Maciu 4 - Ai Vola Tabu (Vakadewa Makawa Vakavoutaki 2021)

Na Veretaki nei Jisu

¹ Sa qai kauti Jisu cake na Yalo Tabu ki na vanua lala, me dauveretaki koya na tevoro.

² Ia ni sa lolo ko koya e na siga e vasagavulu kei na bogi e vasagavulu, sa qai viakana.

³ A sa lako mai vei koya na dauvere, ka kaya, “Kevaka ko sa Luve ni Kalou, mo kaya mada me vuki mei buli madrai na veivatu oqo.”

⁴ A sa vosa ko koya, ka kaya, “Sa volai, “ ‘Ena sega ni bula na tamata e na madrai duaduaga, ia sa bula ga e na vosa kecega sa lako mai na gusu ni Kalou.’ ”

⁵ Sa qai kauti koya na tevoro ki na koro tabu, ka vakatikori koya ki dela ni vale-ni-soro,

⁶ a sa kaya vua, “Kevaka ko sa Luve ni Kalou, mo rika sobu; ni sa volai, ‘Ena vakaroti ira na nona agilosi ko koya e na vukumu,’ ka ‘Era na keveti iko e na ligadra, de mani tavutu na yavamu ki na vatu.’ ”

⁷ Sa kaya vua ko Jisu, “Sa volai talega, ‘Mo kakua ni vakatovolei Jiova na nomu Kalou.’ ”

⁸ Sa kauti koya tale na tevoro ki na dua na ulunivanua cecere sara, a sa vakaraitaka vei koya na matanitu kecega e vuravura, kei na kedrai ukuuku;

⁹ a sa kaya vua, “A ka kecega oqori ka'u na solia vei iko, kevaka ko na cuva sobu ka vakarokoroko vei au.”

¹⁰ Sa qai kaya vua ko Jisu, “Mo lako tani, Setani, ni sa volai, ‘Mo vakarokoroko vei Jiova na nomu Kalou, ka mo qaravi koya duaduaga.’ ”

¹¹ Sa qai biuti koya na tevoro, ka raica, sa lako mai eso na agilosi ka qaravi koya.

Sa Tekivu Vunau ko Jisu e Kalili

¹² Ia ni sa rogoca ko Jisu sa biu ki na valeniveivesu ko Joni, sa lako tale ki Kalili;

¹³ a sa biuti Nasareci, ka sa laki tiko vakadua ki Kapenaumi, o koya sa tu e na baravi, e nai yalayala kei Sevuloni kei Navitalai,

¹⁴ me vakayacori kina na vosa sa tukuna ko Aisea na parofita, ka kaya,

¹⁵ “A vanua ko Sevuloni, kei na vanua ko Navitalai, e na sala vaka ki wai, e na tai kadua ni Joritani, ko Kalili ni veimatanitu tani—

¹⁶ ko ira na tamata ka tiko e na butobuto era sa raica na rarama levu, kei ira ka ra tiko e na vanua kei na yaloyalo ni mate, sa cabe vei ira na rarama.”

¹⁷ Mai na gauna ko ya sa vakatekivu kina ko Jisu me dauvunau, ka kaya, “Dou veivutuni, ni sa voleka na matanitu vakalomalagi.”

Sa Kacivi Iratou nai Sevu ni Tisaipeli ko Jisu

¹⁸ A sa lako voli ko Jisu e na baravi mai Kalili, a sa raica e le rua erau veitacini, ko Saimoni sa vakatokai ko Pita, kei Adriu na tacina, erau sa viritaka na lawa ki wai—ni rau sa gonedau.

¹⁹ A sa kaya vei rau ko koya, “Drau muri au mai, ka'u na qisi kemudrau mo drau gonedau ni tamata.”

²⁰ A rau sa biuta sara tu na nodrau lawa, ka muri koya

²¹ A sa lako tani mai kea ko koya vaka ki liu, a sa raica e le rua tale erau veitacini, ko Jemesa na luve i Sepete, kei Joni na tacina, eratou sa toka vata kei Sepete na tamadrau mai waqa, a rau sa oneva na nodratou lawa; a sa kacivi rau ko koya.

²² A rau sa biuta sara tu na waqa kei na tamadrau, ka muri koya.

Sa Vakatavuvuli, Vunau, ka Veivakabulai

²³ A sa veilakoyaki voli e Kalili taucoko ko Jisu, a sa vakatavuvuli e na nodra veivalenilotu, a sa vunautaka nai tukutuku-vinaka ni matanitu, a sa vakabulai ira na tamata mai na mate kecega, kei na malumalumu kecega.

²⁴ A sa rogovaki yani na kenai rogorogo ki Siria taucoko, ka sa kau vua ko ira kecega sa tauvi-mate, era sa tauvi e na mate tani eso kei na yaluma, kei ira sa curumi ira na tevoro, kei ira sa tauvi-lialia, kei ira sa tauvi-paralase, ka sa vakabulai ira ko koya.

²⁵ A ra sa lewe vuqa sara sa muri koya mai Kalili, kei Tikapoli, kei Jerusalemi, kei Jutia, kei na tai kadua ni Joritani.