Maciu 18 - Ai Vola Tabu (Vakadewa Makawa Vakavoutaki 2021)

Ko Cei e Levu Duadua

¹ E na gauna ko ya sa lako mai vei Jisu ko ira na tisaipeli, ka taroga, “Ko cei sa levu cake e na matanitu vakalomalagi?”

² A sa kaciva mai e dua na gone lailai ko Jisu, ka vakatura e na kedra maliwa,

³ ka sa kaya, “Au sa kaya vakaidina vei kemudou, Kevaka dou sa sega ni saumaki mai, ka yaco me vaka na gone lalai, dou na sega sara ni curu ki na matanitu vakalomalagi.

⁴ Ia ko koya sa vakayalomalumalumutaki koya me vaka na gone lailai oqo, ko koya ga sa levu cake e na matanitu vakalomalagi.

⁵ Ia ko koya yadua sa vinakata e dua na gone lailai vakaoqo e na vuku ni yacaqu, sa vinakati au.

Na Veitemaki ki nai Valavala Ca

⁶ “Ia ko koya sa vakacala e dua vei ira na lalai oqo era sa vakabauti au, sa vinaka vua kevaka ka vakarubeci e domona e dua na vatu-i-qaqi levu, ka vakadromutaki e na wasaliwa titobu.

⁷ Sa ca ko vuravura e na vuku ni veivakacalai! Ni sa dredre me sega ni yaco mai na veivakacalai, ia sa ca vua na tamata sa vakayacora na veivakacalai!

⁸ “Ia kevaka sa vakacalai iko na ligamu se na yavamu, muduka tani, ka biuta tani vei iko. Sa vinaka vei iko mo curu ki na bula ka yava dua se liga dua, a sa ca me rua na ligamu se rua na yavamu ka mo biu ki na bukawaqa sa sega ni mudu.

⁹ Ia kevaka sa vakacalai iko na matamu, vecuka tani, ka biuta tani vei iko. Sa vinaka vei iko mo curu ki na bula ka dua ga na matamu, ka sa ca me rua na matamu ka mo biu ki Eli sa waqa kina na buka.

Na Vosa Vakatautauvata ni Sipi a Yali

¹⁰ “Lewai kemudou vinaka mo dou kakua ni beca e dua vei ira na lalai oqo. Ni'u sa kaya vei kemudou, A nodra agilosi mai lomalagi era sa raica tikoga na mata i Tamaqu sa tiko mai lomalagi.

¹¹ Ni sa lako mai na Luve ni Tamata me vakabulai koya sa yali.

¹² Dou lewa vakaevei? Kevaka e dua na tamata sa dua na drau na nona sipi, a sa yali e dua, ena sega beka ni biuta laivi tu na ciwasagavulu ka ciwa, ka lako ki na veiulunivanua me vakasaqarai koya ka yali?

¹³ Ia kevaka sa kunea, au sa kaya vakaidina vei kemudou, ena reki vakalevu e na vuku ni sipi oqo, ka vakalailai ga e na vuku ni ciwasagavulu ka ciwa sa sega ni yali.

¹⁴ Sa vaka talega oqo na Tamamudou sa tiko mai lomalagi, ni sa sega ni vinakata me yali e dua vei ira na lalai oqo.

Na Wekamu sa Caka Cala

¹⁵ “Ia kevaka sai valavala ca vei iko na wekamu, lako ka vunauca ni drau sa tiko vakai kemudrau ga. Kevaka ena rogoci iko, ko sa qai rawai koya na wekamu.

¹⁶ Ia kevaka ena sega ni rogoca, me qai lewe dua se lewe rua tale mo kauta vata kei iko, me vakadinadinataki na vosa kecega e na gusu ni dautukutuku e le rua se le tolu.

¹⁷ Ia kevaka e bese ni rogoci iratou, tukuna vei ira nai soqosoqo lotu. Ia kevaka e bese ko koya ni rogoci ira nai soqosoqo lotu, me qai vaka na tawa-lotu kei koya sa kumuna nai vakacavacava vei iko ko koya.

¹⁸ Au sa kaya vakaidina vei kemudou, A ka kecega dou na vauca e vuravura, ena vauci mai lomalagi, ia na ka kecega dou na sereka e vuravura, ena sereki mai lomalagi.

¹⁹ Au sa kaya tale vei kemudou, Kevaka e lewe rua vei kemudou sa lomavata e vuravura, me kerea e dua na ka, ena vakayacora vei rau na Tamaqu sa tiko mai lomalagi.

²⁰ Ia e na tikina sa soqoni vata kina e lewe rua, se lewe tolu, e na yacaqu, au sa tiko kina e na kedratou maliwa.”

Na Veivosovosoti

²¹ Sa qai lako mai vua ko Pita, ka kaya, “Noqu Turaga, kevaka e valavala ca vei au e dua na wekaqu, me na vakavica na noqu vosoti koya? Me vakavitu?”

²² Sa kaya vua ko Jisu, “Au sa sega ni kaya vei iko, Me vakavitu walega, ia me vakavitusagavulu na vitu.

Na Vosa Vakatautauvata ni Dauveiqaravi Sega ni Dauveivosoti

²³ “O koya ga oqo sa vakatauvatani kina na matanitu vakalomalagi kei na dua na tui, sa via tarogi ira na nona tamata.

²⁴ Ia ni sa vakatekivu ko koya me vakataroga, sa qai kau mai vua e dua, sa tini na udolu na nona taledi sa sega ni sauma.

²⁵ Ia ni sa sega vua na ka me sauma kina, sa kaya na nona turaga me volitaki ko koya, kei na watina, kei iratou na luvena, kei na ka kecega sa tu vua, me saumi kina.

²⁶ Sa qai cuva sobu na tamata, ka masuti koya, ka kaya, ‘Kemuni na Turaga, ni vosoti au mada ga, ka'u na sauma kecega vei kemuni.’

²⁷ Sa qai yalovinaka mai na turaga ni tamata ko ya, ka sa sereka, ka biuta ga me kakua ni sauma.

²⁸ A sa lako ki tautuba na tamata ko ya, ka sa kunea e dua na nona i tokani, sa sega ni sauma vua e dua na drau na pene, a sa taura ka kidomoka, ka kaya, ‘Sauma mada vei au na nomu dinau.’

²⁹ Sa qai cuva sobu na nona i tokani ki na yavana, a sa vakamasuta, ka kaya, ‘Mo vosoti au mada ga, ka'u na sauma kecega vei iko.’

³⁰ A sa bese ko koya, ka sa lako ka biuta ki na valeniveivesu, me sauma mada na nona dinau.

³¹ Ia ko ira na nona i tokani ni ra sa raica na ka sa caka, era sa rarawa vakalevu, ka ra sa laki tukuna vua na nodra turaga na ka kecega sa caka.

³² Ia na nona turaga, ni sa kacivi koya mai, sa kaya vua, ‘Tamata ca, au a sereki iko mai na dinau levu oqori, ni ko sa masuti au.

³³ E sega beka ni kilikili kei iko mo yalovinaka vua na nomu i tokani, me vaka ka'u a yalovinaka vei iko?’

³⁴ A sa cudru na nona turaga, a sa soli koya vei ira nai vakatawa ni valeniveivesu, me sauma kece mada na nona dinau.

³⁵ Ena kitaka vaka talega kina vei kemudou ko Tamaqu vakalomalagi, kevaka dou sa sega ni vosoti ira na wekamudou mai na vu ni yalomudou.”