Maciu 26 - Ai Vola Tabu (Vakadewa Makawa Vakavoutaki 2021)

Era sa Bosea me ra Vakamatei Jisu

¹ Ni sa vakaotia ko Jisu na vosa kecega oqo, sa kaya vei ira na nona tisaipeli,

² “Dou sa kila sa vo ga e rua na bogi me qai ia na solevu ni Lako-sivia, ena qai soli yani na Luve ni Tamata me lauvako ki na kauveilatai.”

³ Era sa qai soqoni vata ko ira na bete levu, kei ira na vunivola, kei ira na nodra qase na tamata, e na vale ni bete levu, ko Kaiafa na yacana,

⁴ a ra sa bose me ra vesuki Jisu vakailawaki, ka vakamatea.

⁵ A ra sa kaya, “Me kakua ni ia tiko na solevu, de ra ue kina na tamata.”

Lumuti mai Pecani ko Jisu

⁶ Ia ni sa tiko ko Jisu mai Pecani e na vale i Saimoni na vukavuka,

⁷ sa lako mai vei koya e dua na yalewa sa taura e dua na tavaya alapasita waiwai talei sara, a sa livia ki na uluna, ni sa tiko ko koya me kana.

⁸ Ia ni sa raica ko ira na nona tisaipeli, era sa cudru sara, ka kaya, “Sa biu walega oqori e na vuku ni cava?

⁹ Sa rawa me volitaki na waiwai oqo me levu kina nai lavo ka me soli vei ira na dravudravua.”

¹⁰ Ia ni sa kila ko Jisu, sa kaya vei ira, “Dou sa saga na yalewa e na vuku ni cava? Sa cakava vei au e dua na cakacaka vinaka.

¹¹ Ni sa tiko vakadua kei kemudou ko ira na dravudravua, ia koi au, ka'u na sega ni tiko vakadua kei kemudou.

¹² Ni sa livia ko koya nai lumu oqo ki na yagoqu, sa kitaka me noqu i lumu ni bulu.

¹³ Au sa kaya vakaidina vei kemudou, E na veiyasana kecega e vuravura taucoko ena vunautaki kina nai tukutuku-vinaka oqo, ena bau tukuni talega kina na ka sa kitaka na yalewa oqo, me kenai divi.”

Sa Volitaki Jisu ko Jutasa

¹⁴ Sa qai dua vei ira na lewe tinikarua, sa vakatokai ko Jutasa Isikarioti, sa lako vei ira na bete levu,

¹⁵ ka kaya, “A cava dou sa via solia vei au, kevaka ka'u na soli koya yani vei kemudou?” A ra sa vakarautaka vua e tolusagavulu na tiki ni siliva.

¹⁶ Ia mai na siga ko ya sa vakaraica ko koya na gauna e rawarawa me soli koya kina.

Na Solevu ni Lako-sivia kei Iratou na Tisaipeli

¹⁷ Ia e nai matai ni siga ni kana madrai sa sega ni vakaleveni, sa lako mai vei Jisu ko ira na tisaipeli, ka kaya vua, “Evei na tikina ko ni sa vinakata me keitou vakarautaka mo ni kania kina na kakana ni Lako-sivia?”

¹⁸ A sa kaya ko koya, “Lako vua na tamata ko ya ki na koro, ka kaya vua, ‘Sa kaya nai Vakavuvuli, Sa voleka na noqu siga; koi au kei ira na noqu tisaipeli, keitou na ia na solevu ni Lako-sivia e na nomu vale.’ ”

¹⁹ A ra sa kitaka na tisaipeli me vaka sa vakarota vei ira ko Jisu; a ra sa vakarautaka me ra ia na kana vata ni Lako-sivia.

²⁰ Ia ni sa yakavi mai, sa tiko sobu ko koya kei ira na lewe tinikarua.

²¹ Ia ni ra sa kana tiko, sa kaya ko koya, “Au sa kaya vakaidina vei kemudou, ni na soli au yani e dua vei kemudou.”

²² Era sa qai rarawa vakalevu, a ra sa vakatekivu yadua me kaya vua, “Noqu Turaga, koi au beka?”

²³ A sa vosa ko koya, ka kaya, “O koya keirau sa tokoca vata kaya na ligana e na bilo, sai koya ena soli au yani.

²⁴ Sa lako na Luve ni Tamata me vaka sa volai e na vukuna, ia sa ca vua na tamata ko ya sa solia yani na Luve ni Tamata! Ke sa sega ni sucu mai na tamata ko ya, ke sa vinaka vua.”

²⁵ Sa qai vosa ko Jutasa, o koya sa solia yani, ka kaya, “Vakavuvuli, koi au beka?” Sa kaya vua ko koya, “O sa kaya dina mai.”

A sa Vakatekivuna nai Vakayakavi ni Turaga

²⁶ Ia ni ra sa kana tiko sa taura na madrai ko Jisu, ia ni sa vakalougatataka oti, sa dovia, ka solia vei ira na tisaipeli, ka kaya, “Taura, kania; oqo na yagoqu.”

