Maciu 5 - Ai Vola Tabu (Vakadewa Makawa Vakavoutaki 2021)

Nai Vunau mai na Ulunivanua

¹ Ia ni sa raici ira na lewe vuqa ko koya, sa cabe ki na ulunivanua; ia ni sa tiko sobu, sa lako mai vei koya ko ira na nona tisaipeli.

² A sa vosa ko koya, ka vakavulici ira, ka kaya:

³ “Sa kalougata ko ira sa yalomalumalumu, ni sa nodra na matanitu vakalomalagi.

⁴ “Sa kalougata ko ira sa dautagi, ni ra na vakacegui.

⁵ “Sa kalougata ko ira sa yalomalua, ni ra na taukena na vanua.

⁶ “Sa kalougata ko ira sa via kania ka via gunuva nai valavala dodonu, ni ra na vakamamautaki.

⁷ “Sa kalougata ko ira e dauloloma, ni ra na lomani.

⁸ “Sa kalougata ko ira sa yalosavasava, ni ra na raica na Kalou.

⁹ “Sa kalougata ko ira sa dautataro, ni ra na vakatokai me luve ni Kalou.

¹⁰ “Sa kalougata ko ira era sa vakacacani e na vuku ni valavala dodonu, ni sa nodra na matanitu vakalomalagi.

¹¹ “Dou sa kalougata, ni dou sa vakasewasewani, ka vakacacani, ka vosavakacacataki vakailasu e na ka kecega e ca, e na vukuqu.

¹² “Dou reki ka marau vakalevu, ni sa levu na kenai sau vei kemudou mai lomalagi, ni sa vakaoqo na nodra vakacacani ira na parofita era sa bula eliu vei kemudou.

Na Masima kei na Rarama

¹³ “Oi kemudou na masima kei vuravura; ia kevaka sa seavu mai na masima na kena tuituina, ena vakatuituinataki tale e na cava? Sa qai sega ni yaga e na dua na ka, me biu ga ki tautuba, ka me butuka sobu ko ira na tamata.

¹⁴ “Oi kemudou na rarama kei vuravura. Na koro sa tara toka e na ulunivanua sa sega ni tabonaki rawa.

¹⁵ Sa sega talega ni tutuvaki na cina, ka me qai toka e ruku ni vakarau ni sila, e na kenai tutu ga; sa qai cinavi ira kecega sa tiko e vale.

¹⁶ Me caudre vakakina na nomudou rarama e na matadra na tamata, me ra raica na nomudou i valavala vinaka, ka vakarokorokotaka na Tamamudou sa tiko mai lomalagi.

Na Vunau kei Ira na Parofita

¹⁷ “Dou kakua ni vakasama ni'u sa lako mai me'u vakaotia na vunau, se na nodra i vakavuvuli na parofita; au sa sega ni lako mai me'u vakaotia, me'u vakayacora ga.

¹⁸ Ni'u sa kaya vakaidina vei kemudou, ena takali mada ko lomalagi kei vuravura, ia ena sega ni takali mai na vunau e dua na mata-ni-vola lailai se dua na tikina lailai sara, ena vakayacori kece mada ga.

¹⁹ O koya oqo ena vakatokai kina me lailai sara e na matanitu vakalomalagi, ko koya yadua ena talaidredre ki na dua na vunau oqo sa lailai sara, ka vakatavuvuli vakakina vei ira na tamata; ia ko koya ena vakabauta ka vakatavuvulitaka, ena vakatokai me levu e na matanitu vakalomalagi.

²⁰ Ni'u sa kaya vei kemudou, Kevaka sa sega ni uasivi cake na nomudou i valavala dodonu e na nodra na vunivola kei ira na Farisi, dou na sega sara ni curu ki na matanitu vakalomalagi.

Na Veika me Baleta na Cudru

²¹ “Dou sa rogoca ni sa kainaki vei ira eliu, ‘Mo kakua ni laba; ia ko koya ena laba, ena cudruvi koya na mataveilewai.’

²² Ia koi au, ka'u sa kaya vei kemudou, ni o koya yadua sa cudru walega vua na wekana ena cudruvi koya na mataveilewai; ia ko koya ena vosavakacacataka na wekana ni sa beitaka me ca, ena cudruvi koya na mataveilewai levu; ia ko koya e tukuna ni sa lialia ko koya na wekana, ena cudruvi e na bukawaqa mai Eli.

²³ O koya oqo, kevaka ko sa kauta na nomu i madrali ki nai cabocabo-ni-soro, a sa nanuma mai kina sa dua na ka sa beitaki iko kina na wekamu,

²⁴ biuta tu na nomu i madrali e na mata ni cabocabo-ni-soro, ka mo lako, mo drau veivakaduavatataki mada eliu kei na wekamu, mo qai lako mai ka vakacabora na nomu i madrali.

