Maciu 8 - Ai Vola Tabu (Vakadewa Makawa Vakavoutaki 2021)

Sa Vakabula e dua na Vukavuka ko Jisu

¹ Ia ni sa lako sobu mai na ulunivanua ko koya, era sa lewe vuqa sara sa muri koya.

² Ka raica, sa dua na tamata vukavuka sa lako mai ka cuva vua, ka kaya, “Na Turaga, kevaka ko ni sa vinakata, ko ni sa vakasavasavataki au rawa.”

³ A sa dodoka na ligana ko Jisu, ka tarai koya, ka kaya, “Au sa vinakata, mo savasava mai.” A sa savasava vakasauri na nona vukavuka.

⁴ A sa kaya vua ko Jisu, “Raica, mo kakua mada ni tukuna vua e dua, ia mo laki vakaraitaki iko ga vua na bete, ka vakacabora nai madrali sa vakarota ko Mosese, me kenai vakadinadina vei ira.”

Sa Vakabula na Nona Dauveiqaravi na Turaganivalu ni Roma

⁵ Ia ni sa curu ko koya ki Kapenaumi, sa lako mai vua e dua na turaga-ni-valu, ka masuta,

⁶ ka kaya, “Noqu Turaga, sa davo koto mai neitou na noqu dauveiqaravi sa tauvi-paralase, a sa yaluma vakalevu sara.”

⁷ A sa kaya vua ko Jisu, “Au na laki vakabulai koya.”

⁸ Sa qai vosa na turaga-ni-valu, ka kaya, “Na Turaga, au sa sega ni yaga mo ni curu ki na noqu vale, mo ni cavuta walega na vosa, ena bula kina na noqu dauveiqaravi.

⁹ Ni'u sa turaga lailai ga koi au, ka'u sa lewa na sotia eso. Ia ka'u sa kaya vua e dua, ‘Mo lako yani,’ a sa lako yani, ka vei koya e dua tale, ‘Mo lako mai,’ a sa lako mai, ka vei koya na noqu tamata, ‘Mo kitaka oqo,’ a sa kitaka.”

¹⁰ Ia ni sa rogoca ko Jisu, sa kurabui, a sa kaya vei ira era sa muri tiko, “Au sa kaya vakaidina vei kemudou, Au sa sega ni kunea vei ira na Isireli e dua na vakabauta levu vakaoqo.

¹¹ Au sa kaya talega vei kemudou ni ra na lewe vuqa ena lako mai na tokalau, mai na ra talega, ka tiko sobu kei Eparaama, kei Aisake, kei Jekope, e na matanitu vakalomalagi,

¹² ia ko ira na gone ni matanitu era na biu ki na butobuto e tautuba, era na dautagi kina ka vakasequruquru bati.”

¹³ Sa qai kaya vua na turaga-ni-valu ko Jisu, “Mo lako ga; ia me vaka ko sa vakabauta, me yaco vei iko.” A sa bula na nona dauveiqaravi e na tiki-ni-siga ko ya.

Sa Vakabulai Ira na Lewe Vuqa

¹⁴ A sa lako ki na vale i Pita ko Jisu, a sa raica na tina ni watina, sa davo koto, ka tauvi-katakata.

¹⁵ A sa tara na ligana ko koya, a sa takali vua na katakata, a sa tucake ko koya, ka qaravi iratou.

¹⁶ Ia ni sa qai yakavi, sa kau mai vei koya e lewe vuqa sa curumi ira na tevoro eso, a sa vakasevi ira na tevoro ko koya e na vosa, a sa vakabulai ira kecega sa tauvi-mate.

¹⁷ O koya sa vakayacori kina na vosa sa tukuna ko Aisea na parofita, ka kaya, “O koya ga sa kauta vua na noda malumalumu, ka colata na noda mate.”

Eso Ka Via Muri Jisu

¹⁸ Ia ni sa raica ko Jisu era sa lewe vuqa sara sa vakavolivoliti koya, sa kaya me ia na lako ki tai kadua.

¹⁹ A sa lako mai e dua na vunivola, ka kaya vua, “Vakavuvuli, au na muri iko ki na veiyasana ko na lako kina.”

²⁰ Sa qai kaya vua ko Jisu, “Sa vaqara na fokisi, ka sa vakairoro na manumanu vuka, ia na Luve ni Tamata, sa sega vua na tikina me kotora kina na uluna.”

²¹ A sa dua tale na nona tisaipeli sa kaya vua, “Kemuni na Turaga, laivi au me'u lako mada me'u buluti tamaqu.”

²² A sa kaya vua ko Jisu, “Mo muri au, ka biuta na mate me ra buluta na nodra mate.”

Sa Vunauca na Wai ko Jisu

²³ Ia ni sa laki vodoka na waqa ko koya, era sa muri koya na nona tisaipeli.

²⁴ Ka raica, sa tubu na cava levu e na wasawasa, a sa luvu na waqa e na biau, a sa moce ko koya.

²⁵ Sa qai lako mai ko ira na nona tisaipeli, ka vakayadrati koya, ka kaya, “Kemuni na Turaga, ni vakabulai keda! Eda sa voleka ni mate!”

²⁶ A sa kaya vei ira ko koya, “Dou sa rere e na vuku ni cava, koi kemudou sa lailai na nomudou vakabauta?” Sa qai tucake ko koya, ka vunauca na cagi kei na wasawasa; a sa maravu sara mai.

²⁷ A sa kidacala ko ira na tamata, ka kaya, “E vaka beka evei nai tovo ni tamata oqo, ni sa talairawarawa vua na cagi kei na wasawasa!”

Sa Vakabula e Lewe Rua na Curumi Tevoro

²⁸ Ia ni sa udu ko koya ki tai kadua, ki na nodra vanua na kai Kerikesa, sa sota kaya e lewe rua sa curumi rau eso na tevoro, ka rau sa lako mai nai bulubulu. A rau sa yalocudrucudru sara ka sa sega kina na tamata me lako rawa e na sala ko ya.

²⁹ Ka raica, erau sa qoqolou, ka kaya, “E vakaevei koi keirau, kemuni Jisu na luve ni Kalou? Ko ni sa lako beka mai ki ke me vakararawataki keimami ni sa sega ni yaco na kena gauna?”

³⁰ A sa dua na qele ni vuaka levu sa vakani, sa vakayawa vei ira.

³¹ A ra sa masuti koya ko ira na tevoro, ka kaya, “Kevaka ko sa vakasevi keimami, laiva me keimami curuma na qele ni vuaka.”

³² A sa kaya vei ira ko koya, “Dou lako.” A ra sa lako tani, ka ra sa curuma na qele ni vuaka; ka raica, sa cici sara na qele ni vuaka taucoko e na baba ki wai, ka ra sa mate e wai.

³³ Ia ko ira sa vakania, era sa dro, ka lako ki na koro, ka tukuna na ka kecega, kei na ka sa yaco vei rau ka curumi rau ko ira na tevoro.

³⁴ Ka raica, era sa lako kece yani na lewe ni koro me ra tavaki Jisu, ia ni ra sa raici koya, era sa masuta me lako tani yani mai na nodra vanua.