Maciu 19 - Ai Vola Tabu (Vakadewa Makawa Vakavoutaki 2021)

Nai Vakavuvuli i Jisu me Baleta na Veibiu

¹ Ni sa vakaotia ko Jisu na vosa oqo, sa qai lako tani e Kalili, ka yaco ki na yasayasa vaka-Jutia e na tai kadua ni Joritani;

² a ra sa lewe vuqa sara era sa muri koya a sa vakabulai ira mai kea ko koya.

³ A sa lako mai vei koya ko ira na Farisi, ka vakatovolei koya, ka kaya vua, “Sa tara vua na tagane me biuta na watina e na vuku ni ka kecega, se segai?”

⁴ A sa vosa ko koya, ka kaya vei ira, “Dou a sega beka ni wilika, ko koya sa buli rau e nai vakatekivu ‘sa bulia ga na tagane kei na yalewa,’

⁵ a sa kaya, ‘E na vuku ni ka oqo ena biuti tamana kei na tinana na tagane, ka kabita na watina, a rau na lewe dua?’

⁶ O koya oqo erau sa sega kina ni lewe rua tiko, erau sa lewe dua ga. Ia na ka sa vauca vata na Kalou, me kakua ni tawasea rua na tamata.”

⁷ Era sa kaya vua, “A cava sa vakarota kina ko Mosese me solia vua nai vola ni veibiu, ka qai biuta tani?”

⁸ Sa kaya vei ira ko koya, “E na vuku ni nomudou lomakaukauwa sa vosoti kemudou kina ko Mosese mo dou biuta tani na watimudou, ia ka sega ni vakaoqo mai nai vakatekivu.

⁹ Ia ka'u sa kaya vei kemudou, O koya ena biuta tani na watina yalewa, ke sa sega ni dautagane, ka laki vakawati kei na dua tale, sa veibutakoci; kei koya talega erau laki veiwatini kaya sa biu, sa veibutakoci.”

¹⁰ Sa kaya vua ko ira na nona tisaipeli, “Ke sa vakaoqo na lewa vua na tagane kei na watina, ke sa vinaka me kakua ni ia na vakawati.”

¹¹ A sa kaya vei ira ko koya, “Sa sega ni rawata nai vakavuvuli oqo na tamata kecega, ko ira ga sa soli vei ira.

¹² Ni eso vei ira na mata sa sega ni vakawati mai na gauna ni nodra sucu, ka eso era vakayacori me ra mata mai vei ira tale eso, ka eso era sa vakayacori ira ga me ra mata e na vuku ni matanitu vakalomalagi. O koya sa rawata me vakabauta, me vakabauta sara.”

Sa Vakalougatataki Ira na Gone Lalai ko Jisu

¹³ Sa qai kau mai vua eso na gone lalai, me tabaki ira ko koya e na ligana, ka masulaka. A sa vunauci ira ko ira na tisaipeli.

¹⁴ A sa kaya ko Jisu, “Laivi ira na gone lalai, ka kakua ni tarovi ira ni ra sa lako mai vei au; ni sa nodra ko ira sa vaka oqo na matanitu vakalomalagi.”

¹⁵ A sa tabaki ira e na ligana ko koya, ka qai lako tani mai kea.

Na Cauravou Vutuniyau

¹⁶ Ka raica, sa lako mai e dua, ka kaya vua, “Vakavuvuli vinaka, a cava na ka vinaka me'u kitaka, me'u rawata kina na bula tawa mudu?”

¹⁷ A sa kaya vua ko koya, “A cava ko sa tarogi au kina e na vuku ni ka vinaka? Sa duabau ga sa vinaka; ia kevaka ko sa via curu ki na bula, mo muria na vunau.”

¹⁸ Sa kaya vua ko koya, “A vunau cava?” A sa kaya ko Jisu, “Mo kakua ni laba, Mo kakua ni ia na veibutakoci, Mo kakua ni butako, Mo kakua ni veibeitaki vakailasu,

¹⁹ Vakarokoroko vei rau na tamamu kei na tinamu; ka, Mo lomana na kai nomu me vaka ko sa lomani iko.”

²⁰ Sa kaya vei koya na cauravou, “A ka kecega oqori ka'u a vakabauta ga ni ka'u sa gone ka yacova na siga oqo; a cava tale sa vo vei au?”

²¹ Sa kaya vua ko Jisu, “Kevaka ko sa vinakata mo vinaka sara, mo lako, mo volitaka na nomu i yau, ka solia vei ira sa dravudravua, ko na qai vakaiyau mai lomalagi; ia mo lako mai ka muri au.”

²² Ia ni sa rogoca na vosa oqo na cauravou, sa lako tani a sa rarawa na lomana, ni sa levu na nona i yau.

²³ Sa qai kaya vei ira na nona tisaipeli ko Jisu, “Au sa kaya vakaidina vei kemudou, Ena dredre vua na tamata vutuniyau me curu ki na matanitu vakalomalagi.

²⁴ Ia ka'u sa kaya tale vei kemudou, sa rawarawa me curuma na mata ni cula na kameli, ia ka dredre vua na tamata vutuniyau me curu ki na matanitu ni Kalou.”

²⁵ Ia ni ra sa rogoca na nona tisaipeli, era sa kidacala sara, ka kaya, “O cei ena qai vakabulai rawa?”

²⁶ A sa vakaraici ira ko Jisu, ka kaya, vei ira, “Oqo sa dredre sara vei ira na tamata, ia sa rawarawa vua na Kalou na ka kecega.”

Nai Sau ni Muri Jisu

²⁷ Sa qai vosa ko Pita, ka kaya vua, “Raica, keitou sa biuta na ka kece, ka muri kemuni. A cava ena qai neitou?”

²⁸ A sa kaya vei ira ko Jisu, “Au sa kaya vakaidina vei kemudou, Oi kemudou sa muri au, ni na yaco na veivakadodonutaki, ni na tiko na Luve ni Tamata e nai tikotiko vakaturaga ni nona i ukuuku, dou na qai tiko talega e nai tikotiko vakaturaga e tinikarua, me lewai ira na yavusa e tinikarua ni Isireli.

²⁹ Ia ko koya yadua sa biuta na vale, se na veitacini, se na ganena, se na tamana, se na tinana, se na luvena, se na vanua, e na vuku ni yacaqu, ena yadrau ena rawata; ena taukena talega na bula tawa mudu.

³⁰ Ia era lewe vuqa sa liu era na muri; kei ira talega sa muri era na liu.