Maciu 22 - Ai Vola Tabu (Vakadewa Makawa Vakavoutaki 2021)

Na Vosa Vakatautauvata ni Magiti ni Vakawati

¹ A sa vosa tale ko Jisu, ka tukuna vei ira na vosa vakatautauvata, ka kaya,

² “Sa tautauvata na matanitu vakalomalagi kei na dua na tui, ko koya sa cakava na magiti ni vakawati ni luvena-tagane.

³ A sa talai ira yani na nona tamata me ra lakovi ira ka sureti ki na kana magiti ni vakawati, ia era sa sega ni via lako mai.

⁴ Sa qai tala tale ko koya eso tale na tamata, ka kaya, ‘Laki kaya vei ira era sureti: Raica, ka'u sa vakarautaka oti na noqu i vakasigalevu, sa vakamatei eso na noqu bulumakau, kei na noqu manumanu uro, ka sa vakarautaki oti tu na ka kecega. Dou lako mai ki na magiti ni vakawati.’

⁵ Ia era sa vakaweleweletaka, ka ra sa dui lako, e dua ki na nona were, ka dua ki na nona veivoli,

⁶ ia ko ira na kena vo era sa tauri ira na nona tamata, ka vakacacana, ka vakamatea.

⁷ Ni sa qai rogoca na tui, sa cudru ko koya. A sa talai ira na nona mataivalu, ka vakawabokotaki ira na daulaba ko ya ka vakama na nodra koro.

⁸ Sa qai kaya ko koya vei ira na nona tamata, ‘Sa vakarautaki oti tu na magiti ni vakawati, ia era sa sega ni yaga kina ko ira ka sureti.

⁹ O koya mo dou qai lako ki na veisalatu, ia ko ira kecega dou na kunea, dou sureti ira mai ki na magiti ni vakawati.’

¹⁰ Era sa qai lako yani ko ira na tamata oqori ki na veisalatu, ka vakasoqoni ira kecega era sa kunea, se ra ca se ra vinaka. A sa mai tiko me ra kania na magiti ni vakawati.

¹¹ “Ni sa qai curu mai na tui me raici ira era sa tiko me ra kana, a sa raica kina e dua na tamata sa sega ni vakaisulu e nai sulu ni vakawati,

¹² a sa kaya vua, ‘Noqu i tau, e vakaevei ni ko sa curu mai ki ke ni sa sega vei iko nai sulu ni vakawati?’ A sa vagagalu ga ko koya.

¹³ Sa qai kaya na tui vei ira na nona tamata, ‘Dou vesuka, na yavana kei na ligana, ka kauti koya tani, ka biuta ki na butobuto e tautuba; ena dautagi kina, ka vakasequruquru bati.’

¹⁴ Ni ra sa lewe vuqa era sa kacivi, ka lewe lailai era sa digitaki.”

Na Taro me Baleta na Saumi i Vakacavacava

¹⁵ Sa ra qai lako ko ira na Farisi, a ra bose se ra na coriti koya vakaevei e na nona vosa.

¹⁶ A ra sa talai ira na nodra tisaipeli vua, kei ira nai tokani i Eroti, me ra kaya, “Vakavuvuli, keitou sa kila ko sa dina, ka sa vakatavuvulitaka vakaidina nai valavala sa vinaka vua na Kalou, ia ko sa sega ni rerevaka e dua, ni ko sa sega ni doka na matadra na tamata.

¹⁷ O koya mo qai tukuna vei keitou, A cava ko lewa? Sa tara me da soli-ka ni matanitu vei Sisa, se segai?”

¹⁸ A sa kila na nodra yalo ca ko Jisu, ka kaya, “Dou sa dauveretaki au e na vuku ni cava, koi kemudou na dauveivakaisini?

¹⁹ Vakatakila mai vei au nai lavo ni soli.” A ra sa kauta mai vua e dua na pene.

²⁰ A sa kaya vei ira ko koya, “A mata i cei oqo, kei na yaca i cei sa volai tu?”

