Maciu 25 - Ai Vola Tabu (Vakadewa Makawa Vakavoutaki 2021)

Na Vosa Vakatautauvata ni Goneyalewa e Lewe Tini

¹ “Ena qai vakatautauvatataki na matanitu vakalomalagi kei na goneyalewa e lewe tini, eratou sa dui kauta na nona cina, ka laki veitata kei na tagane sa qai vakawati.

² Ka lewe lima vei iratou sa vuku, ka lewe lima sa lialia.

³ O iratou na lialia eratou sa kauta na nodratou veicina, a ratou sa sega ni kauta vata kei na waiwai,

⁴ ia ko iratou na vuku eratou sa kauta na waiwai e na nodratou tavaya, kei na nodratou cina.

⁵ Ia ni sa dede mai na tagane sa qai vakawati, eratou sa sosovu kecega ka moce.

⁶ Ni sa qai lomaloma ni bogi na vanua, sa ia na kacikaci, ‘Raica, sa lako mai na tagane sa qai vakawati! Dou laki veitatavaki kaya.’

⁷ Eratou sa qai tucake kecega na goneyalewa oqo, a ratou sa vakarautaka na nodratou cina.

⁸ A sa kaya ko iratou na lialia vei iratou na vuku, ‘Solia mai vei keitou e dua na nomudou waiwai, ni sa boko na neitou cina.’

⁹ A sa kaya ko iratou na vuku, ‘De se sega ni veirauti vei keda; e vinaka mo dou lako ga vei ira na dauveivoli ka volia na nomudou.’

¹⁰ Ia ni ratou sa lako me ratou volivoli, sa tadu mai na tagane sa qai vakawati, ia ko iratou sa vakarau oti tu, eratou sa curu vata kaya ki na kana magiti ni vakawati, a sa qai sogo na katuba.

¹¹ Sa qai lako talega mai e muri ko iratou na goneyalewa ko ya, ka kaya, ‘Noqu Turaga, Noqu Turaga, dolavi keitou.’

¹² A sa vosa ko koya, ka kaya, ‘Au sa kaya vakaidina vei kemudou, au sa sega ni kilai kemudou.’

¹³ O koya mo dou qai vakatawa, ni dou sa sega ni kila na siga, se na tiki-ni-siga sa lako mai kina na Luve ni Tamata.

Na Vosa Vakatautauvata ni Taledi

¹⁴ “Ni sa tautauvata ko koya kei na dua na tamata sa lako ki na dua na vanua tani, ka sa kacivi ira mada na nona tamata, ka solia vei ira na nona i yau.

¹⁵ Sa solia vua e dua e lima na taledi, vua tale e dua e rua, vua tale e dua e dua bauga, vei ira yadua me vaka sa dui rauti ira yadua. A sa qai lako sara yani.

¹⁶ Ia ko koya sa taura na taledi e lima sa laki veivoli kina, a sa rawata e lima tale na taledi.

¹⁷ Sa vaka talega kina ko koya sa taura e rua, sa rawata e rua tale.

¹⁸ Ia ko koya sa taura e dua bau, sa lako ka kelia e dua na qara, ka vunia kina nai lavo ni nona turaga.

¹⁹ Sa dede sara sa qai lako mai na nodra turaga na tamata oqori, a sa tarogi ira.

²⁰ Ia ko koya ka taura na taledi e lima, sa lako mai ka kauta mai e lima tale na taledi, ka kaya, ‘Noqu Turaga, e lima na taledi ko ni a solia mai vei au; raica, au sa rawata e lima tale na taledi me kenai kuri.’

²¹ A sa kaya vua na nona turaga, ‘E vinaka, a tamata vinaka ka dina. Ko sa dina e na ka e vica ga, au na lesi iko mo lewa na ka e vuqa. Curu ki na marau ni nomu turaga.’

²² O koya talega ka taura na taledi e rua, sa lako mai ka kaya, ‘Noqu Turaga, e rua na taledi ko ni a solia mai vei au, raica, au sa rawata e rua tale na taledi me kenai kuri.’

²³ Sa kaya vei koya na nona turaga, ‘E vinaka a tamata vinaka ka dina. Ko sa dina e na ka e vica ga, au na lesi iko mo lewa na ka e vuqa. Curu ki na marau ni nomu turaga.’

²⁴ Ia ko koya ka taura na taledi e dua bauga, sa lako mai ka kaya, ‘Noqu Turaga, au sa kilai iko, ni ko sa tamata lawaki dredre, ko sa tamusuka e na vanua ko a sega ni kaburaka kina, ka kumuna mai na vanua ko a sega ni veibiuyaka kina,

²⁵ ia ka'u a rere kina, ka laki vunia na nomu taledi e na qele. Raica, oqo na nomu sa tu tale vei iko.’

