Maciu 7 - Ai Vola Tabu (Vakadewa Makawa Vakavoutaki 2021)

Na Dauveivakalewai

¹ “Dou kakua ni daulelewa, de dou na lewai.

² Ia na lewa dou na kitaka, dou na lewai kina, kei nai vakarau dou sa vakarautaka, ena vakarautaki tale vei kemudou.

³ Ia ka vakaevei, ni ko sa raica na malamala e na mata ni wekamu, ka ko sa sega ni nanuma na kau e matamu?

⁴ Se ko na kaya vakaevei vua na wekamu, ‘Meu leuta mada na malamala mai na matamu,’ ka raica, sa tu e matamu na kau?

⁵ O iko na dauveivakaisini, mo cavuta mada eliu na kau mai na matamu, ia ko na qai raica vinaka mo leuta na malamala mai na mata ni wekamu.

Na Vakacacani ni Ka Tabu

⁶ “Dou kakua ni solia na ka tabu vei ira na koli, se biuta na nomudou mataniciva e matadra na vuaka, de ra butuka sobu e yavadra, ka vuki mai ka basuraki kemudou.

Kerekere, Vakasaqara, Tukituki

⁷ “Dou kerekere, ka na soli vei kemudou; dou vakasaqara, ka dou na kunea; dou tukituki, ka na dolavi vei kemudou.

⁸ Ni sa rawata ko koya yadua sa kerekere, ka sa kunea ko koya sa vakasaqara, ka na dolavi vua sa tukituki.

⁹ Se ko cei mada vei kemudou, kevaka e kere madrai na luvena, ena solia vua e dua na vatu?

¹⁰ Se kere ika, ena solia vua e dua na gata?

¹¹ Ia kevaka dou sa kila koi kemudou na tamata ca, mo dou solia na ka vinaka vei ira na luvemudou; sa na gu vakalevu cake, me solia na veika vinaka na Tamamudou mai lomalagi vei ira sa kerekere vua.

¹² “O koya oqo, na ka vakaaduaga dou sa vinakata me ra kitaka vei kemudou na tamata, dou kitaka vaka talega kina vei ira; ni sa vakaoqo na vunau kei ira na parofita.

Na Matamata Qiqo

¹³ “Dou curu ki na matamata-ni-koro qiqo. Ni sa lalaga na matamata-ni-koro, ka rabailevu na sala, sa basika ki na rusa, a ra sa lewe vuqa sa curu kina.

¹⁴ Ni sa qiqo na matamata-ni-koro, ka rabailailai na sala, sa basika ki na bula, a ra sa lewe lailai sa kunea.

Na Kau kei na Vuana

¹⁵ “Ia dou qarauni kemudou vinaka mai vei ira nai vakavuvuli vakailasu, era sa lako mai vei kemudou ka vakaisulu vaka na sipi, a ra sa wolifa daukata e lomadra.

¹⁶ Dou na kilai ira e na vuadra. Sa veti li na vua-ni-vaini mai na wa-vakavotona, se na lolo mai na soni?

¹⁷ Sa vakakina sa vuataka na vua vinaka na kau vinaka kecega, a sa vuataka na vua ca na kau ca.

¹⁸ E sega na kau vinaka me vuataka rawa na vua ca, se na kau ca me vuataka rawa na vua vinaka.

¹⁹ Na kau vakaaduaga sa sega ni vuataka na vua vinaka sa ta laivi, ka biu ki na bukawaqa.

²⁰ E dina ga, dou na kilai ira e na vuadra.

Au Sa Sega Sara ni Kilai Kemudou

²¹ “Ena sega ni curu ki na matanitu vakalomalagi ko ira kecega sa kaya vei au, ‘Turaga, Turaga;’ ko koya ga sa cakava na loma i Tamaqu sa tiko mai lomalagi.

²² Era na lewe vuqa ena kaya vei au e na siga ko ya, ‘Kemuni na Turaga, na Turaga, keimami a sega li ni vakavuvuli e na yacamuni? Ka vakasevi ira na tevoro e na yacamuni? Ka kitaka na cakacaka mana e vuqa e na yacamuni?’

²³ Ia ka'u na qai tukuna vei ira, ‘Au sa sega sara ni kilai kemudou; dou lako tani vei au, koi kemudou sa daukitaka nai valavala ca.’

²⁴ “Ia oqo, ko koya yadua sa rogoca na noqu vosa oqo, ka cakava, ka'u na vakatautauvatataka kei na tamata vuku, sa tara na nona vale e na dela ni vatu.

²⁵ A sa tau mai na uca, ka coka mai na dobui, ka liwa na cagi, ka tabaka na vale ko ya, a sa sega ni bale, ni sa tauyavutaki e na vatu.

²⁶ Ia ko koya yadua sa rogoca na noqu vosa oqo, ka sega ni cakava, ena vakatautauvatataki kei na tamata lialia, sa tara na nona vale e na dela ni nuku.

²⁷ A sa tau mai na uca, ka coka mai na dobui, ka liwa na cagi, ka tabaka na vale ko ya, a sa bale kina—ka sa ka levu na kena bale!”

Na Lewa ka Tu Vei Jisu

²⁸ A sa yaco, ni sa tinia na vosa oqo ko Jisu, era sa kurabui sara na lewe vuqa e na nonai vakavuvuli.

²⁹ Ni sa vakatavulici ira me vaka e dua sa tu ga vua na lewa, ka sega ni vakataki ira na nodra vunivola.