²⁷ Sa qai taura na bilo ko koya, ia ni sa vakavinavinaka oti, sa solia vei ira, ka kaya, “Dou gunu kece kina;

²⁸ oqo na noqu dra ni veiyalayalati vou sa liviraki e na vukudra e lewe vuqa, me vosoti kina nai valavala ca.

²⁹ Ia ka'u sa kaya vei kemudou, Au na sega ni gunuva e muri na vua-ni-vaini oqo, ka malua me yaco mada na siga ka'u na gunuva vou kina kei kemudou e na matanitu nei Tamaqu.”

³⁰ Ia ni ra sa sere oti, era sa lako yani ki na ulunivanua ni veiolive.

Sa Tukuna Rawa ko Jisu ni na Cakitaki Koya ko Pita

³¹ Sa qai kaya vei ira ko Jisu, “Dou na tarabe kecega e na vukuqu e na bogi edaidai, ni sa volai, ‘Au na yavita nai vakatawa ni sipi, ka ra na dui vakasesei na qele ni sipi.’

³² Ia ni ka'u sa tucake tale mai, au na qai liutaki kemudou ki Kalili.”

³³ Sa qai vosa ko Pita, ka kaya vua, Kevaka ena tarabe ko ira kecega e na vukumuni, koi au, ka'u na sega ni tarabe.

³⁴ Sa kaya vua ko Jisu, “Au sa kaya vei iko, e na bogi ga edaidai, ni sa sega ni tagi mada eliu na toa, ko na cakitaki au vakatolu.”

³⁵ Sa kaya vua ko Pita, “Kevaka edaru na mate vata, au na sega sara ni cakitaki kemuni.” Sa vosa vaka talega kina ko ira kecega na tisaipeli.

Sa Masu mai Kecisemani ko Jisu

³⁶ Sa qai lako mai ko Jisu kei ira ki na dua na yasana sa vakatokai ko Kecisemani, a sa kaya vei ira na tisaipeli, “Dou tiko ga eke, me'u lako mada ki kea me'u masu.”

³⁷ A sa kauti Pita ko koya kei rau na luve i Sepete, a sa vakatekivu me rarawa na lomana ka yaluma sara.

³⁸ Sa qai kaya vei iratou ko koya, “Sa rarawa vakalevu na yaloqu, me vaka ka'u na mate. Dou tiko ga eke, me datou vakatawa.”

³⁹ A sa lako vakalailai vaka ki liu ko koya, a sa cuva sobu vakatoboicu, a sa masu, ka kaya, “I Tamaqu, kevaka e rawarawa, me lako tani mada vei au na bilo oqo! Ia me kakua ga ni vaka na noqu lewa, me vaka ga na nomu lewa.”

⁴⁰ A sa qai lako mai vei iratou na tisaipeli, a sa kunei iratou ni ratou sa moce, a sa kaya vei Pita, “Oi! Dou sa sega ni rawata me datou vakatawa vata ka dua bauga na aua, ne?

⁴¹ Dou vakatawa ka masu, me kakua ni rawai kemudou na vere. E dina ga sa gu na yalo, ia na yago sa malumalumu.”

⁴² Sa lako vakarua ko koya ka masu, ka kaya, “I Tamaqu, kevaka e sega ni rawa me takali tani vei au na bilo oqo, ka me'u gunuva ga, me yaco ga na nomu lewa.”

⁴³ Sa qai lako mai ko koya, a sa kunei iratou ni ratou sa moce tale, ni sa bibi na matadratou.

⁴⁴ A sa laivi iratou ko koya, a sa qai lako tale yani, ka masu vakatolu, ka sa cavuta tale na vosa ko ya.

⁴⁵ Sa qai lako mai vei iratou na nona tisaipeli, ka kaya vei iratou, “Dou se moce ga, ka dou se vakacegu? Raica! Sa voleka na gauna, ka sa soli yani na Luve ni Tamata ki na ligadra na tamata ca.

⁴⁶ Tucake, me datou lako. Raica, sa tu oqo ko koya me soli au yani.”

Sa Vesu ko Jisu

⁴⁷ Ia ni se vosa tiko ko koya, raica, sa lako mai ko Jutasa, e dua vei ira na le tinikarua, kei ira vata kaya e lewe vuqa sara era sa vakaiseleiwau, ka vakaiwau, mai vei ira na bete levu kei ira na nodra qase na tamata.

⁴⁸ Ia ko koya sa soli koya yani sa tukuna oti vei ira e dua nai vakatakilakila, ka kaya, “O koya ka'u na reguca, sai koya! Dou taura matua.”

⁴⁹ Sa qai lako sara mai vei Jisu, ka kaya, “Vakavuvuli, ni sa bula!” Ka sa reguci koya.

⁵⁰ Sa kaya vua ko Jisu, “Noqu i tau, mo kitaka ga na ka ko mai cakava.” Era sa qai lako mai ka tauri Jisu ka vesuka.

⁵¹ Ka raica, e dua vei ira sa tiko vata kei Jisu sa ucuna na nona i seleiwau ka sa yavita na nona tamata na bete levu, ka sa taya laivi na daligana.