²⁵ Kusarawa mo drau veivinakati kaya sa beitaki iko, ni drau sa lako vata kaya e na gaunisala; de soli iko ko koya sa beitaki iko vua na turaga-ni-lewa, ka soli iko na turaga-ni-lewa vua na ovisa, ko na qai biu ki na valeniveivesu.

²⁶ Au sa kaya vakaidina vei iko, O na sega sara ni sereki mai kina, ko na sauma kece mada nai lavo.

Vakavuvuli me Baleta na Veibutakoci

²⁷ “Dou sa rogoca sa kainaki vei ira eliu, ‘Mo kakua ni ia na veibutakoci.’

²⁸ Ia koi au, ka'u sa kaya vei kemudou, O koya yadua ena raica na yalewa me dodomo kina, sa veibutakoci oti kaya e lomana.

²⁹ Ia kevaka sa vakacalai iko na matamu i matau, vecuka tani, ka biuta tani vei iko. Ni sa vinaka vei iko me yali laivi e dua na tikimu, ka me kakua ni biu ki Eli na yagomu taucoko.

³⁰ Ia kevaka sa vakacalai iko na ligamu i matau, muduka tani, ka biuta tani vei iko; ni sa vinaka vei iko me yali laivi e dua na tikimu, ka me kakua ni biu ki Eli na yagomu taucoko.

Na Vakavuvuli me Baleta na Veibiu

³¹ “Sa kainaki talega, ‘Ko koya sa biuta tani na watina, me solia vua nai vola ni veibiu.’

³² Ia koi au, ka'u sa kaya vei kemudou, Ko koya sa biuta na watina, ke sa sega ni dautagane, sa vakavuna na nona veibutakoci; kei koya erau sa veiwatini kaya sa biu, sa ia na veibutakoci.

Na Vakavuvuli me Baleta na Bubului

³³ “Dou sa rogoca talega, ni sa kainaki vei ira eliu, ‘Mo kakua ni bubului vakailasu, ia mo vakayacora vua na Turaga na ka ko sa bubului kina.’

³⁴ Ia koi au, ka'u sa kaya vei kemudou, Dou kakua sara ni bubului, me kakua ki lomalagi, ni sai tikotiko vakaturaga ni Kalou,

³⁵ me kakua ki vuravura, ni sai tutu-ni-yavana, me kakua ki Jerusalemi, ni sa nona koro na Tui levu.

³⁶ Mo kakua ni bubului ki na ulumu; ni ko sa sega ni vukica rawa e dua na drauna me vulavula se loaloa.

³⁷ Ia ‘me io, na io’, ka me ‘sega, na sega’, e na nomudou vosa; ia na ka sa levu cake sa tubu mai na ca.

Na Veisausaumitaki ni Ca

³⁸ “Dou sa rogoca sa kainaki, ‘Me kenai sau ni mata na mata, ka me kenai sau ni bati na bati,’

³⁹ Ia koi au, ka'u sa kaya vei kemudou, Dou kakua ni veisausaumitaka na ca. Ia kevaka e dua sa sabica na balumu i matau, vagolea talega vua na kenai karua.

⁴⁰ Ia kevaka e dua sa via kauti iko vei ira na mataveilewai ka me kauta vata na nomu kote, laiva ga me kauta vata talega na nomu i tutuvi.

⁴¹ Ia kevaka e dua sa vakasaurarataki iko mo drau lako vata kaya e dua na maile, lako vata kaya na kenai karua.

⁴² Solia vua sa mai kerekere vei iko, ia kakua ni vuki tani vua sa via kerea mada e dua na ka vei iko.

Lomani Ira na Nomu Meca

⁴³ “Dou sa rogoca sa kainaki, ‘Mo lomana na wekamu, ka cata na nomu meca.’

⁴⁴ Ia koi au, ka'u sa kaya vei kemudou, Dou lomani ira na nomudou meca, vosa vinaka vei ira sa rukaki kemudou, caka vinaka vei ira sa cati kemudou, ka masulaki ira sa vakalialiai kemudou, ka vakacacani kemudou,

⁴⁵ mo dou luvena kina na Tamamudou sa tiko mai lomalagi. Ni sa vakacabera ko koya na nona mata-ni-siga vei ira na tamata ca kei ira na tamata vinaka, a sa vakatauca mai na uca vei ira na tamata yalododonu kei ira na tamata tawa yalododonu.

⁴⁶ Ia kevaka dou lomani ira sa lomani kemudou, a cava ena kemudou i sau? Era sega li ni cakava vakaoqo ko ira sa kumuna nai vakacavacava?

⁴⁷ Ia kevaka dou veikidavaki duaduaga kei ira na wekamudou, a cava dou sa uasivi cake kina? Era sega li ni cakava vakaoqo ko ira na lewe ni veimatanitu tani?

⁴⁸ O koya mo dou qai vinaka sara, me vaka sa vinaka sara na Tamamudou sa tiko mai lomalagi.