²¹ Era sa kaya vua, “A nei Sisa.” Sa qai kaya vei ira ko koya, “Mo dou qai solia vei Sisa na ka nei Sisa; vei koya talega na Kalou na ka sa nona na Kalou.”

²² Ia ni ra sa rogoca, era sa kurabui; a ra sa laivi koya, ka lako yani.

Na Taro me Baleta na Tucake Tale Mai na Mate

²³ E na siga ko ya era sa lako mai vei koya eso nai tokani i Setoki, ko ira era sa dau kaya ni na sega ni tucake tale na mate, a ra sa taroga,

²⁴ ka kaya, “Vakavuvuli, sa kaya ko Mosese, ‘Kevaka sa mate e dua na tamata vakawati, ka sega na luvena, me rau qai veiwatini kei na nona yada na tuakana se na tacina, me vakaivakawa kina ko koya vua na tacina se tuakana.’

²⁵ Ia ka tiko kei keitou na mataveitacini eratou lewe vitu. A sa vakawati ko koya sa qase, a sa mate, ka sega na luvena, a sa laiva vua na tacina na watina.

²⁶ A sa vaka talega kina nai karua, kei nai katolu, ka yaco ki nai kavitu.

²⁷ Sa qai mate e muri na yalewa.

²⁸ Ia ni na tucake tale na mate, ena wati cei vei iratou na lewe vitu ko koya? Ni ratou sa watina ko iratou kecega.”

²⁹ A sa vosa ko Jisu, ka kaya vei ira, “Dou sa sese, ni dou sa sega ni kila nai Vola Tabu, se na kaukauwa ni Kalou.

³⁰ Ni ra na tucake tale na mate, era na sega ni vakawati, se veimusumusukitaki me ra vakawati; era na vakataki ira ga na agilosi mai lomalagi.

³¹ Ia e na vuku ni nodra tucake tale na mate, dou sa sega li ni wilika na ka sa vosataka vei kemudou na Kalou, ni sa kaya,

³² ‘Oi au na Kalou i Eparaama, kei na Kalou i Aisake, kei na Kalou i Jekope?’ A Kalou sa sega ni nodra Kalou era sa mate, sa nodra Kalou ga era sa bula tiko.”

³³ Ia ni ra sa rogoca na lewe vuqa, era sa kurabui e na nona i vakavuvuli.

Nai Vakaro Levu

³⁴ Ia ni ra sa rogoca na Farisi ni sa vagalui ira nai tokani i Setoki ko koya, era sa qai soqoni vata.

³⁵ A sa dua vei ira, e dua na vu-ni-vunau, sa tarogi koya, ni sa vakatovolea, ka kaya,

³⁶ “Vakavuvuli, a cava nai vakaro levu e na vunau?”

³⁷ Sa kaya vua ko Jisu, “Mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kecega,

³⁸ Ai matai ni vunau oqo, ka levu duadua.

³⁹ A sa tautauvata na kenai karua: ‘Mo lomana na kai nomu me vaka ko sa lomani iko.’

⁴⁰ Sa vu ni vunau taucoko kei ira na parofita na vunau e rua oqo.”

Na Taro me Baleta na Mesaia

⁴¹ Ia ni ra sa soqoni vata tiko na Farisi, sa tarogi ira ko Jisu,

⁴² ka kaya, “A cava dou lewa e na vuku i Karisito? A luve i cei ko koya?” Era sa kaya vua, “A luve i Tevita.”

⁴³ Sa kaya vei ira ko koya, “Sa vakaevei ni sa vakatokai koya me Turaga ko Tevita, ni sa vuna na Yalo Tabu, ka kaya,

⁴⁴ ‘Sa kaya ko Jiova vua na noqu Turaga, “Mo tiko e na ligaqu i matau, ka me'u biuti ira mada na nomu meca mei tutu-ni-yavamu” ’?

⁴⁵ Ia kevaka sa vakatokai koya ko Tevita me Turaga, sa qai luvena vakaevei?”

⁴⁶ A sa sega e dua sa kaya rawa vei koya e dua na vosa; a sa sega tale e dua e doudou me tarogi koya e na veisiga e muri.