Maciu 3 - Ai Vola Tabu (Vakadewa Makawa Vakavoutaki 2021)

Na Vunau i Joni na Dauveipapitaisotaki

¹ Ia e na gauna ko ya sa lako mai ko Joni na dauveipapitaisotaki, ka dauvunau e loma ni vanua mai Jutia,

² ka kaya, “Dou veivutuni, ni sa voleka na matanitu vakalomalagi.”

³ O koya oqo sa vosa kina ko Aisea na parofita, ka kaya, “A domona e dua sa kacikaci e loma ni vanua lala: ‘Dou caramaka na sala i Jiova, cakava me dodonu na nona salatu.’ ”

⁴ Ia ko Joni oqo sa vakaisulu e nai sulu vuti ni kameli, ka vau na tolona e na wa kuli-ni-manumanu; ka sa kena kakana na vodre kei na oni ni veikau.

⁵ A sa lako mai vua ko ira mai Jerusalemi, kei Jutia taucoko, kei na yasana taucoko sa voleka ki na Joritani,

⁶ a sa papitaisotaki ira ko koya e na Joritani, ni ra sa vakatusa tiko na nodra i valavala ca.

⁷ Ia ni sa raica ko koya era sa lewe vuqa na Farisi kei nai tokani i Setoki, era sa lako mai ki na nona papitaiso, sa kaya vei ira, “Oi kemudou na kawa ni gata, ko cei sa vakasalataki kemudou mo dou dro tani mai na cudru sa lako tiko mai?

⁸ O koya mo dou vuataka na vua e kilikili kei na veivutuni.

⁹ Ia dou kakua ni nanuma mo dou kaya e na lomamudou, ‘A tama i keimami ko Eparaama’; ni'u sa kaya vei kemudou, e rawarawa vua na Kalou me vakatubura na veivatu oqo me ra luve i Eparaama.

¹⁰ Ia na matau sa no edaidai e na vunikau; ka sa ta laivi kina na kau kecega sa sega ni vuataka na vua vinaka, a sa biu ki na bukawaqa.

¹¹ “E dina ka'u sa papitaisotaki kemudou e na wai ni dou sa qai veivutuni; ia ko koya ena muri au mai sa levu cake vei keirau, ia na nona i vava ka'u sa sega ni yaga me'u kauta. Ena papitaisotaki kemudou ko koya e na Yalo Tabu kei na bukawaqa.

¹² A sa tu e ligana na nona i sivi ni sila, ka na vakasavasavataka sara ko koya na nona rara ni samu sila, ka binia vata na nona sila ki na lololo; ia ena vakama ko koya na qana e na bukawaqa e sega ni bokoci rawa.”

Na Papitaiso i Jisu

¹³ Sa qai lako mai Kalili ko Jisu ki na Joritani vei Joni, me papitaisotaki vua.

¹⁴ A sa via tarova ko Joni, ka kaya, “Sa yaga vei au mo ni papitaisotaki au, ia koi kemuni o ni sa lako li mai vei au?”

¹⁵ A sa vosa ko Jisu, ka kaya vua, “Mo vosota mada edaidai; ni sa kilikili kei keda me da vakabauta vakaoqo nai valavala dodonu kecega.” Sa qai duavata ko koya.

¹⁶ Ia ko Jisu, ni sa papitaisotaki oti, sa cabe sara mai na wai, ka raica, sa qai wase rua vua na lomalagi, ka sa raica ko koya na Yalo ni Kalou ni sa lako sobu mai me vaka na ruve, ka sa mai ro toka vua.

¹⁷ Ka raica, sa dua na domo mai lomalagi, sa kaya, “O koya oqo na noqu Gone ni toko, au sa dauvinakata vakalevu.”