Maciu 24 - Ai Vola Tabu (Vakadewa Makawa Vakavoutaki 2021)

Sa Tukuna e liu ko Jisu na Vakarusai ni Valenisoro

¹ Ni sa biuta mai na vale-ni-soro ko Jisu me lako yani, a ra sa lako mai na nona tisaipeli me ra vakatakila vua na veivale e na vale-ni-soro.

² A sa kaya vei ira ko Jisu, “Dou sa raica na ka kecega oqo, ne? Au sa kaya vakaidina vei kemudou, Ena sega ni vo tu eke na veivatu sa veitaqataqai, ena talaraki sobu kecega.”

Nai Vakatakilakila ni Vakataotioti ni Gauna

³ Ia ni sa tiko ko koya mai na ulunivanua ni veiolive, sa lako vuni vua ko ira na tisaipeli, ka kaya, “Ni tukuna mai vei keitou, se na yaco ninaica na veika oqo? Ia ka cava nai vakatakilakila ni nomuni lako mai, kei nai vakataotioti kei vuravura?”

⁴ A sa vosa ko Jisu, ka kaya vei ira, “Qarauni kemudou vinaka de vakacalai kemudou e dua.

⁵ Ni ra na lewe vuqa era na lako mai ka vakacavutaki au, ka kaya, ‘Oi au na Karisito;’ ia ka lewe vuqa era na vakacala.

⁶ Ia dou na rogoca nai valu kei nai rogorogo ni valu. Mo dou kakua ni kidroa, ni sa kilikili me yaco na ka oqo, ia ka sa bera ga nai vakataotioti.

⁷ Ni na veibolebolei na veivanua eso kei na veimatanitu eso, ka na yaco talega na dausiga kei na tavuki ni vanua e na yasana e vuqa.

⁸ Ia na ka kecega oqo sa kenai vakatekivu ni ka rarawa.

Kacivaki na Veivakararawataki

⁹ “Dou na qai soli yani me vakararawataki, ka dou na vakamatei; ia dou na cati vei ira na lewe ni veivanua kecega e na vuku ni yacaqu.

¹⁰ Ia ena lewe vuqa era na qai tarabe, a ra na veisoliyaki, ka veicati.

¹¹ Ena lewe vuqa talega na parofita vakailasu ena tubu cake mai, ia ka lewe vuqa era na vakacala.

¹² Ia ni sa tubu vakalevu nai valavala ca, ena batabata mai na nodra loloma na lewe vuqa.

¹³ Ia ko koya ena vosota me yacova nai vakataotioti, ena vakabulai ko koya.

¹⁴ Ia ena vunautaki mada e vuravura taucoko nai tukutuku-vinaka oqo kei na matanitu, mei vakadinadina ki na veivanua kecega; sa na qai yaco e muri nai vakataotioti.

Na Ka Vakasisila e Dauveivakarusai

¹⁵ “Ia ni dou sa raica sa tu e na vale tabu na ka vakasisila sa dauveivakarusai, o koya sa vosa kina ko Taniela na parofita (me kila mada ko koya sa wilika),

¹⁶ me qai se ki na veiulunivanua ko ira era sa tiko e Jutia.

¹⁷ Me kakua ni lako sobu mai ko koya sa tiko e dela ni vale me kauta tani na ka mai nona vale,

¹⁸ ka me kakua ni lesu tale ko koya sa tiko e na were me kauta mai na nona i sulu.

¹⁹ Ka na ca vei ira e ra sa bukete, kei ira era sa vakasucuma na gone, e na gauna ko ya!

²⁰ Ia dou masu me kakua ni yaco na nomudou veiseyaki e na vula i liliwa, se e na Siga ni Vakacecegu.

²¹ Ni na qai levu sara na rarawa, ka sega ni vakakina eliu mai nai vakatekivu kei vuravura ka yacova na gauna oqo, ka na sega sara talega e muri.

²² Ia kevaka ena sega ni vakalekalekataki na gauna ko ya, ena sega na tamata me bula rawa. Ia e na vukudra na digitaki ena vakalekalekataki kina na gauna ko ya.

²³ Kevaka ena qai kaya vei kemudou e dua, ‘Raica, sa tiko eke na Karisito;’ se, ‘Sa tiko mai kea!’—kakua ni vakadinata.

²⁴ Ni na tubu mai na Karisito vakailasu eso, kei na parofita vakailasu eso, a ra na vakatakila na veivakatakilakila lelevu kei na veika e veivakurabuitaki; ia ke rawa, ke ra na vakacalai ira talega na digitaki.

²⁵ Raica, au sa qai tukuna oti vei kemudou ni se bera ni yaco.

²⁶ Kevaka era na kaya vei kemudou, ‘Raica! Sa tiko ko koya mai veikau,’ kakua ni lako kina. ‘Raica! Sa tiko mai loqi!’ Kakua ni vakadinata.

