goneyalewa sa Ciba

¹⁸ Ni sa tukuna tiko vei ira ko koya na veika oqo, raica, sa dua na turaga sa lako mai, ka cuva vua, ka kaya, “Sa qai ciba na luvequ-yalewa; ia mo ni lako ga mai mo ni tabaki koya e na ligamuni, ena bula kina.”

¹⁹ Sa qai cavu tu ko Jisu, ka muri koya, kei ira talega na nona tisaipeli.

²⁰ Ka raica, sa dua na yalewa sa turudrabalavu ka yabaki tinikarua, sa lako mai ki dakuna, ka tara na tutu ni nona i sulu,

²¹ ni sa kaya e lomana, “Kevaka ka'u tara walega na nona i sulu, au na vakabulai.”

²² A sa rai vuki ko Jisu, ka kunei koya, ka kaya, “Na luvequ, mo vakacegu; sa vakabulai iko na nomu vakabauta.” A sa bula na yalewa mai na tiki-ni-siga ko ya.

²³ Ia ni sa tadu ko Jisu ki na vale ni turaga ka sa raici ira era sa dau-uvu bitu ni vakatagi kei ira na lewe vuqa ni ra sa tagiyaso,

²⁴ sa kaya vei ira ko koya, “Dou lako mada yani, ni sa sega ni ciba na goneyalewa, ia sa moce walega.” A ra sa dredrevaki koya.

²⁵ Ia ni ra sa vakatalai na lewe vuqa, sa curu ko koya, a sa taura na ligana, ka sa tucake na goneyalewa.

²⁶ A sa kuruvaki ki na vanua taucoko ko ya na kenai rogorogo.

Sa Vakabula e Rua na Tamata Mataboko

²⁷ Ia ni sa lako tani mai kea ko Jisu, sa muri koya e lewe rua na tamata mataboko, a rau sa kaci, ka kaya, “Na luve i Tevita, lomani keirau mai.”

²⁸ Ia ni sa curu ki vale ko koya, sa lako mai vua koi rau na tamata mataboko; a sa kaya vei rau ko Jisu, “Drau sa vakadinata ni'u sa cakava rawa na ka oqo, se segai?” Erau sa kaya vua, “Io, na Turaga.”

²⁹ Sa qai tara na matadrau ko koya, ka kaya, “Me yaco vei kemudrau me vaka na nomudrau vakabauta.”

³⁰ A sa rai na matadrau; a sa vakarota matua vei rau ko Jisu, ka kaya, “Raica, me kakua ni kila e dua.”

³¹ Ia koi rau ni rau sa lako yani, erau sa vakarogoya na kenai rogorogo ki na vanua taucoko ko ya.

Sa Vakabula e Dua na Tamata Galu

³² Ia ni ra sa lako ki tautuba, raica, sa kau mai vua e dua na tamata galu sa curuma e dua na tevoro.

³³ Ia ni sa vakasevi tani na tevoro, sa vosa na galu. A ra sa kurabui sara na lewe vuqa, ka kaya, “Sa sega na ka vakaoqo sa rairai e na dua na gauna e Isireli.”

³⁴ A ra sa kaya na Farisi, “Sa vakasevi ira na tevoro ko koya e na kaukauwa ni nodra turaga na tevoro.”

Sa Lomani Ira na Tamata ko Jisu

³⁵ A sa lako voli ko Jisu e na veikoro kecega kei na veikoro lalai, ka vakatavuvuli e na nodra veivalenilotu, ka vunautaka nai tukutuku-vinaka ni matanitu, ka vakabula kecega na mate kei na malumalumu kecega.

³⁶ Ia ni sa raici ira na lewe vuqa ko koya, sa lomani ira, ni ra sa malumalumu, ka biu wale tu, me vaka na sipi sa sega na nodra i vakatawa.

³⁷ Sa qai kaya vei ira na nona tisaipeli, “E dina ni sa vakalewe na yabaki, ia era sa lewe lailai ga nai vakatau-ni-were;

³⁸ o koya mo dou masuti koya kina nai Taukei ni were me tala yani eso nai vakatau-ni-were ki na nona were.”