⁵² Sa qai kaya vua ko Jisu, “Daramaka tale na nomu i seleiwau ki na kena taga, ni ra na mate e nai seleiwau ko ira kece era taura nai seleiwau.

⁵³ Ko sa nanuma beka e sega ni rawarawa vei au me'u masuti Tamaqu, ka na solia sara mai vei au ko koya na agilosi e tinikarua nai vavakoso ka mani vakacaca?

⁵⁴ Ena qai vakayacori vakaevei nai Vola Tabu sa tukuna na kena yaco me vakaoqo?”

⁵⁵ E na tiki-ni-bogi ko ya sa kaya ko Jisu vei ira na lewe vuqa, “Dou sa lakova li e dua na daubutako, ni dou sa vakaiseleiwau ka vakaiwau, mo dou tauri au? Au a dautiko sobu vata kei kemudou e na veisiga, ka vakatavuvuli e na vale-ni-soro, ia dou a sega ni tauri au.

⁵⁶ Ia sa caka kecega na ka oqo, me vakayacori kina na nodra i vola na parofita.” Sa qai biuti koya ko ira kecega na tisaipeli, ka dro.

Era sa kauta vei Kaiafa

⁵⁷ Ia ko ira sa tauri Jisu era sa kauta yani vei Kaiafa na bete levu, ki na yasana era sa soqoni vata kina na vunivola kei na qase.

⁵⁸ A sa muri koya vakayawa ko Pita ki na vale ni bete levu, a sa curu kina, ka sa tiko sobu vata kei ira na ovisa, me raica mada na kenai cavacava.

⁵⁹ Ia ko ira na bete levu, kei ira kecega na mataveilewai, era vakasaqara eso me ra mai beitaki Jisu vakailasu, me mate kina ko koya,

⁶⁰ ka mani sega ni kunea; ia, sa le vuqa era beitaka vakailasu era lako mai. Ka oti sa qai lako mai e lewe rua,

⁶¹ a rau sa kaya, “O koya oqo sa kaya, ‘Au sa rawata me'u basuka na vale-ni-soro ni Kalou, ka tara tale e na bogi e tolu.’ ”

⁶² Sa qai tucake na bete levu, ka kaya vua, “Sa sega na ka ko kaya mai, ne? A cava oqo erau sa beitaki iko kina koi rau oqo?”

⁶³ A sa galu ga ko Jisu. A sa qai vosa na bete levu, ka kaya vua, “Au vakaroti iko matua ena mata ni Kalou bula, mo tukuna mai vei keitou se ko iko na Karisito, na Luve ni Kalou, se segai.”

⁶⁴ Sa kaya vua ko Jisu, “O sa kaya dina mai. Ia ka'u sa kaya talega vei kemudou, E na gauna mai muri dou na raica na Luve ni Tamata ni sa tiko e na liga i matau i Koya sa Kaukauwa, ni sa lako talega mai e na veio ni lomalagi.”

⁶⁵ Sa qai dresulaka na nona i sulu na bete levu, ka kaya, “Sa qai vosavakacacataka na Kalou ko koya! Sa yaga vakacava me so tale nai vakadinadina? Dou sa rogoca oqo na nona vosavakacacataka na Kalou.

⁶⁶ A cava dou sa lewa?” A ra sa vosa ka kaya, “E dodonu ga me mate.”

⁶⁷ Era sa qai kasivita na matana, ka vaculaka; a sa sabica ko ira eso,

⁶⁸ ka kaya, “Parofisai vei keitou, ko iko na Karisito! Ko cei sa sabici iko?”

Sa Cakitaki Jisu ko Pita

⁶⁹ A sa tiko e tautuba ko Pita e na rara ni vale, a sa dua na vada sa lako vua, ka kaya, “Ko iko talega ka tiko vata kei Jisu na kai Kalili.”

⁷⁰ A sa cakitaka ko koya e matadra kecega, ka kaya, “Au sa sega ni kila na ka ko sa kaya.”

⁷¹ Ni sa qai lako ko koya vaka ki na katuba, sa dua tale na vada sa raica, a sa kaya vei ira sa tiko kina, “O koya talega oqo erau a tiko vata kei Jisu na kai Nasareci.”

⁷² A sa cakitaka tale ko koya ka bubului kina, ka vaka, “Au sa sega ni kila na tamata ko ya.”

⁷³ Sa dede vakalailai ga ka sa lako mai ko ira era a tu kina, a ra sa kaya vei Pita, “Sa dina ga sa dua vei ira ko iko; ni sa tukuni iko na nomu vosa.”

⁷⁴ Sa qai vakatekivu ko koya me ruru ka bubului, ka vaka, “Au sa sega ni kila na tamata ko ya.” Sa qai tagi sara na toa.

⁷⁵ Sa qai nanuma na vosa i Jisu ko Pita, ni sa kaya vua, “Ena sega mada ni tagi eliu na toa, ko na cakitaki au vakatolu.” A sa curu ki tautuba, ka tagi vakalevu sara.