Maciu 6 - Ai Vola Tabu (Vakadewa Makawa Vakavoutaki 2021)

Vakavuvuli me Baleta nai Loloma

¹ “Dou raici kemudou vinaka mo dou kakua ni kitaka na nomudou i loloma e na matadra na tamata, me ra raici kemudou kina, kevaka e vakaoqo, ena sega na kemudou i sau mai vua na Tamamudou sa tiko mai lomalagi.

² “O koya oqo, ni ko sa kitaka nai loloma, mo kakua ni uvuca na davui e matamu, me vaka era daukitaka na dauveivakaisini e na veivalenilotu kei na veigaunisala, me ra dokai kina vei ira na tamata. Au sa kaya vakaidina vei kemudou, Sa tu ga vei ira na kenai sau.

³ Ia ko iko, ni ko sa soli ka-ni-loloma, me kakua ni kila na ligamu i mawi na ka sa kitaka na ligamu i matau,

⁴ me vuni kina na nomu i loloma. Ia na Tamamu sa raica na ka e vuni, ena sauma votu vei iko.

Na Masu ni Turaga

⁵ “Ia ni ko sa masu, mo kakua ni vakataki ira na dauveivakaisini. Ni ra sa vinakata me ra tu e na veivalenilotu kei na veitutu-ni-sala ni ra masu, me raici ira kina ko ira na tamata. Au sa kaya vakaidina vei kemudou, Sa tu ga vei ira na kenai sau.

⁶ Ia ko iko, ni ko sa masu, curu ki na nomu loqi, ia ni ko sa sogota na kena katuba, masu vua na Tamamu sa tabogo; ia na Tamamu sa raica na ka e vuni ena sauma votu vei iko.

⁷ “Ia ni dou sa masu, kakua ni vosa balabalavu walega, me vakataki ira na tawa-lotu, ni ra sa nanuma era na rogoci ni ra sa vosa balabalavu.

⁸ O koya mo dou qai kakua ni vakataki ira, ni sa kila eliu na Tamamudou na ka sa yaga vei kemudou, ka sa muri na nomudou kerekere vua.

⁹ O koya mo dou qai masu vakaoqo: “Tama i keimami mai lomalagi, me vakarokorokotaki na yacamuni.

¹⁰ Me yaco mai na nomuni matanitu. Me caka na lomamuni e vuravura me vaka sa caka mai lomalagi.

¹¹ Ni solia mai vei keimami e na siga oqo na kakana e rauti keimami.

¹² Ni vosota mada na neimami valavala ca, me vaka keimami sa vosoti ira era sai valavala ca vei keimami.

¹³ Ni kakua ni kauti keimami ki na vere, ka mo ni vakabulai keimami mai na ca. Ni sa nomuni na matanitu, kei na kaukauwa, kei na lagilagi, ka sega ni mudu. Emeni.

¹⁴ Ni kevaka dou sa vosoti ira na tamata sa caka cala, ena vosoti kemudou talega na Tamamudou vakalomalagi,

¹⁵ ia kevaka dou sa sega ni vosoti ira na tamata sa caka cala, ena sega ni vosoti kemudou talega e na vuku ni nomudou caka cala na Tamamudou.

Nai Vakavuvuli me Baleta na Lolo

¹⁶ “Ia ni dou sa lolo, kakua ni vakaveveku mata, me vakataki ira na dauveivakaisini, ni ra sa vakatanitaka na matadra, me rairai vei ira na tamata na nodra lolo. Au sa kaya vakaidina vei kemudou, Sa tu ga vei ira na kenai sau.

¹⁷ Ia ko iko, ni ko sa lolo, lumuta na ulumu, ka tavoya na matamu,

¹⁸ me kakua ni rairai vei ira na tamata na nomu lolo, vua ga na Tamamu sa tabogo. Ia na Tamamu sa raica na ka sa vuni ena sauma votu vei iko.

Nai Yau mai Lomalagi

¹⁹ “Dou kakua ni kumuna vata vei kemudou nai yau e vuravura, e dauvakacacana kina na sarasara kei na veveka, a sa ravabasuka kina na daubutako ka butakoca,

²⁰ ia mo dou kumuna vata na nomudou i yau mai lomalagi, sa sega ni vakacacana kina na sarasara se na veveka, a sa sega ni ravabasuka kina na daubutako me butakoca.

²¹ Ni na tiko talega na yalomudou e na yasana sa tiko kina na nomudou i yau.

Na Cina ni Yago

²² “A cina ni yago na mata. O koya ke sa vinaka na matamu, ena rarama kina na yagomu taucoko;

²³ ia kevaka e ca na matamu, ena butobuto na yagomu taucoko. Ia kevaka sa butobuto na rarama sa tu e lomamu, ena vakaevei na kena levu ni butobuto ko ya!

Na Kalou kei nai Yau

²⁴ “Sa sega e dua na tamata sa qarava rawa e le rua na turaga, ni na cata e dua, ka lomani koya kadua, se na kabita e dua, ka beci koya kadua. Dou sa sega ni qarava rawa na Kalou kei nai yau.

Kakua ni Lomaocaoca

²⁵ “O koya ka'u sa kaya kina vei kemudou, Mo dou kakua ni lomaocaoca e na vuku ni nomudou bula, e na ka mo dou kania, se na ka mo dou gunuva, se e na vuku ni yagomudou e na ka mo dou vakaisulu kina. Sa segai li ni ka e bibi cake na bula mai na kakana? Ka segai li ni ka e bibi cake na yago mai nai sulu?

²⁶ Dou raica na manumanu vuka, ni ra sa sega ni daukabukaburaki, se dautamusuka, se daukumuna vata ki na lololo; a sa vakani ira na Tamamudou vakalomalagi. Dou sa sega beka ni yaga vakalevu cake vei ira?

²⁷ Ia ko cei vei kemudou, ni sa lomaocaoca, sa rawata me vakuria vakalailai ga na siga ni nona bula?

²⁸ Ia dou sa lomaocaoca vakacava e na vuku ni sulu? Dou vakananuma na viavia ni veikau, era sa tubu vakaevei; era sa sega ni daucakacaka, se dautali,

²⁹ ia ka'u sa kaya vei kemudou, ni ko Solomoni e na nona i ukuuku kecega sa sega ni vakaisulu me vaka e dua vei ira oqo.

³⁰ Ia kevaka sa vakasuluma vakaoqo na Kalou na co ni veikau, ka tu edaidai, a sa biu ki na lovo e na mataka ena sega li ni gu vakalevu cake me vakasulumi kemudou—koi kemudou sa lailai na nomudou vakabauta?

³¹ O koya mo dou qai kakua ni lomaocaoca, ka kaya, ‘A cava eda na kania?’ Se, ‘A cava eda na gunuva?’ Se, ‘A cava eda na vakaisulu kina?’

³² Ni sa dau vakasaqara na ka kecega oqo ko ira na lewe ni veivanua, ni sa kila na Tamamudou vakalomalagi sa yaga vei kemudou na ka kecega oqo.

³³ Ia dou vakasaqara taumada na matanitu ni Kalou, kei na nona yalododonu, ka na soli me kenai kuri vei kemudou na ka kecega oqo.

³⁴ “O koya mo dou qai kakua ni lomaocaoca e na vuku ni mataka, baleta ena qai lomaocaoca na mataka e na vuku ni kena ka. Na leqa ni siga edaidai sa rauta vinaka ga na siga oqo.