²⁶ Sa qai vosa vei koya na nona turaga, ka kaya, ‘A tamata ca ka vucesa! Ko sa kila ni'u sa tamusuka e na vanua ka'u a sega ni kaburaka kina, ka kumuna mai na vanua ka'u a sega ni veibiuyaka kina.

²⁷ O koya ga oqo e kilikili kina kei iko mo solia na noqu i lavo vei ira nai taukei ni baqe, ka ni'u sa lako mai me'u sa qai taura na noqu kei na kenai kere talega.

²⁸ O koya mo dou qai kauta tani vua na taledi, ka solia vua sa tu vei koya na taledi e tini.

²⁹ Ni sa tu vua na tamata e dua na ka, ena qai soli vua ka na levu na nona, ia na tamata sa sega ni tu vua e dua na ka, ena qai kau tani mai vua na ka sa tu vua.

³⁰ Ia na tamata tawa yaga oqo mo dou biuta ki na butobuto e tautuba, ena dautagi kina, ka vakasequruquru bati.’

Nai Otioti ni Veilewai

³¹ “Ia e na siga ena lako mai kina na Luve ni Tamata e na nona i ukuuku, kei ira vata kaya na agilosi yalosavasava kecega, ena qai tiko e na nona i tikotiko vakaturaga sa vakaiukuuku.

³² Ena qai soqoni vata e matana na lewe ni veivanua kecega, ena qai tawasei ira rua ko koya, me vaka nai vakatawa ni sipi sa tawasei ira na sipi mai vei ira na me.

³³ Ia ena vakatikori ira na sipi e na ligana i matau, kei ira na me e na ligana i mawi.

³⁴ Ena qai kaya na Tui vei ira e na ligana i matau, ‘Ni lako mai, koi kemuni sa vakalougatataki vei Tamaqu, mo ni rawata na matanitu sa vakarautaki me nomuni mai nai vakatekivu kei vuravura.

³⁵ Ni ka'u a viakana, ko ni a solia mai vei au na kakana, au a viagunu, ko ni a vagunuvi au, au a vulagi, ko ni a kauti au ki vale;

³⁶ au a luvawale, ko ni a vakasulumi au; au a tauvi-mate, ko ni a mai raici au, au a tiko e na valeniveivesu, ko ni a mai sikovi au.’

³⁷ Ena qai vosa vua ko ira na yalododonu, ka kaya, ‘Na Turaga, keimami a raici kemuni mada ninaica ni kemuni a viakana, ka vakani kemuni? Se viagunu, ka vagunuvi kemuni?

³⁸ Se keimami a raici kemuni ninaica ni kemuni a vulagi, ka kauti kemuni ki vale? Se luvawale, ka vakasulumi kemuni?

³⁹ Se keimami a raici kemuni ninaica ni kemuni a tauvi-mate, se tiko e na valeniveivesu, ka sikovi kemuni?’

⁴⁰ Ena qai vosa na Tui, ka kaya vei ira, ‘Au sa kaya vakaidina vei kemuni, ni veika kemuni a cakava vua e dua sa lailai vei ira na wekaqu oqo, o ni a cakava vei au.’

⁴¹ “Ena qai vosa talega ko koya vei ira e na ligana i mawi, ‘Ni lako tani vei au koi kemuni sa cudruvi, ki na bukawaqa tawa boko sa vakarautaki me nona na tevoro kei na nona agilosi;

⁴² ni ka'u a viakana ka o ni a sega ni solia mai vei au na kakana, au a viagunu, ka o ni a sega ni vagunuvi au,

⁴³ au a vulagi, ka o ni a sega ni kauti au ki vale, luvawale ka o ni a sega ni vakasulumi au, tauvi-mate ka tiko e na valeniveivesu ka o ni a sega ni mai raici au.’

⁴⁴ Ena qai vosa vua ko ira talega, ka kaya, ‘Na Turaga, keimami a raici kemuni ninaica ni kemuni a viakana, se viagunu, se vulagi, se luvawale, se tauvi-mate, se tiko e na valeniveivesu, ka sega ni qaravi kemuni?’

⁴⁵ Ena qai vosa vei ira ko koya, ka kaya, ‘Au sa kaya vakaidina vei kemuni, Ni kemuni a sega ni cakava vua e dua sa lailai vei ira oqo, kemuni a sega talega ni cakava vei au.’

⁴⁶ Era na qai lako ko ira oqo ki na cudruvi tawa mudu; ia ko ira na yalododonu ki na bula tawa mudu.”