²⁷ Me vaka sa tibi na livaliva mai na tokalau, ka sa rairai yani ki na ra; ena vaka talega kina na nona lako mai na Luve ni Tamata.

²⁸ Ni ra na soqoni vata na vulituri ki na yasana kece sa koto kina na yago mate.

Na Lako Mai ni Luve ni Tamata

²⁹ “Ia ni sa oti mada na gauna rarawa ko ya, ena qai vakabutobutotaki vakasauri na mata-ni-siga, ena sega talega ni cila na rarama ni vula; ka na lutu mai lomalagi na veikalokalo, ka na veitosoyaki na veika kaukauwa ni lomalagi.

³⁰ Ena qai rairai mai nai vakatakilakila ni Luve ni Tamata mai lomalagi; ena qai tagi na yavusa vakaaduaga e vuravura, era na qai raica na ‘Luve ni Tamata ni sa lako mai ena vei o mai lomalagi’ e na kaukauwa kei nai ukuuku levu.

³¹ Ia ena talai ira na nona agilosi ko koya kei na davui sa rogolevu, ka ra na vakasoqoni ira vata na nona digitaki mai na mata ni cagi e va, mai na vu ni lomalagi e dua ka yacova na vu ni lomalagi kadua.

Na Lesoni ni Vuni Lolo

³² “Mo dou kila mada na vosa vakatautauvata mai na vuni lolo: ni sa qai lavovou na tabana, a sa tubu na drauna, dou sa kila kina sa voleka na vula i katakata.

³³ Sa vaka talega kina koi kemudou, ni dou sa raica na ka kecega oqo, dou kila sa voleka ko koya, io mai na mata ni katuba.

³⁴ Au sa kaya vakaidina vei kemudou, ena sega ni takali mada nai tabatamata oqo, ena yaco eliu na ka kecega oqo.

³⁵ Ena takali ko lomalagi kei vuravura, ia na noqu vosa ena sega ni takali.

Na Yadravi ni Lako Mai ni Luve ni Tamata

³⁶ “Ia na siga ko ya kei na tiki-ni-siga ko ya sa sega e dua e kila, ko ira na agilosi mai lomalagi era sega ni kila, se ko koya na Luvena, ko koya duaduaga na Tamaqu.

³⁷ Ia me vaka e na siga i Noa, ena vaka talega kina e na nona lako mai na Luve ni Tamata.

³⁸ Ni se bera na waluvu era sa kana na tamata, ka gunu, ka vakawati ka veimusumusukitaki me ra vakawati, ka yacova na siga sa vodo kina ki waqa ko Noa,

³⁹ a ra sa sega mada ni kila eliu me yacova ni sa qai yaco dina na waluvu, ka kauti ira kece yani; ena vaka talega kina na nona lako mai na Luve ni Tamata.

⁴⁰ Ena qai lewe rua na tagane erau na tiko e na were; ena kau tani e dua, ka biu e dua.

⁴¹ Ena lewe rua na yalewa erau na qaqi sila, ena kau tani e dua, ka biu e dua.

⁴² O koya mo dou qai vakatawa; ni dou sa sega ni kila na tiki-ni-siga sa lako mai kina na nomudou Turaga.

⁴³ Ia dou kila ga oqo, kevaka e kila nai taukei ni vale na tiki-ni-bogi e lako mai kina na daubutako, sa vakatawa ga, ka sega ni biuta na nona vale me ravabasuki.

⁴⁴ O koya mo dou qai vakarau tu, koi kemudou talega, ni sa lako mai na Luve ni Tamata e na tiki-ni-siga dou sa sega ni nanuma kina.

Na Dauveiqaravi Yalo Dina se Tawa Yalo Dina

⁴⁵ “Ia ko cei na tamata yalododonu ka vuku, sa lesia na nona turaga me lewai ira na nona lewe-ni-vuvale, me solia vei ira na kedra e na gauna dodonu?

⁴⁶ Sa kalougata na tamata ko ya, ni na lako mai na nona turaga ka kunei koya ni sa kitaka vakakina.

⁴⁷ Au sa kaya vakaidina vei kemudou, ena lesi koya me lewa na nona ka kecega.

⁴⁸ Ia kevaka ena kaya e lomana na tamata ca ko ya, ‘Sa vakaberaberataka na nona lako mai na noqu turaga,’

⁴⁹ ka sa vakatekivu kina me yaviti ira na nona bobula, ka sa daukana talega ka daugunu vata kei ira na daumateni,

⁵⁰ ena lako mai na turaga ni tamata ko ya e na siga e sega ni nanuma kina, kei na tiki-ni-siga e sega ni kila kina.

⁵¹ Ena qai varomusuka rua, ka vota vua mei votavota vata kei ira na dauveivakaisini, ena dautagi kina ka vakasequruquru bati.